پاکستان یو وار بیا له طالبانو غوښتنه کړې، چې خپل مسوولیتونه ادا کړي او د افغانستان له خاورې د وسلهوالو فعالیتونو مخه ونیسي. د پاکستان د بهرنیو چارو وزارت ویاند طاهر اندرابي خبرداری ورکړی، که له افغانستان نه ګواښ دوام وکړي؛ نو دوی به د ځان د دفاع لپاره لازم ګامونه پورته کړي.
د ملګرو ملتونو د سرمنشي ویاند فرحان حق وایي، چې طالبانو په هرات کې د سولهییز لاریون د ځپلو لپاره له جنګي مهماتو کار اخیستی دی. هغه په یوه خبري غونډه کې ټینګار وکړ، چې طالبان باید د سولهییزو اعتراضونو پر وړاندې له هر ډول «غیر ضروري او یا نامتناسب زور کارولو» ډډه وکړي.
د سویلي وزیرستان د سولې جرګې مشرانو د سیمې د امنیتي وضعیت پر خرابېدو اندېښنه څرګنده کړې او له اړوندو ادارو یې د سولې او ټیکاو د ټینګښت لپاره د عملي اقداماتو غوښتنه کړې ده.
په هرات کې د طالبانو د امنیې قوماندانۍ ویاند سید مسعود حسيني خبر ورکړی، چې د دغه ولایت د زنده جان ولسوالۍ په لنګر کلي کې یې د یوې کورنۍ د دوو غړو د وژنې په تړاو یوه اووه کسیزه ډله نیولې ده.
د افغانستان او پاکستان ترمنځ پر ډیورنډ کرښه د لارو تړل کېدو له امله په دواړه خواوو کې اقتصادي او بشري زیانونه ورځ تر بلې زیاتېږي، چې له امله یې ناروغان، سوداګر او عام خلک له جدي ستونزو سره مخ شوي دي.
د اروپايي پارلمان غړې هانا نیومن بروکسل ته د طالبانو پر نه بلنې ټینګار کړی. اغلې نیومن وایي، اروپا ته د طالبانو هر ډول بلنه به هغه رژیم ته د مشروعیت ورکولو په معنا وي چې په سیستماتیک ډول ښځې ځپي.
د طالبانو تر واک لاندې د افغاني سرې میاشتې ټولنې مرستیال عزیزالرحمان وایي، چې د هرات ولایت د ګلران ولسوالۍ په بیدک مرادکوهي کلي کې یې زلزله ځپلو کورنیو لپاره ۶۰ استوګنیز کورونه جوړ او ګټې اخیستنې ته وسپارل. طالبانو ویلي، چې دغه کورونه یې د ۲۰ مېلیونه افغانیو په لګښت جوړ کړي.
د پېښور سترې محکمې له لوري د افغان کډوالو لهخوا د پاکستاني تابعیت د ترلاسه کولو غوښتنو له ډلې ۱۰۰ هغه رد شوې دي. د یادې محکمې د پرېکړې له مخې؛ د نادرا ادارې او نورو اړوندو چارواکو ته لارښوونه شوې، چې په دغه قضیو کې له قانون او پخوانیو پرېکړو سره سم عمل وکړي.
په افغانستان کې د ملګرو ملتونو د مرستندویه پلاوي دفتر (یوناما) ویلي، چې د هېواد پر درېیو ولایتونو خوست، کونړ او پکتیکا د پاکستان هوايي بریدونو له امله ۱۳ ملکي وګړي وژل شوي او ۱۰ نور ټپیان دي.
د طالبانو د کانونو او پټرولیم وزارت وایي، چې د دغه وزارت د پالیسۍ او برنامو مرستیال عبدالرحمان قانت د افغانستان او امریکا د سوداګرۍ ګډې خونې له رییس جفري ګریګو سره په لیدنه کې د کانونو په برخه کې د بهرنیو پانګونو د جذب په اړه خبرې کړې دي.
روسیې د شانګهای همکارۍ سازمان – افغانستان د تماس ډلې د فعالیتونو د بیا پیل غوښتنه کړې ده. د شانګهای همکارۍ سازمان په چارو کې د روسیې استازي بختیار حکیموف ویلي، مسکو باور لري چې د یادې ډلې بیا فعاله کول اړین دي.
د پاکستان د پلازمېنې اسلاماباد او مري ترمنځ پر غځېدلې لویه لار تر یوې ټرافیکي پېښې وروسته د سېلانیانو په موټر کې د اورلګېدنې له کبله ۱۰ کسان مړه او ۱۳ نور ټپیان شوي دي.
د پاکستان د فدرالي څېړنو ادارې له لوري افغان وګړو ته د پاکستاني پاسپورټونو د ناقانونه ورکړې په اړه پلټنې روانې دي، چې په ترڅ کې یې د یوې منظمې شبکې د شتهوالي ادعا شوې ده.
په هرات کې د طالبانو لهخوا «د بېحجابۍ» په تور د نیول شویو ښځو له ډلې یوه مېرمن وایي، که څه هم «شرعي حجاب» یې اغوستی و؛ خو بیا هم طالبانو نیولې، دوه ورځې او یوه شپه یې په بند کې ساتلې وه. دغه مېرمنې په ژړغوني غږ ویلي، چې په زندان کې «شکنجه» شوې ده.
د ایران د تایباد څارنوال حجت صدیقي ویلي، چې په ایران کې ۴۰۸ افغان بندیان د دوغارون پولې له لارې خپل هېواد ته لېږدول شوي دي. د هغه په وینا؛ دغه افغانان د ایران په اتو ولایتونو کې بندیان وو، چې په دوغارون پوله کې طالب چارواکو ته سپارل شوي دي.
د ملګرو ملتونو د کډوالو عالي کمېشنرۍ په تازه راپور کې ویلي، افغانستان د هغه هېوادونو له ډلې دی چې د بېرته ستنېدونکو کډوالو لوړه کچه پهکې ثبت شوې ده. د راپور له مخې؛ په ۲۰۲۵کال کې شاوخوا ۲.۹ مېلیونه افغانان بېرته هېواد ته ستانه شوي، چې لوی شمېر یې له پاکستان او ایران نه راغلي دي.
د طالبانو د ټولګټو چارو وزارت ویاند محمداشرف حقشناس وایي، د هرات – بلخ اوسپنې پټلۍ پروژه د افغانستان له مهمو زېربنايي پروژو څخه ده چې ایران او ترکیه د مرکزي اسیا له هېوادونو سره نښلوي او په پای کې له چین سره د نښلولو په برخه کې هم مهم رول لوبولی شي.
د بلوچستان د بار وړونکو موټرو او د سوداګرو ټولنو لهخوا د نامعلومې مودې لپاره د بار وړونکو موټرو درېدو او د هټیو تړلو اعتصاب اعلان کړی دی. د دغه اعتصاب له امله نن په بلوچستان کې سوداګریز فعالیتونه په بشپړه توګه په ټپه درېدلي او پر سړکونو د موټرو تګراتګ هم بند شوی دی.
د کندوز یو اوسېدونکي افغانستان انټرنشنل ته ویلي، د طالبانو د ښاروالۍ کارکوونکي د دغه ولایت په بېلابېلو سیمو کې کور په کور ګرځي او د هغه بېوزله خلکو د کورونو دروازې تړي چې د یادې ښاروالۍ مالیې یې نهدي ورکړي.
د هرات په صنعتي ښارګوټي کې بوخت یو کارګر افغانستان انټرنشنل ته په لېږلي یو پیغام کې ویلي، چې هره ورځ د سهار له ۵ بیا د مازیګر تر ۶ بجو پورې په کار کې وي. نوموړي زیاته کړې: «زوی مې ناروغ دی، ماته رخصت نه راکوي او مېرمن مې د طالبانو له وېرې له کوره نهشي وتلی».
د پاکستان د وګړو د ثبت ملي ادارې (نادرا) اعلان کړی، هغه کسان چې پخوا یې اېسيسي یا پي او ار کارت ترلاسه کړی؛ خو ځانونه د پاکستان قانوني وګړي ګڼي، کولای شي د خپل پاکستاني تابعیت د ثابتولو لپاره رسمي غوښتنلیک وړاندې کړي.