په هلمند کې د یوه پخواني نظامي الله داد بادیزي کورنۍ افغانستان انټرنشنل ته وویل، چې طالبانو د هغه د جسد پاتې شونې تر شپږو میاشتو وروسته ورسپارلي دي. د یادې کورنۍ په وینا، طالبانو نوموړی له خپل یوه ملګري سره یوځای په ډزو وژلی و او جسدونه یې په شګو کې غورځولي وو.
ملي دیموکراتیک ګوند په خيبرپښتونخوا کې د بېړني حالت او والي واکمني د افغانستان او منځنۍ اسیا لور ته د نوې پوځي او استخباراتي لاسوهنې لپاره د یوې نوې «ممنوعه سیمې» او «تور سوري» جوړول بللي دي.
د طالبانو د اطلاعاتو او کلتور وزارت په افغانستان کې د بيبيسي د خپرونو ځنډول تاييد کړل او ویې ويل چې دا کار د «پرلهپسې سرغړونو» له امله شوی دی، خو دغه وزارت د سرغړونو جزئیات نه دي ویلي.
د افغانستان د سوداګرۍ او پانګونې خونې رییس سیدکریم هاشمي وایي، چې د امام ابوحنیفه په پنځم ملي او نړیوال نندارتون کې د «نږدې یو میلیارد ډالرو» په ارزښت سوداګریز تړونونه لاسلیک شوي او له یو میلیون زیاتو کسانو ترې لیدنه کړې ده.
په بامیان کې یوې امیندوارې مېرمنې د ولادت لپاره پر خره څلور ساعته مزل کړی دی. د بې پولې ډاکترانو روغتیايي سازمان ویلي، چې په بامیان کې د موټرو د نشتوالي له امله ډېر خلک روغتونونو ته پر خرو ځي او له ګڼو ستونزو سره مخ دي.
د پاکستان پولیسو ویلي چې د سې شنبې په ورځ د کراچۍ ښار د ګلشن حديد په بن قاسم سیمه کې د یوې کورنۍ پنځه غړي په یوه اپارتمان کې مړه موندل شوي دي.
پاکستان د پور اخیستونکو هېوادونو د ډلې، چې د «پور اخیستونکو هېوادونو پلاتفورم یادېږي، د حاکمې شورا مشر ټاکل شوی دی. د پاکستان د بهرنیو پورونو اندازه نږدې ۸۷ میلیارده امریکایي ډالرو ته رسېږي.
د طالبانو د بهرنیو چارو وزارت د تشریفاتو رییس عبدالباري عمر وایي چې بهرني فشارونه او بېځایه تورونه د افغانستان د خلکو اراده نه شي بدلولای. عمر ویلي، چې د کابل زغم باید د بېوسۍ په معنا تعبیر نه شي او د تفاهم لار لا هم پرانیستې ده.
د طالبانو د ریاستالوزرا اقتصادي مرستیال ملا عبدالغني برادر وايي، افغانستان چې د شین کوریزو ګازونو په خپرولو کې لږه ونډه لري؛ د اقلیمي بدلونونو له امله له سختو زیانونو سره مخ دی او باید نړۍوالو مالي او تخنیکي مرستو ته عادلانه لاسرسی ولري.
بيبيسي د یوې خبرپاڼې په خپرولو سره ویلي، چې طالبانو په ټول افغانستان کې د یادې نړۍوالې رسنۍ راډیويي خپرونې ځنډولې دي؛ خو دوی هڅه کوي له طالبانو سره د یادې ستونزې د حل لپاره خبرې وکړي.
په کندهار کې زدهکوونکي وايي، چې له نوي ښوونیز کال څه باندې یوه میاشت تېرېږي؛ خو طالبان لاهم د درسي کتابونو او ښوونکو د کمښت د حل پرځای د هغوی پر ظاهري بڼه، لباس، ږیره او پګړۍ زیات تمرکز کوي. دوی وايي، د زدهکړې بهیر ته هغومره پاملرنه نهکېږي لکه د دوی ظاهري بڼې ته.
په کونړ کې د طالبانو رسنیز دفتر خبر ورکړی، چې د ناروې کمېټې په همکارۍ او د افغانستان د بشري خدمتونو صندوق په مالي ملاتړ د کونړ ولایت د نورګل ولسوالۍ په ماماګل سیمه کې زلزله ځپلو کورنیو ته ۲۲۶ کورونه جوړ شوي دي.
په ننګرهار کې د طالبانو رسنیز دفتر ویلي، تېره شپه په پچیر اګام ولسوالۍ کې د سخت اورښت پرمهال پر یو کور تندر پرېوتی چې له امله یې دوه کسان ټپیان شوي دي. یاد دفتر زیاتوي، چې سپین غر، کوټ، هسکې مېنې او نورو ولسوالیو کې اورښتونو کرنیزې ځمکې او دولتي تاسیسات زیانمن کړي دي.
په هرات کې د طالبانو امنیه قوماندانۍ خبر ورکړی، چې د یادې ډلې امنیتي ځواکونو د ګذرې ولسوالۍ الانبیا ښارګوټي کې له یوه کوره د غلا پرمهال د یوه کس د وژنې په تور شپږ کسان نیولي دي.
د طالبانو د بهرنیو چارو وزیر امیرخان متقي ویلي، چې له نشهيي توکو سره د مبارزې اړوند نړۍوالې ټولنې له افغان بزګرانو سره د بدیل معیشت په برخه کې مرسته او لازم اقدامات نهدي ترسره کړي.
په هلمند کې د طالبانو سرحدي محمدي لوا قوماندان عبدالشکور بریالي د بهرامچې په سیمه کې پر ډیورنډ کرښه له پوستو لیدنه، څارنه او ارزونه کړې ده. په دغه سیمه کې ډېر مهال له پاکستان نه قاچاقي توکي راوړل کېږي او وخت ناوخت د طالبانو او پاکستاني ځواکونو ترمنځ نښتې هم کېږي.
د پاکستان د اوسپنې پټلۍ ادارې خبر ورکړی، چې په ملتان کې له پټلۍ د یوه مساپر وړونکي اورګاډي د اوښتو او چپه کېدو پېښه کې لږترلږه شپږ کسان مړه او تر ۳۰ ډېر ټپیان شوي دي. د یادې ادارې په وینا، د «رحمان بابا اېکسپرېس» مساپر وړونکی اورګاډی له کراچۍ نه د پېښور په لور روان و.
د ملګرو ملتونو د خوړو او کرنې سازمان (فایو) وايي، په افغانستان کې نوې کرنیزې لارې چارې او نوښتونو بزګرانو ته د اوبو د کمښت ستونزو سره د ښې ګټې اخیستنې فرصت برابر کړی او همداراز یې له هغوی سره د محصولاتو د ضایعاتو په کمولو او د عاید په زیاتولو کې مرسته کړې ده.
د افغانستان د سوداګرۍ او پانګونې خونې خبر ورکړی، چې قزاقستان ته د لسو افغان شرکتونو د سوداګریز پلاوي د سفر پرمهال د غنمو، اوړو او نورو کرنیزو محصولاتو د برابرولو په برخه کې د ۵۵ مېلیونه امریکایي ډالرو په ارزښت پنځه سوداګریز تړونونه لاسلیک شوي دي.
د یمني وسلهوالو د سیاسي دفتر غړي محمد البخیتي فرانس پرېس خبري اژانس سره په مرکه کې ویلي، که امریکا د یمن په جګړه کې ښکېله شي؛ نو د دوی له چټک او پرېکنده ځواب سره به مخ شي.
د طالبانو تر واک لاندې د پېښو پر وړاندې د چمتووالي ادارې د طبیعي پېښو د ګواښونو کمولو نړۍوالې ورځې په مناسبت ویلي، چې د روان کال له پیل راهیسې په افغانستان کې د طبیعي پېښو له امله ۶۷۹ کسان مړه او څه باندې ۱۶۳۴ نور ټپیان شوي دي.