د افغانستان د ۱۹ کلنو کمعمره کرېکټ لوبډله نن د عمان په مسقط ښار کې د بنګلهدېش له سیالې لوبډلې سره د څلورو یو ورځنیو سیالیو لوبلړۍ په لومړۍ لوبه کې مخامخ کېږي. ټاکل شوې چې لوبه د افغانستان پر وخت د سهار په ۱۰ بجو پیل شي.
د پاکستان د دفاع وزیر خواجه اصف هغه ادعاوې رد کړې چې ګواکې دغه هېواد خپل قیمتي کانونه امریکا ته سپارلي دي. نوموړي ویلي، د کانونو د استخراج په اړه له بېلابېلو هېوادونو سره خبرې روانې دي، خو تر اوسه له امریکا یا کوم بل هېواد سره تړون نه دی لاسلیک شوی.
د خیبر پښتونخوا په لکي مروتو او اورکزیو کې د پولیسو په بېلابېلو عملیاتو کې ۱۱ وسلهوال وژل شوي دي. د ترهګرۍ ضد پولیسو ویلي، چې په ولۍ ساګي سیمه کې یې د اتحاد المجاهدین ډلې قوماندان زاهد ګل هم وژلی، چې د کوهاټ د برید طراح بلل شوی دی.
په یمن کې د سعودي عربستان په مشرۍ د ملاتړ ایتلاف وايي، د سعودي عربستان پر لور توغول شوی یو بالستیک توغندی، دوه کروز توغندي او د پنځو بېپیلوټه الوتکو بریدونه یې شنډ او له منځه وړي دي.
د اوکراین په ختیځه جبهه کې د سټارلنک انټرنېټي خدمتونو کمزورتیا، د اوکرایني ځواکونو اړیکې ګډې وډې کړې او د روسي ځواکونو د هدفونو په نښه کولو بهیر یې ستونزمن کړی دی. دا وضعیت وروسته له هغې رامنځته شوی چې امریکا د اوکرایني پوځ لپاره د سپوږمکۍ ځینې پوځي خدمتونه محدود کړل.
د افغانستان په چارو کې د روسیې د ولسمشر ځانګړي استازي ضمیر کابلوف ویلي، چې د روسیې د لومړي وزیر مرستیال الکسي اورچوک په مشرۍ به لوړپوړی پلاوی ډېر ژر افغانستان ته ولاړ شي. د نوموړي په وینا، د دې سفر موخه د سوداګریزو او اقتصادي اړیکو پراختیا او له طالب چارواکو سره خبرې اترې دي.
ډیپلوماټ مجلې د ۱۶۵ افغان ښځو د روایتونو پر بنسټ په یوه مقاله کې ویلي، چې افغان ښځې د طالبانو د پراخو محدودیتونو سربېره د انلاین کار، کورنیو کاروبارونو او پټو زدهکړو له لارې د خپلو زدهکړو، کار او اقتصادي فعالیتونو د دوام هڅه کوي.
د ملګرو ملتونو په وینا، د اقلیمي بدلونونو د ناورینونو د زیاتېدو په درشل کې، د اقلیم ۳۱م نړیوال کنفرانس باید نړیوالې ژمنې په عملي اقداماتو بدلې کړي او د زیانمنونکو خلکو د ساتنې لپاره د هېوادونو ترمنځ باور پیاوړی کړي.
د قطر د بهرنیو چارو وزارت ویاند پر خلیج هېوادونو د بریدونو له امله پر ایران له نیوکو سره زیاته کړه، چې پر سعودي عربستان د حوثي ډلې بریدونه هېڅ توجیه نهلري. هغه دا هم وویل، چې په دوحه کې له امریکایي اډې د ایران پر ضد هېڅ ډول کار نهدی اخیستل شوی.
د بریتانیا د دوو پوهنتونونو نوې څېړنه ښيي، چې د سګرټو له لوګي سره مخ کېدل ښايي د هغو جینونو په فعالیتونو کې بدلونونه رامنځته کړي، چې د ښځو د تخمدانونو له فعالیت او د نارینهوو د سپرم له تولید سره تړاو لري.
د ایران د بهرنیو چارو وزارت مرستیال سعید خطیب زاده ویلي، سعودي عربستان د یمن د کړکېچ او د حوثیانو په تړاو د تهران د منځګړیتوب وړاندیز ته لا تراوسه مثبت ځواب نهدی ورکړی. د سعودي یوه چارواکي ایران د یمن د حوثیانو پر ملاتړ او هڅونه تورن کړی، خو تهران دا تور نهمني.
د الجزیرې ټلویزیوني شبکې په یوه تحلیلي راپور کې ویلي، چې مسکو د طالبانو او پاکستان ترمنځ د کړکېچ د راکمولو لپاره ډیپلوماټیکې هڅې ګړندۍ کړي، خو شنونکي پر دې باور دي، چې د دواړو لورو ترمنځ د ژورو اختلافاتو له امله د روسیې اغېز محدود ښکاري.
د خيبر پښتونخوا د چارسدې ولسوالۍ د ترناب لارې په اوږدو کې د یوې ټرافیکي پېښې له امله دوه ماشومان مړه شوي او یو بل سخت ټپي شوی دی.
رویټرز خبري اژانس وايي، د ملګرو ملتونو د نوي سرمنشي د ټاکلو سیالۍ کې د دغه سازمان د سوداګرۍ او پرمختګ کنفرانس د اوسنۍ مشرې ربیکا ګرینسپان د بریالیتوب چانسونه زیات شوي دي. دا ۷۰ کلنه ډيپلوماټه که دا څوکۍ وګتي، د ملګرو ملتونو په ۷۷ کلن تاریخ کې به لومړنۍ ښځینه سرمنشۍ وي.
د اوکراین ولسمشر ولادیمیر زیلېنسکي په بروکسل کې د اروپايي ټولنې د مشرانو په غونډه کې ګډونوالو ته وویل، چې روسیه هېڅکله ریښتینې سوله نهغواړي او له همدې امله یې د سولې په بهیر کې د اروپايي متحدینو د پیاوړې ونډې هرکلی کړی دی.
د پاکستان د جمعیت علمای اسلام ګوند مشر مولانا فضلالرحمان په ملتان کې یوې غونډې ته وویل، که په خیبر پښتونخوا کې د ناامنۍ په پلمه بیړنی حالت او د والي واکمني لګول کېږي، نو د دغه اقدام لپاره تر ټولو مناسب ځای بلوچستان دی.
د امریکا د ولسمشر ټرمپ نوې ویانده کېټي زکریا په سپینه ماڼۍ کې د کار له پیله پنځه ورځې وروسته له خپلې دندې ګوښه کړای شوه. دوو امریکایي چارواکو د جمعې په ورځ تایید کړه، چې زکریا تر سختو نیوکو او د هغې د حقوقي اسنادو په اړه د پوښتنو تر راپورته کېدو وروسته، له دندې ګوښه شوې ده.
د بلوچستان د مستونګ ولسوالۍ په ګورګینه سیمه کې ناپېژاندو وسلهوالو ۲۰ پولیس سرتېري تښتولي دي. د پولیسو سرچینو ویلي، یاد سرتېري د قلات د روزنیز مرکز زدهکوونکي وو او د اونیزې رخصتۍ لپاره خپلو کورونو ته روان وو.
د طالبانو ویاند ذبیحالله مجاهد د یوناما په تازه راپور کې د مخکینیو امنیتي سرتېرو د وژنو او لسګونه کسانو د نیول کېدو په اړه وړاندې شوې شمېرې تایید کړې. هغه په ورته مهال، د وژنو لامل «شخصي بدۍ» او د یوناما لهخوا یادې شوې «خپلسرې» نیونې «قانوني» وبللې.
د خیبرپښتونخوا د خیبر ولسوالۍ په لنډي کوتل، باړې او جمرود کې د ودانیو د خراب حالت او د زدهکوونکو د ژوند د خوندیتوب لپاره ۵ ښوونځي تړلي دي. دا اقدام وروسته له هغې وشو چې د پنجشنبې په ورځ د پېښور د یوه ښوونځي چت نړېدو له امله ۳۳ زدهکوونکو او یوې ښوونکې خپل خپل ژوند له لاسه ورکړ.
د خیبرپښتونخوا د خیبر ولسوالۍ په باړې بازار کې د والي واکمنۍ او بېړني حالت پر ضد د تحریک انصاف ګوند د اعتراضونو په تړاو د ترهګرۍ ضد قانون له مخې قضیه ثبت شوې ده. په قضیه کې د ملي اسمبلۍ دوه غړي، د ایالتي اسمبلۍ یو غړی او د پاکستان تحریک انصاف ګوند شاوخوا ۳۰۰ فعالان شامل دي.