د قزاقستان په پلازمېنه استانه کې د افغانستان، قزاقستان، ازبکستان، پاکستان او د ایران د استازو د ټرانسـ افغان دهلېز او د کاسا رېلپټلۍ پروژې په اړه ناسته کړې ده. په دغه ناسته کې د بنسټیزو پروژو د پلي کېدو پر عملي لارو چارو او د نړیوالو مالي ادارو د پانګونې پر راجلبولو خبرې شوې.
د طالبانو د امارتي شرکتونو عمومي ریاست ویاند وايي، چې په هرات ولایت کې د ټاپي پروژې د فرعي نللیکې مسیر او حریم تر تخنیکي ارزونو وروسته تثبیت شو. دغه نللیکه د زندهجان ولسوالۍ له لومړني سټېشن څخه پیلېږي او د ۲۸ کیلومتره اوږدوالي په درلودلو سره به صنعتي فابریکو ته ګاز ورسوي.
د تېر جمهوري نظام پرمهال د عدلیې پخواني وزیر فضل احمد معنوي په تېره یوه میاشت کې په کابل کې د ۱۲۰ ماشومانو او تنکیو ځوانانو ورکېدو ته په غبرګون ویلي، چې د طالبانو تر واک لاندې افغان ماشومان هېڅ ډول خوندیتوب نه لري.
د قزاقستان د ملي امنیت کمیټه وایي، چې د قزاقستان، روسیې او ازبکستان د امنیتي بنسټونو په ګډو عملیاتو کې یې په روسیه کې د نشهیي توکو د قاچاق د یوې نړيوالې شبکې د دوو غړو د نیولو تر څنګ د افغانستان ۳۰ کیلوګرامه چرس هم تر لاسه کړي دي.
د قطر، سعودي عربستان او متحده عربي اماراتو استازو په قاهره کې د روغتیا د نړیوال سازمان په غونډه کې، په افغانستان کې د بنسټیزو روغتیایي خدمتونو د پیاوړتیا او د پولیو د لهمنځه وړلو طرحه وو و ارزوله. په افغانستان کې پر پولیو ویروس د اخته کسانو شمېر ۳۶ پېښو ته رسېدلی دی.
د ناروې د کډوالۍ شورا مشر جان اېګلنډ ویلي چې د بېکارۍ زیاتوالي، اقتصادي ستونزو، د اقلیم بدلون اغېزو او د مرستو کمېدو له امله نږدې ۱۶ میلیونه افغانان د اړتیا وړ خوړو ته لاسرسی نه لري. نوموړي خبرداری ورکړی چې په راروان ژمي کې به یو پر درېیمه برخه افغانان له سختې لوږې سره مخ شي.
د طالبانو د پکتیا د امنیه قوماندانۍ ویاند منیب ځدراڼ وايي، چې د ننګرهار د زندان د کشف پر امر د برید اصلي عامل د پکتیا په ډنډپټان ولسوالۍ کې په یوه نښته کې وژل شوی دی. ځدراڼ ویلي، چې بریدګر تېره شپه پاکستان ته د اوښتلو پر مهال په ډزو کې وژل شوی دی.
د ایران د بهرنیو چارو وزیر عباس عراقچي وايي، تهران په سیمه کې د امریکا د هر ډول حضور په اړه اندېښنه لري، خو پر ارمنستان باور لري او ډاډه دی چې د ایران امنیت ته به زیان ونه رسوي.
د خيبر پښتونخوا د ژرغورنې ادارې ویلي چې د جمعې په ورځ د بونېر ولسوالۍ د باباجي کنډو په غرنۍ سیمه کې د یوې ترافيکي پېښې له امله شپږ ښځې مړې شوې او ۱۶ نور ټپيان دي.
د پاکستان پارلمان ته د وړاندې شویو معلوماتو لهمخې، په روان کال کې تر ۱۵ زره ډېر لوستي او مسلکي پاکستانیان بهر ته تللي دي. په دې ډله کې ډاکټران، انجنیران، محاسبین او استادان شامل دي. په تېرو دوو کلونو کې هم لسګونو زره مسلکي کادرونه د کار موندلو په موخه له خپل هېواده وتلي دي.
د اروپايي ټولنې مشرانو په بروکسل کې له ولادیمیر زلنسکي څخه خپل ملاتړ اعلانولو سره همهاله د امریکا ولسمشر ډونالډ ټرمپ د روسیې پر تصفیهخونو د اوکراین هوایي بریدونه شرموونکي بللي دي. ټرمپ دا بریدونه د نړۍ د تېلو د بیو د لوړېدو لامل وبلل.
د طالبانو تر واک لاندې د کډوالو ستونزو ته د رسېدنې عالي کمېسون خبر ورکړی چې تېره ورځ ۱۱۵ کډوالې کورنۍ چې د غړو شمېر یې ۴۸۱ کسانو ته رسېږي له پاکستان او ایران نه افغانستان ته جبري ستانه کړل شوي دي.
د همګټو ناپېیلو هېوادونو سازمان د ترهګرۍ ضد مرکز مشر وايي، د سیمې د هېوادونو امنیتي چارواکي د افغانستان په شمال کې د مېشتو ترهګرو ډلو فعالیتونه د منځنۍ اسیا له مهمو امنیتي ګواښونو څخه ګڼي. یوګني سیسویف وویل چې د افغانستان وضعیت پېچلی او کله ناکله له تناقضونو ډک دی.
د ایران کورنیو چارو وزارت د بهرنیو وګړو او کډوالو چارو مشر د ملګرو ملتونو د کډوالو عالي کمېشنر برهم صالح سره په لیدنه کې ویلي، ایران د نږدې ۱۰ زره پخوانیو افغان نظامیانو لپاره لنډمهاله ملاتړ برابر کړی. هغه د کډوالو لپاره د ملګرو ملتونو د لا زیاتو مرستو غوښتنه کړې.
د اکثریت ګوند غړی فضل محمود فضلي وايي، د طالبانو په اړه د امریکا او اروپا سیاست د لابي او زاریو له لارې نه بدلېږي. نوموړی ټینګار کوي چې د وخت او انرژۍ پر ځای باید پر داسې ولسي انسجام تمرکز وشي چې د دوام او بدلون وړتیا ولري.
د تاجکستان د بهرنیو چارو وزارت د ستراتیژیکو مطالعاتو رییس میرزا شریف جلالوف وايي، هېواد یې د افغانستان د اقتصادي بیارغونې په برخه کې د سیمهییزو او نړۍوالو رغنده هڅو ملاتړ کوي او د دغه هېواد له خلکو سره به خپلو مرستو ته دوام ورکړي.
د شانګهای همکاریو سازمان مرستیال سرمنشي احمد سعید مرادزاده وايي، د افغانستان د ټولو قومي او سیاسي ډلو په ګډون د یوه ټولشموله حکومت جوړول په دغه هېواد کې د تلپاتې سولې او ثبات یوازینۍ لار ده.
د طالبانو د عامې روغتیا وزارت خبر ورکړی، چې په هلمند کې یې د مالګې شپږ تولیدي کارخونې او په ننګرهار کې د غاښونو درې کلینیکونه، روغتیايي معیارونو ته د نه پاملرنې او نامعیاري فعالیتونو له امله تړلي دي.
د ګډو ګټو خپلواکو هېوادونو ټولنې سرمنشي وايي، د افغانستان امنیتي وضعیت ترینګلی دی او داعش، القاعده او نورې وسلهوالې ډلې هڅه کوي چې بېثباتي د منځنۍ اسیا هېوادونو ته ولېږدوي. سرګي لیبیدیف ویلي، د طالبانو منزوي کول ښايي د ناورین او د کورنیو او بهرنیو جګړو د نوي پړاو لامل شي.
د روسیې د بهرنیو چارو وزیر سرګي لاوروف ویلي، داعش غواړي د خپلو ترهګریزو فعالیتونو د پراختیا لپاره له افغانستان نه د اډې په توګه کار واخلي او منځنۍ اسیا او روسیه په نښه کړي. د هغه په وینا، وسلهوالې ډلې د تاجکستان او ازبکستان سره د افغانستان په سرحدي سیمو کې حضور لري.
د سيبياېس نیوز د راپور له مخې، د ستراتیژیکو او نړۍوالو مطالعاتو مرکز د اټکل پربنسټ د امریکا پوځ له ایران سره د جګړې پرمهال د تاد توغندیو شنډولو له ۱۹۰ تر ۲۹۰ توغندي مصرف کړي چې د جګړې له پیل وړاندې د دغه توغندیو د زېرمو شاوخوا ۸۲ سلنه جوړوي.