د افغانستان د سوداګرۍ او پانګونې خونې خبر ورکړی، چې قزاقستان ته د لسو افغان شرکتونو د سوداګریز پلاوي د سفر پرمهال د غنمو، اوړو او نورو کرنیزو محصولاتو د برابرولو په برخه کې د ۵۵ مېلیونه امریکایي ډالرو په ارزښت پنځه سوداګریز تړونونه لاسلیک شوي دي.
د یمني وسلهوالو د سیاسي دفتر غړي محمد البخیتي فرانس پرېس خبري اژانس سره په مرکه کې ویلي، که امریکا د یمن په جګړه کې ښکېله شي؛ نو د دوی له چټک او پرېکنده ځواب سره به مخ شي.
د طالبانو تر واک لاندې د پېښو پر وړاندې د چمتووالي ادارې د طبیعي پېښو د ګواښونو کمولو نړۍوالې ورځې په مناسبت ویلي، چې د روان کال له پیل راهیسې په افغانستان کې د طبیعي پېښو له امله ۶۷۹ کسان مړه او څه باندې ۱۶۳۴ نور ټپیان شوي دي.
د خوړو نړۍوال پروګرام د سپټمبر میاشتې په راپور کې ویلي، چې د مالي سرچینو د کمښت له امله په افغانستان کې د خوارځواکۍ له هرو اوو اخته ښځو او ماشومانو له ډلې یوازې یو یې د درملنې امکانات لري. د یادې ادارې په وینا، د خوارځواکۍ درملنې لپاره اضافي بودجه یې بېړنۍ اړتیا ده.
د بلوچستان د کچي ولسوالۍ په اېن-۶۵ ملي لویه لاره په دوو جلا ترافیکي پېښو کې لږترلږه ۱۳ کسان مړه او تر ۲۰ ډېر ټپیان شوي دي. د پولیسو په وینا، لومړۍ پېښه د مچ په سیمه کې د دوو لاریو او یوه مساپر وړونکي موټر د ټکر له امله رامنځته شوې ده.
د طالبانو د اوبو او انرژۍ وزارت خبر ورکړی، چې د دغه وزارت لپاره د یادې ډلې وزیر محمد یونس اخوندزاده په مشرۍ مل پلاوي یې سعودي عربستان ته د خپل سفر په ترڅ کې د دغه هېواد د انرژۍ ۱۷م فورم له نړۍوال نندارتون لیدنه کړې ده.
د ملګرو ملتونو د کډوالو عالي کمېشنرۍ (UNHCR) په تازه راپور کې راغلي، د ۲۰۲۶کال له جنورۍ څخه د سپټمبر تر پایه ۱.۲۹ مېلیونه افغان کډوال بېرته افغانستان ته ستانه شوي چې له دې ډلې ۵۶۷زره او ۴۳۹ کسانو ته مرستې برابرې شوې دي.
د امریکا ولسمشر ډونالډ ټرمپ د اوهایو ایالت په ینګسټاون ښار کې د وینا پرمهال د ایران جګړې ته په اشارې ویلي، هېڅکله به ایران ته چې د ترهګرۍ تر ټولو لوی دولتي ملاتړی دی د اټومي وسلو د ترلاسه کولو اجازه ورنه کړي.
د روغتیا نړۍوال سازمان وایي، د ۲۰۲۶کال د اکټوبر تر ۱۱مې پورې په افغانستان کې د پولیو ۳۶ مثبتې پېښې ثبت شوې دي چې یوه تازه پېښه په وروستۍ اوونۍ کې د ننګرهار ولایت په سرهرود ولسوالۍ کې ثبت شوې او د ناروغۍ نښې یې د سپټمبر په ۵مه څرګندې شوې وې.
د ایران د بهرنیو چارو وزارت ویاند اسماعیل بقايي په چابهار بندر کې افغانستان ته د ځمکې د ځانګړې کولو په اړه د وروستیو جنجالونو په غبرګون کې ټینګار کړی، چې هیڅ هېواد ته به د ایران خاوره ونه سپارل شي او په دې اړه خپاره شوي برداشتونه د «ناسم پوهاوي» له امله دي.
د افغانستان د کرېکټ ملي لوبډلې د بنګلهدېش پر وړاندې د ټېسټ لوبې څلورمې ورځې تر پایه د درېیو لوبغاړو په سوځېدو ۱۳۲ منډې جوړې کړې او اوس د یادې لوبې د ګټلو لپاره په پنځمه ورځ ۳۴۷ نورو منډو ته اړتیا لري.
د جمهوریت پر مهال د دفاع وزارت سرپرست شاه محمود میاخېل وايي، د طالبانو د حاکمیت دوام او د هغوی د لرې کولو لپاره وسلهواله جګړه دواړه افغانستان د کورنیو او نیابتي جګړو له ګواښ سره مخ کوي. هغه د سیاسي بحران د حل لپاره د یوې ټولشموله لویې جرګې جوړول یوازینۍ عملي لار بولي.
د افغان نجونو د زدهکړو د بندیز ۱٬۸۵۰ ورځې پوره کېږي؛ ملګري ملتونه دا د میلیونونو نجونو د حقونو او د افغانستان د راتلونکي لپاره بحران بولي؛ خو د طالبانو په حکومت کې لا هم داسې نښې نه لیدل کېږي چې د نجونو ښوونځي به کله بېرته پرانیستل شي.
د پاکستان پوځ د عامه اړیکو څانګې ویلي چې د تلې په ۲۰مه نېټه، غرمه مهال د کوېټې ښار نوېن کلي ته نږدې د پوځ یوه روزنیزه الوتکه د تخنیکي خرابۍ له امله راغورځېدلې چې په کې سپاره دواړه پیلوټان وژل شوي دي.
د ایران د خراسان رضوي ولایت د سرحدي ځواکونو قوماندان وايي، له افغانستان سره د دغه ولایت پر ګډه پوله د روان کال په لومړیو شپږو میاشتو کې د تېر کال د ورته مودې په پرتله د صنعتي نشهيي توکو، په ځانګړې توګه د «شیشې» کشف څلور برابره زیات شوی دی.
د طالبانو د ټرانسپورټ او هوايي چلند وزارت د هواپوهنې ریاست د افغانستان په ۱۴ ولایتونو کې د سختو ورښتونو، تالندې او برېښنا، تېزو بادونو او سېلابونو د راوتلو اټکل کړی دی.
د پېښور مرستیال کمېشنر د پاکستان د جزايي اجراآتو قانون د ۱۴۴ مادې له مخې په ښار کې پر غونډو، لاریونونو او هر ډول اعتراضي فعالیتونو بندیز لګولی دی.
اروپايي ټولنې پر روسیې نوي بندیزونه تصویب کړي او ۶۰ هېوادونو ژمنه کړې چې په نړیوالو سمندري لارو کې د محصولاتو او فیسونو له اخیستو سره به مخالفت کوي. د اروپایي ټولنې د بهرنیو چارو وزیرانو په لبنان کې د نوي ملاتړ ماموریت د جوړولو پرېکړه هم کړې ده.
سعودي عربستان وايي، د دوشنبې په ورځ یو ځل بیا د توغندیو او بېپیلوټه الوتکو د بریدونو له ګواښ سره مخ شوی او د ریاض هوايي ډګر به تر بلې خبرتیا پورې تړلی پاتې شي. دا په داسې حال کې ده چې د شنبې په ورځ د دغه هوايي ډګر پر یوه ترمینل توغندیز برید وشو، چې یمني یاغیانو یې مسولیت منلی و.
د طالبانو یو شمېر تبلیغاتي فعالانو، د پنځو وژل شویو طالب جنګیالیو د پلار، مولوي ګل یمین د مړینې خبر ورکړی. د ۷ زامنو، دغه پلار ته له وژل شویو زامنو پنځه کونډې او ۲۴ یتیمان پاتې وو، چې د طالب چارواکو له مرستې او پاملرنې ګوښی او د بېوزلۍ ژوند یې ورسره تېراوه.
د نسلوژنې د ګواښونو د څار بنسټ «جنوسایډ واچ» وايي، افغانستان کې قومي او مذهبي لږکي او د پخواني حکومت کارکوونکي له ځورونې، تعقیب او وژنو سره مخ دي. دغه بنسټ د نسلوژنې د ګواښ پېژندلو په لس پړاوییز چوکاټ کې د دوی وضعیت د اتم پړاو، یعنې «ځورونې او تعقیب» په کټګورۍ کې ارزولی دی.