د ایران د ملي امنیت شورا منشي ډاکټر محسن رضايي او د هند د ملي امنیت سلاکار اجیت دووال تیره ورځ د ټیلیفون پر لیکه د وروستیو سیمه ییزو او نړیوالو بدلونونو او د دواړو هېوادونو د ګډو ګټو په اړه غږېدلي دي.
د افغانستان لپاره د اسلامي همکارۍ سازمان د سرمنشي ځانګړي استازي طارق علي بخیت او د افغانستان لپاره د اروپايي ټولنې ځانګړي استازي توماس فرېلیسن په کابل کې د افغانستان د بشري وضعیت او وروستیو پرمختګونو په اړه خبرې کړې دي.
د جرمني په توتلینګن ښار کې د پولیسو په ډزو د یوه ۲۷ کلن افغان ځوان له وژل کېدو وروسته، لومړنیو څېړنو څرګنده کړې چې د هغه وسله اصلي تومانچه نه، بلکې د تشو مرمیو یوه تومانچه وه چې له اصلي وسلې سره یې ډېر ورته والی درلود.
د ایران د پارلمان د ملي امنیت کمېسیون غړي محمدمهدي شهریاري ویلي، چې ښايي د چابهار بندر د ځمکو یوه برخه د دوو یا پنځو کلونو لپاره افغانستان ته په اجاره ورکړل شي، څو خپل توکي ټرانزیټ کړي. خو ټینګار یې کړی چې د ایران د خاورې حاکمیت بل هېواد ته سپارل د منلو وړ نه دي.
په کابل کې د اذربایجان سفیر د طالبانو د اطلاعاتو او کلتور وزارت د هنر او کلتور له مرستیال عبدالرحمن طیبي سره په لیدنه کې نوموړي ته په باکو کې د کلتوري خبرو اترو په اووم نړیوال فورم کې د ګډون بلنه ورکړې ده. دواړو لوریو د کلتوري همکاریو او ګډو نندارتونونو په اړه هم خبرې کړې دي.
د جلالاباد د انګور باغ سیمې اوسېدونکو افغانستان انټرنشنل ته ویلي، له تېرو دوو ورځو راهيسې طالبانو په انګور باغ سیمه کې خلک په زوره له کورونو اېستلي او ځینو ته یې خبرداری ورکړی چې ژر تر ژره کورونه خالي کړي.
پاکستان او روسیې د سایبري جرمونو پر ضد د مبارزې، د پولیسو د روزنې او د امنیتي همکاریو پر پراختیا هوکړه کړې ده. دغه هوکړه د روسیې د کورنیو چارو وزیر ولادیمیر کولوکولتسیف او د پاکستان د کورنیو چارو وزیر محسن نقوي ترمنځ په یوې غونډه کې شوې ده.
د کډوالۍ نړۍوال سازمان د طبیعي پېښو د ګواښونو کمولو نړۍوالې ورځې په مناسبت، د طبیعي پېښو پر وړاندې د زیانمنونکو ټولنو د چمتووالي او مقاومت پیاوړتیا لپاره پر مخکېنیو تدابیرو او لومړنيو اقداماتو ټینګار کړی دی.
نن په کوټه او د بلوچستان په نورو ښارونو کې د محمودخان اڅکزي په لارښوونه، د پښتونخوا ملي عوامي ګوند او د اپوزېسیون ګوندونو د اېتلاف لهخوا په خیبر پښتونخوا کې د بېړني حالت او د والي واکمنۍ پرضد لاریونونه ترسره کېږي.
ازادۍ جبهې ادعا کړې، چې د لوګر ولایت په مرکز پل علم ښار کې یې د طالبانو پر استخباراتي ډلې برید کې درې طالبان وژلي او دوه نور ټپیان دي. د یادې جبهې په خبرپاڼه کې راغلي، برید د سېشنبې په ماښام د پل علم ښار په لومړۍ امنیتي حوزه کې د طالبانو امنیه قوماندانۍ ته نږدې شوی دی.
د پاکستان سرحدي ځواکونو د بلوچستان د کېچ ولسوالۍ د نودز په سیمه کې شپږ افغان کډوال نیولي او د نصیراباد سیمې پولیسو ته یې سپارلي دي. نیول شوي افغانان د قانوني پړاوونو بشپړولو لپاره پولیسو ته سپارل شوي دي.
د «ریچ» نوښت په خپل تازه راپور کې خبرداری ورکړی، چې د افغانستان په لوړو او غرنیو سیمو کې مېلیونونه کسان له سختو ژمنیو شرایطو سره مخ دي او د خوړو کمښت، د تودوخې لپاره د مناسبو سون توکو نشتوالي او روغتیايي خدمتونو ته محدود لاسرسي د خلکو لپاره جدي ننګونې رامنځته کړې دي.
د طالبانو د ټولګټو چارو وزارت خبر ورکړی، د کابل-جلالاباد لویه لار چې څو ځایه د ورښتونو او غر ښویېدنې له امله تړل شوې وه؛ د شپې په ٨ بجو بېرته د تګراتګ لپاره پرانیستل شوه. طالبانو پر دغه لار له تلونکو مساپرو او موټر چلوونکو غوښتي، چې له احتياط کار واخلي.
د غزې حکومت د رسنیو دفتر خبر ورکړی، چې د اکټوبر له لسمې نېټې د اوربند له پیل راهیسې پر غزې د اسراییل په بریدونو کې ۱۴۹۳ کسان وژل شوي او ۵زره او ۲۹۹ نور بیا ټپیان شوي دي.
د طالبانو د ټولګټو چارو وزارت خبر ورکړی، چې د اوسپنې پټلۍ ادارې د مشر عبدالکریم فاتح په مشرۍ یو تنخنیکي پلاوی د اقتصادي همکاریو سازمان (ایکو) په سیمهییزه ناسته کې د ګډون لپاره قزاقستان ته ولاړ.
د بلوچستان ایالت په بېلابېلو سیمو کې د هدفي وژنو، د مړو د موندلو او کورنیو شخړو په جلا، جلا پېښو کې لږ تر لږه ۱۳ کسان وژل شوي او ۱۷ نور ټپیان دي. یوازې په پنجګور ولسوالۍ کې د پنځو کسانو مړي موندل شوي دي.
په پروان کې د طالبانو د کرنې، اوبو لګولو او مالدارۍ ریاست وايي، په دغه ولایت کې د چرګانو د روزنې ۲۲۵ فارمونه فعالیت کوي. د دوی په خبره، په دغه فارمونو کې په هرو ۴۵ ورځو کې شاوخوا یو میلیون او ۲۶۰زره کیلوګرامه د چرګانو غوښه تولیدېږي.
د پاکستان د فدرالي تحقیقاتي ادارې د فساد ضد څانګې په پېښور کې څلور افغانان د پاکستاني پېژندپاڼو او پاسپورټونو د ناقانونه ترلاسه کولو په تور نیولي دي.
د افغانستان د کرېکټ ملي لوبډلې د بنګلهدېش پر وړاندې له پنځو ورځو سختې سیالۍ وروسته د صدیقالله اتل او رحمت شاه د غوره توپوهنې په مرسته لوبه مساوي کړه او له ماتې وژغورل شوه.
د افغانستان د اوبو، روغتیا او حفظ الصحې کلستر خپور شوي راپور کې راغلي، چې د ۲۰۲۶کال د سپټمبر په میاشت کې یې د ۲۶ موسسو په همکارۍ په ټول هېواد کې ۳۶۴زره او ۲۸۳ کسانو ته د اوبو، روغتیا او حفظالصحې بنسټیز خدمتونه وړاندې کړي دي.
د روغتیا نړۍوال سازمان ویلي، په افغانستان کې د مېندو او نویو زېږېدلو ماشومانو د مړینې ارزونې ښودلې چې لاهم د روغتیايي خدمتونو په کیفیت، د ناروغانو د لېږد سیستم او د خطرناکه روغتیايي وضعیت په مدیریت کې جدي نیمګړتیاوې شته.