مقاومت جبهې نن سهار د بدخشان لپاره د طالبانو د استخباراتو د مرستیال او دوو ساتونکو د وژلو ادعا وکړه، خو د ورځې په اوږدو کې داعـ.ـش ډلې بیا ادعا وکړه، چې دا برید دوی کړی او پهکې د طالبانو د استخباراتو یو چارواکی له یوه ساتونکي سره یې ټپي شوی او یو ساتونکی یې وژل شوی دی.
د ایران د ولسمشر دفتر اعلان کړی چې د نفتو وزیر محسن پاکنژاد له خپلې دندې استعفا کړې او د دغه هېواد ولسمشر مسعود پزشکیان د هغه استعفا منلې ده.
د ملي نجات ګوند مشر ذبیح الله مجددي، په یوه مرکه کې افغانستان منزوی شوی ګڼلی او ویلي یې دي، چې د حل لپاره چمتو دي طالبانو ته مشورې ورکړي. هغه دا هم ویلي چې د متخصصینو یوه ډله یې جوړه کړې و خو اوسنۍ اداره سیاسي فعالیت نه زغمي چې له امله یې په رسمي کولو نه دی بریالی شوی.
په مصر کې د طالبانو سفارت وایي چې طالب سفیر د سویلي کوریا له سفیر سره په کتنه کې پر دوه اړخیزو اړیکو خبرې کړي دي. خپره شوې خبرپاڼه زیاتوي چې دواړو لورو د اړیکو د پیاوړتیا هیله څرګنده کړې ده.
د ملګرو ملتونو پراختیايي پروګرام وايي، په کندز کې د ماینونو او ناچاوده مهماتو د پاکولو او د دغو توکو د ګواښونو په اړه د خلکو د پوهاوي هڅې روانې دي. دا په داسې حال کې ده چې د روان کال له پیل راهیسې یوازې د افغانستان په ختیځ کې د ناچاوده مهماتو اړوند ۶۴ پېښې ثبت شوي دي.
د اوکراین ولسمشر ولادیمیر زېلېنسکي د یکشنبې په ورځ وویل، چې دی باور لري روسیې ښايي له شمالي کوریا سره د جېټډرونونو ټکنالوژي شریکه کړې وي.په وروستیو اونیو کې روسیې د اوکراین پر ضد د جېټډرونونو کارول زیات کړي دي. اوکراین د دغو ډرونونو د مخنیوي لپاره جنګي الوتکې کاروي.
د طالبانو د هرات ولایت صنعتي پارک چارواکي وايي، چې له دغه ولایت څخه د اسلام کلا بندر له لارې متحده عربي اماراتو ته د دوه میلیونه ډالرو په ارزښت بیټرۍ صادرې شوې دي. دوی وايي، هره اونۍ له هرات نه تر ۱۰۰ کانټینرو ډېر توکي بهر ته صادریږي.
د طالبانو د ازموینو ملي ادارې د راتلونکي ۱۴۰۶ لمریز کال لپاره د عمومي کانکور او دیني مدارسو د کانکور ازموینې د نوملیکنې لړۍ پیل کړه. دې ادارې ویلي، چې دغه بهیر به د روان ۱۴۰۵ کال د لیندۍ میاشتې تر ۳۰مې نېټې دوام ومومي.
د ترکیې پولیسو ویلي چې ۲۹ افغان پناهغوښتونکي یې نیولي دي. د پولیسو په وینا، دغو کسانو غوښتل چې د بالیکاسیر ولایت له ساحلي لارې په «غیرقانوني» ډول یونان ته ولاړ شي. په دغو کسانو کې پنځه نارینه، ۱۰ ښځې او ۱۴ ماشومان شامل دي.
د سعودي عربستان، ترکیې او پاکستان لوړپوړي چارواکي سبا د دوشنبې په ورځ په ریاض کې د سیمې د وروستیو پرمختګونو او د مکې دفاعي تړون د ایتلاف د اداري جوړښت په اړه ناسته کوي.
د روسیې د دفاع وزارت وايي، ځواکونو یې د اوکراین په پلازمېنه کییف کې د دنیپرو سیند شمالي پل او د تور سمندرګي په شمال لوېدیځ کې دوه باروړونکې بېړۍ ویشتلې دي. مسکو ادعا کوي چې دغو بېړیو اودېسا ته پوځي تجهیزات لېږدول.
د افغانستان لپاره د پاکستان ځانګړي استازي محمد صادق ویلي، چې په مسکو کې یې د افغانستان لپاره د ازبکستان له ځانګړي استازي عصمتالله ارګاشیف سره په لیدنه کې د افغانستان پر روان وضعیت او سیمهییزو بدلونونو خبرې کړې دي.
سیمهییزې سرچینې وايي، چې په بدخشان کې د فیضاباد ښار د پولیسو د پنځمې حوزې پخواني امر شاداب راغي، چې وړاندې د « نامشروع اړیکو» په تور نیول شوی و، یو ځل بیا په دغه ښار کې د پولیسو د دویمې حوزې د امر په توګه کار پیل کړی دی.
د طالبانو د بهرنیو چارو وزیر مولوي امیرخان متقي د مسکو فارمټ په اتمه غونډه کې د ګډون په موخه د روسیې پلازمېنې مسکو ته لاړ. د طالبانو د بهرنیو چارو وزارت وايي، چې متقي به دې غونډې ته وینا وکړي او د سیمې د هېوادونو له چارواکو سره به د افغانستان او سیمې د وضعیت په اړه خبرې وکړي.
د سعودي عربستان په ملاتړ د یمن ولسمشر رشاد العلیمي د ایران پلوه یاغیانو خلاف د لویو پوځي عملیاتو د پیل اعلان کړی او ویلي یې دي چې موخه یې د یادو یاغیانو تر کنټرول لاندې پاتې سیمو بېرته نیول او په ټول یمن کې د دولت د واک پراخول دي.
د پاکستان د بهرنیو چارو وزارت ویلي چې د افغانستان په اړه د مسکو فارمټ مشورتي غونډه کې به د اسلام اباد په استازیتوب د افغانستان لپاره د پاکستان ځانګړی استازی محمد صادق او په کابل کې د پاکستان شارژدافیر عبیدالرحمن نظاماني ګډون وکړي.
د طالبانو د کورنیو چارو وزارت خبر ورکړی چې د هلمند په مارجه ولسوالۍ او لښکرګاه ښار کې یې په درې مازدا موټرو کې له پاکستان څخه د درملو او سوداګریزو قاچاقي توکو د واردولو مخه نیولې ده. طالبانو د یادو قاچاقي توکو د واردلو په تور پنځه کسان هم نیولي دي.
په کابل کې د طالبانو باخبره سرچینو افغانستان انټرنشنل ته وویل، چې د طالبانو استخباراتو د دې ډلې د مرکچي پلاوي پخواني غړي عمار یاسر ته د هغه د وروستیو څرګندونو له امله توصیه کړې ده. سرچینې قطر ته د عمار یاسر تګ تاییدوي، خو وايي، له خپلې کورنۍ سره د لیدو لپاره تللی.
د هلمند د موسی کلا ولسوالۍ په خټکي سیمه کې ۲۸ کلن ځوان عبدالمنان د پور پر سر په یوه کورنۍ شخړه کې وژل شوی دی. سرچینې وايي، طالبانو د پېښې په تړاو څلور تنه نیولي دي.
د ملګرو ملتونو د سرمنشې مرستیالې رزماري ډیکارلو ویلي، چې افغانستان ته د سفر په ترڅ کې د طالبانو د بهرنیو چارو له وزیر امیرخان متقي سره یې د لیدنې پرمهال د دوحې پروسې، ښځو او نجونو د حقونو په اړه خبرې کړې دي.
د ایران د بهرنیو چارو وزارت ویاند اسماعیل بقايي وایي، چې په افغانستان کې د طالبانو ځینې وروستي اقدامات په جدي توګه څاري او دا موضوع یې له طالبانو سره مطرح کړې ده. بقايي ویلي، چې د شیعه وو د اړوندو مرکزونو د تړلو موضوع د تهران لپاره مهمه ده.