څو ورځې وړاندې د طالبانو دفاع وزیر ملامحمد یعقوب مجاهد له روسي چارواکو سره د پوځي او تخنیکي همکاریو تړون لاسلیک کړ، چې له مخې یې روسیه به له طالبانو سره د هغه پخوانیو روسي وسلو په ترمیم کې مرسته وکړي چې پخوا شوروي اتحاد د افغانستان د هغه وخت حکومتونو ته ورکړې وې.
په ملګرو ملتونو کې لیتوانیا استازې د امنیت شورا په غونډه کې د افغان نجونو پر زدهکړو د بندیز د دوام له امله اندېښنه څرګنده کړې او ویلي یې دي چې د پنځم پرلهپسې کال لپاره د نجونو د زدهکړو منع کول د هغوی پر حقونو او راتلونکې مستقیم برید دی.
د کردستان د بشري حقونو شبکې راپور ورکړی، چې د سرپل ولایت د کوهستاناتو ولسوالۍ د حج او اوقافو طالب مسوول مفتي محمدالله یوه ایراني کردۍ ښځه او د هغې ۱۵ کلنه لور، وروسته له هغه په ډزو وژلي چې هغوی له اجباري واده سره مخالفت کړی و.
د ملګرو ملتونو سرمنشي انتونیو ګوترېش، امنیت شورا ته په خپل تازه راپور کې ویلي چې د روان میلادي کال د فبرورۍ له لومړۍ نېټې څخه د اپرېل تر ۳۰مې پورې په افغانستان کې ۳ زره او ۶۸۷ امنیتي پېښې ثبت شوې دي.
دامریکا د فضایي څېړنو اداره ناسا ویلي چې د ارټیمس۳ماموریت لپاره ټاکل شوي ستورمزلي به سبا رسما اعلان شي. دا ماموریت د سپوږمۍ په مدار کې د نویو فضايي لینډرونو (پر سپوږمۍ کېناستونکي وسایل) د نږدې کېدو او نښلولو ازموینې لپاره یو مهم ګام بلل کېږي.
د پاکستان د بلوچستان ايالت په عبدالله کلا ولسوالۍ کې د عوامي نشنل ګوند يو سيمه ييز مشر د ناپېژانده وسله والو په بريد کې وژل شوی او دوه تنه نور ټپيان شوي دي.
د کډوالو لپاره د ملګرو ملتونو عالي کمېشنرۍ ویلي، د کانګو ډیموکراټیک جمهوریت په ختیځ کې د ایبولا ناروغۍ وروستۍ خپرېدنه د هغو ټولنو لپاره جدي ګواښ رامنځته کړی چې له وړاندې د جګړو او بېځایه کېدو له امله سخت اغېزمنې شوې دي.
په ملګرو ملتونو کې د ازبکستان او ترکمنستان استازو د امنیت شورا په غونډه کې د افغانستان د وضعیت د ښه والي، اقتصادي همکاریو د پراخېدو او د دوامدار ثبات د ټینګښت غوښتنه وکړه.
جرمني او فرانسې پرېکړه کړې چې د نوې نسل د جنګي الوتکې ګډه پروژه لغوه کړي، دا هغه پروګرام دی چې شاوخوا ۱۰۰ میلیارد یورو ارزښت لري او د اروپا تر ټولو لویه دفاعي پروژه بلل کېده.
د بښنې نړیوال سازمان د اسیا څانګې ویلي، چې په هرات ښار کې په وروستیو دوو ورځو کې د طالبانو له لوري د لسګونو ښځو او نجونو نیول په افغانستان کې د ښځو او نجونو پر حقونو د روانو محدودیتونو او ځپلو دوام څرګندوي.
د خيبرپښتونخوا اعلی وزیر سهيل اپریدی او د جمعيت علمای اسلام ګوند مشر مولانا فضل الرحمان د ايالت پر واک او حقونو غږېدلي او ويلي یې دي چې دوی پر دې خبره موافق دي چې مرکزي حکومت ايالت ته خپل اساسي حقونه پوره نه ورکوي.
د امریکا ولسمشر ډونالډ ټرمپ ویلي، ایران له واشنګټن څخه غوښتي چې اسراییل ته د بریدونو د درولو پیغام ورسوي. نوموړي زیاته کړې چې د اسراییل له لومړي وزیر بنیامین نتنیاهو سره یې په اړیکه کې د جګړې د پراخېدو د مخنیوي لپاره خبرې کړې دي.
د طالبانو تر چتر لاندې د کډوالو د دایمي مېشتېدنې او ځمکو وېش کمېټې ویلي، په تېره اوونۍ کې ۴۶۹۴ راستنېدونکو کورنیو ته د هېواد په بېلابېلو ولایتونو کې د هستوګنې ځمکې وېشل شوې دي.
د پاکستاني طالبانو تحریک (ټي ټي پي) د خيبرپښتونخوا په سوات ولسوالۍ کې د افضل خان ګجر په نوم یوه کس باندې وسله وال بريد کړی او په برید کې یې د درېو کسانو د وژلو پړه منلې ده. ياده پېښه تېره شپه رامنځته شوې وه.
د نجونو د زده کړو ملاتړی بنسټ «ملاله بنسټ» ویلي، د ښځو پر وړاندې د طالبانو د محدودیتونو د پراخېدو له پنځو کلونو وروسته، حکومتونه باید د افغانستان د ښځو او نجونو پر وړاندې روان «جنسیتي اپارتاید» د نړیوال قانون له مخې د جرم په توګه په رسمیت وپېژني.
په خوست کې د طالبانو والي مولوي عبدالرحمن حقاني د امر بالمعروف اړوند قانون د تطبیق په اړه یوې ناستې ته ویلي، د طالبانو د مشر د اوامرو اطاعت پر ټولو واجب دی او د اسلامي احکامو عملي کول د ټولنې د اصلاح او د نظام د پیاوړتیا اساسي بنسټ ګڼل کېږي.
د ننګرهار د یوه طالب چارواکي په غږیز پیغام کې چې افغانستان انټرنشنل – پښتو ترلاسه کړی، ویل کېږي د ملا هبتالله اخوندزاده د هدایت له مخې د غونډې پر مهال د ځیرکو موبایلونو د راټولولو او بندولو پرېکړه شوې او ټول چارواکي او کارکوونکي اړ دي چې یا خپل موبایلونه وسپاري او یا یې مات کړي.
باوري سرچینو افغانستان انټرنشنل ـ پښتو ته ویلي، چې د دغه ولایت طالب والي د یوې اداري غونډې پر مهال د رییسانو او ولسوالانو ځیرک (سمارټ) موبایلونه مات کړي او هغوی ته یې امر کړی چې د خپلو اړوندو ادارو د کارکوونکو ځیرک موبایلونه هم ولایتي ادارې ته وسپاري.
د بلوچستان ایالت د مرکزي ښار، کوېټې په وحدت کالونۍ سیمه کې یوه کس لومړی خپله مېرمن او څلور ماشومان وژلي او وروسته یې د ځان وژنې هڅه کړې، خو په روغتون کې یې د درملنې پر مهال ساه ورکړې ده.
په ملګرو ملتونو کې د ایران استازي، د امنیت شورا غونډې ته ویلي چې په افغانستان کې د طالبانو له ادارې سره د نړیوالې ټولنې د تعامل دوام د ثبات د ټینګښت او د دغه هېواد د ننګونو د حل لپاره اړین دی.
د بشر حقونو څار بنسټ ویلي، چې پاکستان د الکترونیکي جرمونو قانون د بشري حقونو د مدافعینو او د حکومت د منتقدانو پر ضد د فشار د وسیلې په توګه کاروي. یاد بنسټ دا څرګندونې د ایمان مزاري او هادي علي چټې د لس کلن بند له سزا وروسته کړې دي.