د ګډو ګټو خپلواکو هېوادونو ټولنې سرمنشي وايي، د افغانستان امنیتي وضعیت ترینګلی دی او داعش، القاعده او نورې وسلهوالې ډلې هڅه کوي چې بېثباتي د منځنۍ اسیا هېوادونو ته ولېږدوي. سرګي لیبیدیف ویلي، د طالبانو منزوي کول ښايي د ناورین او د کورنیو او بهرنیو جګړو د نوي پړاو لامل شي.
د روسیې د بهرنیو چارو وزیر سرګي لاوروف ویلي، داعش غواړي د خپلو ترهګریزو فعالیتونو د پراختیا لپاره له افغانستان نه د اډې په توګه کار واخلي او منځنۍ اسیا او روسیه په نښه کړي. د هغه په وینا، وسلهوالې ډلې د تاجکستان او ازبکستان سره د افغانستان په سرحدي سیمو کې حضور لري.
د سيبياېس نیوز د راپور له مخې، د ستراتیژیکو او نړۍوالو مطالعاتو مرکز د اټکل پربنسټ د امریکا پوځ له ایران سره د جګړې پرمهال د تاد توغندیو شنډولو له ۱۹۰ تر ۲۹۰ توغندي مصرف کړي چې د جګړې له پیل وړاندې د دغه توغندیو د زېرمو شاوخوا ۸۲ سلنه جوړوي.
د قرغزستان ولسمشر په باکو کې د سیکا په اوومه غونډه کې ټینګار وکړ، چې افغانستان د اسیا د امنیت او همکارۍ یوه مهمه برخه ده. هغه وویل، چې په افغانستان کې د تلپاتې ثبات ټینګښت یوازې د خبرو اترو او همغږو نړۍوالو اقداماتو له لارې شونی دی.
د چین د بهرنیو چارو وزیر وانګ یي له طالبانو غوښتي، چې په افغانستان کې د وسلهوالو ډلو د لهمنځه وړلو او د تلپاتې ثبات د ټینګښت لپاره عملي او څرګند اقدامات وکړي. نوموړي ټینګار کړی، چې د افغانستان له خاورې د دغه ډلو په لهمنځه وړلو سره د تلپاتې سولې او ثبات زمینه برابرېدای شي.
د طالبانو عامې روغتیا وزارت خبر ورکړی، چې د دغه وزارت یو پلاوي تایلنډ ته د خپل سفر په ترڅ کې د یاد هېواد د «نړۍوال صندوق د مالي مرستو ۸م پړاو» ناسته کې ګډون کړی. د دغه وزارت په وینا، په یاده ناسته کې د افغانستان د روغتیا سکټور په برخه کې د دوامداره همکاریو پر موضوع خبرې شوې دي.
د ملګرو ملتونو سرمنشي انتونیو ګوترېش په یوه ویډیوي پیغام کې ویلي، چې تېرکال په نړۍ کې شاوخوا ۶۴۵ مېلیونه خلک له لوږې سره مخ وو او نږدې ۲.۷ میلیارده خلکو د مغذي خوراکي توکو د برابرولو توان نهدرلود. نوموړي ویلي، خواړه د هر انسان بنسټیز حق دی.
د پاکستان د پنجاب ایالت په بهالپور ښار کې د قاید اعظم طبي کالج ادارې د ۲۰ افغان ډاکټرانو او محصلانو د اېستلو بهیر پیل کړی دی. د کالج ادارې دغه افغان ډاکټرانو او محصلانو ته امر کړی، چې ژر تر ژره لیلیې خالي کړي او له خپلو تخصصي څانګو څخه د وتلو چارې بشپړې کړي.
یو افغان پناهغوښتونکی وايي، د ترکیې پولیسو د دغه هېواد له ارزروم ښار څخه د افغان پناهغوښتونکو د جبري اېستلو پرمهال هغوی وهلي، سپکاوی یې ورته کړی او په زور یې الوتکې ته پورته کړي دي.
د طالبانو ویاند مرستیال حمدالله فطرت د کندهار په یوه دیني مدرسه کې د طالبانو د مشر ملا هبتالله اخوندزاده د وینا یو متن خپور کړی، چې پهکې د علم زدهکړه او دیني زدهکړې فرض او اړینې بلل شوې دي. خو په دغه وینا کې د نجونو د زدهکړو هېڅ یادونه نهده شوې.
د جمعیت علمای اسلام ګوند مشر مولانا فضلالرحمان ویلي، سره له دې چې افغانستان له تېرو پنځوسو کلونو راهیسې له جګړو او سختو شرایطو سره مخ دی اقتصاد یې د ښه کېدو په حال کې دی او پانګونه هم پهکې زیاتېږي؛ خو په پاکستان کې سوداګر خپله پانګه بهرنیو هېوادونو ته لېږدوي.
د امریکا د اورېګن ایالت په یوه ښوونځي کې د ډزو په پېښه کې لږترلږه درې ماشومان او یو ځوان وژل شوي دي. د «سيبياېس نیوز» د راپور له مخې، امنیتي چارواکو ویلي چې د پېښې ۱۶ کلن بریدګر هم په سیمه کې د یو کس په ډزو وژل شوی دی.
د ډلهییز امنیت تړون سازمان، د ګډو ګټو خپلواکو هېوادونو او د شانګهای همکارۍ سازمان نن جمعه (د تلې ۲۴مه) په مسکو کې ناسته لري. ټاکل شوې، چې د دغه بنسټونو مشران، ډیپلوماټان او کارپوهان په دې ناسته کې د منځنۍ اسیا د امنیت او د افغانستان د وضعیت په اړه خبرې وکړي.
د کډوالۍ نړۍوال سازمان په خپل تازه راپور کې ویلي، چې د ۲۰۲۶کال د سپټمبر له ۲۷مې د اکتوبر تر ۱۰مې پورې له ایران او پاکستان نه ۴۹زره او ۴۱۸ افغان کډوال د اسلام کلا، تورخم، سپینبولدک، ورېښو پله او نورو لارو افغانستان ته ستانه شوي دي.
د خیبر پښتونخوا په سوېلي وزیرستان کې پر یوه کور د هاوان مرمۍ لګېدو له امله د یوې کورنۍ ۳ غړي وژل شوي او لږ تر لږه ۵ نور ټپیان شوي دي. په وژل شویو او ټپیانو کې ښځې او ماشومان هم شامل دي، چې ټپیان د درملنې لپاره د واڼه مرکزي روغتون ته لېږدول شوي دي.
د خوړو د خوندیتوب پړاوونو د طبقهبندۍ (IPC) په تازه راپور کې ویل شوي، چې د ۲۰۲۶کال له نومبر څخه د ۲۰۲۷کال تر اپرېل میاشتې پورې به په افغانستان کې ۱۹.۲ مېلیونه کسان د خوړو د نه خوندیتوب له بحراني یا تر دې هم ناوړه وضعیت سره مخ شي.
د روغتیا نړۍوال سازمان وايي، په افغانستان کې په تېرې سپټمبر میاشت کې د ساري ناروغیو لکه د سینهبغل «سیخ او بریښ»، ډینګي تبې، شري او کریمیا ـ کانګو تبې پېښې د وړمې میاشتې پرتله زیاتې شوې دي؛ خو د کرونا او سختې نس ناستې پېښې د تېرې میاشتې پرتله کمې ښودل شوې دي.
له کاپیسا نه یو درمل پلورونکي افغانستان انټرنشنل ته په رالېږلي پیغام کې ویلي، چې طالبانو د درملو شرکت د فعالیت جواز لپاره ترې پیسې او درمل د بډې په توګه اخیستې دي؛ خو د هغه سربېره یې هم ورته د درملو شرکت تړلی دی.
د پاکستان د بشري حقونو کمېسیون (اېچ ار سي پي) د مذهبي ازادۍ په اړه په خپل اووم راپور کې ویلي، چې په دغه هېواد کې مذهبي لږکۍ له سخت تبعیض، جبري ودونو، سپکاوي او ناوړه ګټې اخیستنې سره مخ دي.
د جوزجان ولایت د خماب ولسوالۍ اوسېدونکي وايي، له پاخه سړکونو او برېښنا بېبرخې دي او د بنسټیزو اسانتیاوو له کمښت سره مخ دي. دغه اوسېدونکي زیاتوي، د خلکو یوه جدي ستونزه د سړکونو خرابوالی دی چې د دوی ورځنی ژوند یې له ګڼو ستونزو سره مخ کړی دی.
د افغانستان د فوټسال ملي لوبډلې د برازیل د شپږ اړخیزو سیالیو په لومړۍ لوبه کې له جاپان سره لوبه مساوي پای ته ورسوله او په دې توګه د یوه امتیاز په ترلاسه کولو سره نیمهپایلوبې ته له لار موندنې یوازې څو ګامه لرې ده.