د افغانستان د کرېکټ ملي لوبډلې د بنګلهدېش پر وړاندې له پنځو ورځو سختې سیالۍ وروسته د صدیقالله اتل او رحمت شاه د غوره توپوهنې په مرسته لوبه مساوي کړه او له ماتې وژغورل شوه.
د افغانستان د اوبو، روغتیا او حفظ الصحې کلستر خپور شوي راپور کې راغلي، چې د ۲۰۲۶کال د سپټمبر په میاشت کې یې د ۲۶ موسسو په همکارۍ په ټول هېواد کې ۳۶۴زره او ۲۸۳ کسانو ته د اوبو، روغتیا او حفظالصحې بنسټیز خدمتونه وړاندې کړي دي.
د روغتیا نړۍوال سازمان ویلي، په افغانستان کې د مېندو او نویو زېږېدلو ماشومانو د مړینې ارزونې ښودلې چې لاهم د روغتیايي خدمتونو په کیفیت، د ناروغانو د لېږد سیستم او د خطرناکه روغتیايي وضعیت په مدیریت کې جدي نیمګړتیاوې شته.
د ایران په مشهد ښار کې د خپل ۲۲ کلن مېړه لهخوا د سختو وهلو ټکولو له امله د شریفې په نوم د یوې ۱۵ کلنې افغانې نجلۍ وژنې په خواله رسنیو کې پراخ غبرګونونه راپارولي دي. د خواله رسنیو کاروونکو د دغه ډول پېښو د عاملینو د حساب ورکولو غوښتنه کړې ده.
د کډوالۍ نړۍوال سازمان وايي، د ۲۰۲۶کال د سپټمبر له ۲۷مې د اکتوبر تر ۱۰مې پورې د ایران او پاکستان له لارو ۹۹زره او ۷۶۹ کسان افغانستان ته داخل شوي؛ په داسې حال کې چې په همدې موده کې ۳۹زره او ۵۴۰ کسان له افغانستان نه وتلي دي.
د خیبر پښتونخوا د سوات ولسوالۍ د سیدو شریف روغتون ادارې شپږ افغان ډاکټران له عملي طبي دورې منع کړي او هغوی ته یې امر کړی، چې سملاسي خپلې لیلیې خالي کړي او بېرته افغانستان ته ستانه شي.
د امریکا ولسمشر ډونالډ ټرمپ وايي، باور نه لري چې چین او روسیه له امریکا او اسراییل سره په جګړه کې له ایران سره مرسته کوي. خو د امریکا د استخباراتي ادارو د ارزونو له مخې، دغو دواړو هېوادونو ایران ته د سپوږمکۍ انځورونو او پوځي تجهیزاتو په ورکولو سره ملاتړ رسولی دی.
سعودي عربستان اعلان کړی چې د یمني یاغیانو د دوو کروز توغندیو د پاتې شونو د لوېدو له امله د ریاض په استوګنیزو سیمو کې څلور کسان ټپیان شوي او ۱۵ کورونه زیانمن شوي دي.
د امریکا مرکزي قوماندانۍ (سېنټکام) د ایران د سپاه پاسداران د سمندري ځواکونو د قوماندان هغه ادعا رد کړې چې ګواکې د هرمز تنګی د سپاه پاسداران تر کنټرول لاندې دی او هره امریکايي جنګي بېړۍ چې دغه تنګي ته نږدې شي، ډوبه به کړل شي.
د طالبانو ویاند ذبیحالله مجاهد وايي، دغه ډله هڅه کوي چې د پاکستان له لوري پر ډیورنډ کرښه د دروازو د تړل کېدو له امله رامنځته شوي سوداګریز زیانونه د بدیلو لارو او د منځنۍ اسیا له هېوادونو سره د سوداګرۍ د پراختیا له لارې جبران کړي.
د پاکستان ولسمشر اصف زرداري، دغه هېواد ته د روسیې د کورنیو چارو د وزیر د سفر پر مهال، ټینګار کړی، چې دواړه هېوادونه دې د جیوپولیټکي مسایلو په پام کې نیولو پرته، د همکارۍ پراختیا ته دوام ورکړي. روسي وزیر، د پاکستاني پولیسو او متخصصانو روزنې ته چمتووالی ښودلی.
واتیکان د سېشنبې په ورځ اعلان وکړ چې ډاکټرانو د نړۍ د کاتولیکانو د ۷۱ کلن مشر پاپ لېو د سږو سرطان تایید کړی دی. ډاکټرانو د ایټالیا د پلازمېنې روم په یوه روغتون کې د جراحۍ پر مهال د پاپ د ښي سږي لاندینۍ برخه لرې کړې ده.
په ملګرو ملتونو کې د افغانستان دایمي استازي نصیر احمد فایق د پخوانیو نظامیانو نیول، وژل کېدل او په بند کې ورکېدل بشري فاجعه بللې او د دغو پېښو د خپلواکې او شفافې څېړنې غوښتنه یې کړې ده.
د افغانستان پخواني مرستیال ولسمشر امرالله صالح په خپله یوه تازه لیکنه کې په پېښور کې د خپلې کډوالۍ دورې خاطرې شریکې کړې او ویلي یې دي چې د پښتونخوا له ولس او کلتور څخه یوازې ښې خاطرې لري او هېڅکله یې پېښور کې د پردیتوب احساس نه دی کړی.
اکسیوس راپور ورکړی چې د امریکا د جګړې وزیر پیټ هېګسېت او د دغه هېواد د مرکزي قوماندانۍ (سېنټکام) قوماندانان پر ایران د پراخو بریدونو د بیا پیل له جدي ملاتړو څخه دي؛ خو د ولسمشر ډونالډ ټرمپ ډېری سلاکاران غوره ګڼي چې پر تهران اقتصادي فشارونه دوام ومومي.
د بشري حقونو د څار سازمان د فرانسې له حکومت څخه غوښتي چې افغانستان ته د افغان پناه غوښتونکو د جبري ستنولو پلان ودروي او ټینګار یې کړی چې له طالبانو سره هر ډول جوړجاړی افغانان د شکنجې او ځورونې له جدي ګواښ سره مخ کوي.
د طالبانو مخالفې ډلې، زرغون بهیر په هرات کې د طالبانو پر یوې پوستې د برید د ویډیو له خپرولو سره، په دغه برید کې د درېیو طالبانو د وژلو ادعا کړې ده. یاد بهیر په برید کې د طالبانو د دغې پوستې د له منځه وړلو ادعا هم کړې. طالبانو تر دې مهاله د برید په اړه څه نه دي ویلي.
د پنجشېر طالب چارواکو اعلان کړی، چې څه باندې ۷ زره او ۲۳۰ قیراطه زمرد یې د شاوخوا ۷ میلیونه افغانیو په ارزښت په داوطلبۍ کې پلورلي. کارپوهان، د قیمتي ډبرو پر خام او ارزانه پلورلو له نیوکو سره وایي، که دا زمرد په هېواد دننه پروسس شي، ارزښت یې تر ۱۰ برابره لوړېږي.
د اوکراین ولسمشر ولادیمیر زېلنسکي اعلان کړی چې له روسیې سره د جګړې د پای ته رسولو په موخه یې د امریکا له استازو سټیو ویتکوف او جرد کوشنر سره په راتلونکو ورځو کې د نویو خبرو اترو وړاندیز کړی دی. واشنګټن په دې وروستیو کې هڅې ګړندۍ کړې دي څو مسکو او کییف بېرته د خبرو میز ته راولي.
د کډوالۍ نړیوال سازمان(اياوایم)وايي، له ۲۰۲۵ کال راهیسې یې په ټول افغانستان کې د طبیعي پېښو د ګواښونو کمولو لپاره ۱۱۲ پروژې پلې کړې دي.
د افغانستان د عدلیې پخواني وزیر فضل احمد معنوي، طالبانو سره د اسلامي همکاریو سازمان پر تعامل نیوکه کړې او خبرداری یې ورکړی، چې له دې ډلې سره په لیدنو کې باید د دغه سازمان نړیوال باور او ارزښتونه زیانمن نهشي.