د خیبرپښتونخوا خېبر ولسوالۍ د لنډي کوتل په تحصیل کې د خېبر تکیه سیمه کې د وسلهوالو کسانو د ډزو له امله د دوو کسانو د وژل کېدو وروسته سیمهییزو خلکو پراخ احتجاج کړی او تورخم لاره یې د هر ډول تګ راتګ لپاره تړلې ده.
متحده ایالاتو د پاکستان او چین هغه ګډ وړاندیز رد کړی چې غوښتل یې د بلوڅ ازادۍ غوښتونکې ډلې « بي ايل اې» او د «مجید بریګېډ» وسلهواله ډله د ملګرو ملتونو د ۱۲۶۷ د ترهګرۍ د بندیزونو په لېست کې شامله کړي.
یو فېسبوک کاروونکي فواد مومند ادعا کړې چې د ننګرهار کانال ریاست اړوند د پلان امریت د بست لپاره په اخیستل شوې ازموینه کې، سره له دې چې د ده په وینا ټولې پوښتنې یې سمې ځواب کړې وې، نه بریالی اعلان شو او نه هم د مرکې پړاو ته ور وبلل شو.
د افغانستان لپاره د روسیې د ولسمشر ځانګړي استازي ضمیر کابلوف ویلي، مسکو به د طالبانو تر واک لاندې افغانستان کې د شوروي دورې پوځي تجهیزات ترمیم او بېرته فعال کړي.
د طالبانو د سرحدي پولیسو پوځي مرستیال مولوي عبدالمنان حسان د بدخشان ولایت واخان ولسوالۍ ته د رسمي سفر پر مهال د سرحدي امنیتي پوستو او څارنیزو مرکزونو وضعیت ارزولی او د پامیر له اوسېدونکو سره یې لیدنې کړې دي.
د منځنۍ او سوېلي اسیا چارواکو د ازبکستان په تاشکند ښار کې د «ترمېز ډیالوګ» غونډه کې افغانستان د سیمهییزو سوداګریزو لارو او اتصال مهم مرکز وباله او ویې ویل چې د سیمې اقتصادي پرمختګ له افغانستان سره د اړیکو پراختیا پورې تړاو لري.
د ایران سپاه پاسداران ځواک ادعا کړې چې د امریکا د وروستیو پوځي عملیاتو په ځواب کې یې په کویټ او بحرین کې د امریکايي ځواکونو اډې او د استوګنې مرکزونه د توغندیو او بېپیلوټه الوتکو په بریدونو هدف ګرځولي دي.
د اوکراین د خرسون سیمې سیمهییزو چارواکو ویلي چې د روسیې په جلا جلا بریدونو کې لږ تر لږه پنځه کسان وژل شوي او اووه نور ټپیان دي.
د امريکا مرکزي قومندانۍ یا سنېټکام اعلان وکړ، چې ځواکونو یې د ايران څلور چاودېدونکي بېپيلوټه الوتکې چې د هرمز تنګي پر لور توغول شوې وې، په نښه او رانسکورې کړې دي.
د نجف په ښار کې د ایتالله محمد اسحاق فیاض مړینه د هغه شخصیت د ژوند د اوږدې لارې پای وو، چې د افغانستان له تر ټولو بېوزلو سیمو څخه پیل شوې وه او د شیعه نړۍ تر ټولو لوړو دیني او علمي مقامونو ته ورسېده.
ټرمپ له «اېنبيسي» سره مرکه کې ویلي، چې ایران لا هم له ۲۱ تر ۲۲ سلنې پورې خپل توغندي ساتلي دي. هغه وویل، چې د ایران مشران د جګړې د پایته رسولو لپاره له امریکا سره هوکړې ته نهدي رسېدلي، ځکه چې هغوی «قوي» او «مغرور» دي، خو «هغوی له هوکړې پرته بله لاره نهلري او دا به وخت ونیسي».
يوراکټيو چې د اروپايي ټولنې پر تګلارو تمرکز لرونکې اروپايي رسنۍ ده، بروکسل ته د طالبانو د بلنې په اړه نيوکه کړې او د دې ټولنې غړو ته يې ورياده کړې،چې د طالبانو د پوهنې وزير حبيبالله اغا په ۲۰۲۳کال کې د نجونو د زده کړو د مخنيوي او بشري حقونو سرغړونو له امله بنديزونو سره مخ شوی و.
د پاکستان په کراچۍ ښار کې د پاخه عمر یو کس، چې په یوه ویډیویي پیغام کې یې ویلي، خپله ښځه یې وژلې ځکه چې هغې ورسره له کوروالي کولو څخه انکار کړی وو. محکمې پولیسو ته امر کړی، چې دغه کس په توقیف کې وساتي.
د پاکستان د مهم اقتصادي ښار کراچۍ د ټرافیک پولیسو ويلي، د ۲۰۲۵ کال پرتله د ۲۰۲۶ کال په لومړیو پنځو میاشتو کې په ټرافیکي پېښو کې د خلکو د مړينې کچه راټيټه شوې، خو بيا هم د یادو پېښو له امله سلګونه کسان مړه شوي دي.
د خوړو نړیوال پروګرام (WFP) وایي، چې په منځني ختیځ کې روان کړکېچ او د سونتوکو د بیو لوړېدو افغانستان ته د بشري مرستو د رسولو موده له لسو ورځو څخه تر ۷۵ ورځو پورې غځولې او د لېږد لګښتونه یې هم تر پنځه برابره لوړ کړي دي.
د پاکستان تر ولکې لاندې د کشمیر حکومت ولسي ګډه کاري کمېټه یوه ناقانونه ډله اعلان کړې او د سیمې د ترهګرۍ پرضد قانون په لومړي جدول کې یې شامله کړې ده.
پاکستان د هند هغه څرګندونې، چې ګواکې د ګلګت بلتستان د ټاکنو په اړه «سخت احتجاج» شوی، رد کړې. هند له دې وړاندې د پاکستان تر ولکې لاندې ګلګت بلتستان کې هم ټاکنې ناقانونه بللې وې.
د روسیې ولسمشر ولادیمیر پوتین د اوکراین د ولسمشر ولادیمیر زیلېنسکي هغه وړاندیز رد کړی، چې د دواړو هېوادونو ترمنځ د جګړې د پای ته رسولو لپاره یې د مخامخ خبرو اترو غوښتنه کړې وه.
د افغانستان او هند د کرېکټ ملي لوبډلو ترمنځ خورا په زړه پورې او یوازنۍ ټېسټ لوبه سبا (شنبه د غبرګولي ۱۶مه) په نوي چندیګړ کې پیلېږي. د افغانستان کرېکټ بورډ اعلان کړی، چې افغان اتلان د دغې تاریخي او پنځه ورځنۍ لوبې لپاره بشپړ چمتووالی لري.
د امریکا یوې فدرالي محکمې د دغه هېواد د کډوالۍ او تابعیت ادارې هغه پرېکړه لغوه کړې، چې له مخې یې د افغانانو او نورو پناه غوښتونکو د دوسیو څېړنه تر نامعلوم وخت پورې ځنډولې وه. افغان اېواک بنسټ دا اقدام د افغان پناه غوښتونکو لپاره یو «بریالی» ګام وباله.
د خیبر پښتونخوا د اطلاعاتو وزیر شفیع جان ویلي، د پاکستان تحریک انصاف ګوند بنسټګر عمران خان له ۱۰۰۰ څخه زیاتې ورځې په زندان کې تېرې کړي او په وینا یې، پر هغه «ناحقه» دوسیې جوړې شوي او له ۷ میاشتو راهیسې په زندان کې په «انزوا» کې ساتل کېږي.