د ایران د بهرنیو چارو وزارت ویاند اسماعیل بقايي وایي، چې په افغانستان کې د طالبانو ځینې وروستي اقدامات په جدي توګه څاري او دا موضوع یې له طالبانو سره مطرح کړې ده. بقايي ویلي، چې د شیعه وو د اړوندو مرکزونو د تړلو موضوع د تهران لپاره مهمه ده.
د ایران د تهران په یوسف اباد سیمه کې یو۲۷ کلن افغان، چې د یوې ودانیزې پروژې ساتونکی و، د یوه بل ۱۸ کلن افغان له خوا وژل شوی دی. د تهران پولیس وايي، نیول شوي کس په لومړنیو څیړنو کې اعتراف کړی چې هغه یې په چاقو وژلی دی.
د طالبانو د مالیې وزارت د ګمرکونو ریاست خبر ورکړی، چې په دریو ګمرکونو کې یې د څه باندې ۳۹ میلیونه افغانیو په ارزښت پنځه نوي امنیتي سکېنرونه لګولي دي. یاد وزارت ویلي، چې دا ګام د مسافرو د توکو د لا ښې پلټنې په موخه اخیستل شوی دی.
د جرمني لومړی وزیر فریدریښ مېرڅ د اوکراین پلازمېنې کییف ته رسېدلی او هلته یې له ولسمشر ولادیمیر زیلینسکي سره لیدلي دي. مېرڅ له اوکراین سره په پوځي برخه کې یو میلیارد او د انرژۍ د تاسیساتو د بیا رغونې لپاره ۳۵۰ میلیونه یورو مرستې اعلان کړې.
د بدخشان په ځینو برخو کې د طالبانو د مخالفانو له بریدونو وروسته، د طالبانو والي وايي چې د دغه ولایت په هېڅ برخه کې امنیتي ګواښ نشته. رحمت الله نجیب ویلي، چې خلک دې د امنیت له پلوه ډاډه اوسي او هیڅوک د یادې ډلې پر وړاندې منفي حرکت نه شي کولی.
د طالبانو د کلیو د بیارغونې وزیر عبداللطیف منصور وايي، چې د بې ګناه افغانانو او پاکستاني وګړو وینه تویول حرام دي. نوموړي وویل، چې طالبان به هم غچ اخلي او هم د وینې تویېدو او جنازو مخنیوی کوي، ځکه دده په وینا، بې هدفه جګړې په اسلام کې ناروا دي.
د خیبر پښتونخوا ځایي قبایلو، سوداګرو او د ګمرک استازو د افغانستان او پاکستان ترمنځ د سوداګریزو لارو د نږدې یو کال بندښت او د خپلو ځمکو د غصب په اعتراض کې پراخ لاریون کړی او د ستونزو د هواري غوښتنه یې کړې ده.
د طالبانو د اطلاعاتو او فرهنګ وزارت په هلمند او نورستان کې شاوخوا ۱۵۰۰ زدهکوونکو ته د «فکري او اصلاحي» پروګرامونو ترڅنګ د کمپیوټر، ژبو، ژورنالیزم او ویناوالۍ زدهکړې برابروي؛ خو په همدې مهال نجونې له شپږم ټولګي پورته له رسمي زدهکړو او ورته ښوونیزو فرصتونو محرومې دي.
د یونیسف د معلوماتو له مخې، په افغانستان کې ګڼې کورنۍ خوندي اوبو ته لاسرسی نه لري او ماشومان د ککړو اوبو له امله د اوبو له لارې د خپرېدونکو ناروغیو له خطر سره مخ دي. دغه بنسټ وايي، د جنوبي کوریا په ملاتړ د خوندي اوبو د برابرولو لپاره خپلې هڅې روانې ساتي.
د پاکستان د کورنیو چارو وزیر محسن نقوي ادعا کوي چې د خیبر پښتونخوا حکومت له افغان او پاکستاني طالبانو سره د اړیکو نه لرلو او د ترهګرۍ د غندلو په اړه له خپلو ژمنو شاته شوی؛ نوموړي ویلي، هوکړه شوې وه، خو د پښتونخوا حکومت په وروستۍ شېبه کې له هوکړې وګرځېد.
د افغانستان د پخواني پارلمان غړې فوزیه کوفي ادعا کړې چې په پنجشېر او بدخشان ولایتونو کې د ملکي وګړو، د ماشومانو په ګډون، وژنې او خپلسرې نیونې روانې دي او له نړیوالو بشري حقونو بنسټونو یې غوښتي چې د دغو پېښو په اړه څېړنې او مستندات چمتو کړي.
ننګرهار کې د طالبانو امنیې قومندانۍ خبر ورکړی چې د دغه ولایت د بټي کوټ ولسوالۍ اړوند، څلورم فارم په سیمه کې د یوې ټرافیکي پیښې د رامنځته کېدو له امله درې تنه مړه شوي او درې نور ټپیان دي.
د طالبانو مخالفې مقاومت جبهې د یوې خبرپاڼې په خپرولو سره د بدخشان ولایت فیض اباد ښار د برید مسولیت منلی او ویلي یې دي چې په دغه برید کې یې د بدخشان د استخباراتو مرستیال او د هغه دوه ساتونکي وژلي دي.
سرچینو افغانستان انټرنشنل ته ویلي چې نن سهار د بدخشان د فیضاباد ښار په شپږمه ناحیه کې پر چاودېدونکو توکو بار موټرسایکل چاودلی او د طالبانو استخباراتي کارکوونکي یې هدف ګرځولي دي.
د جمهوري نظام پر مهال د چارو ادارې مشر فضلمحمود فضلي وايي، په افغانستان کې د پاکستان د بمبارۍ پر وړاندې د ملګرو ملتونو د مرستندویه پلاوي (یوناما) دریځ د اندېښنې وړ دی او ادعا کوي چې نړیوال ځواکونه یو ځل بیا افغانستان د پراخې کورنۍ جګړې پر لور بیایي.
د پاکستان د خیبر پښتونخوا په ډېرو ولسوالیو کې، چې واک یې د پاکستان تحریک انصاف په لاس کې دی، سیمهییزو چارواکو د پيټياېي د اسلاماباد پر لور د احتجاجي لاریون له اعلان سره هممهاله د ۱۴۴مې مادې له مخې د خلکو پر راټولېدو او د موټرو پر تګ راتګ بندیز لګولی دی.
د پاکستان د ملي اسمبلۍ د اپوزیسیون او د پښتونخوا ملي عوامي ګوند مشر محمود خان اڅکزي پر افغانستان د پاکستان د اړیکو د خرابېدو له امله نیوکه کړې او ویلي یې دي چې اسلاماباد له خپل ګاونډي هېواد سره خپلې اړیکې خرابوي.
د طالبانو د کورنیو چارو وزارت وایي، په هلمند کې یې له پاکستان نه د توکو د قاچاق په تور او کندز کې یې د نشه یې توکو د لیږد په تړاو ۱۳تنه نیولي او همداراز د ارزګان ولایت په چورې او خاص ارزګان ولسوالیو کې یې د نشهيي توکو د تولید یوه کارخونه موندلې او سوځولې ده.
د طالبانو تر واک لاندې د دولتي شرکتونو عمومي ریاست وایي چې د نفت او ګاز شرکت، د اوبلن ګاز پرچون پلور مرکزونو د پراخولو لپاره د ۴۰۰۰ بالونونو او اړوندو وسایلو د وېش او لېږد لړۍ پیل کړې ده.
د ملګرو ملتونو د خوړو او کرنې سازمان په یوه تازه ارزونه کې ویلي چې د پاکستان اوسنی کرنیز ـ خوراکي نظام د خلکو د سالمو خوړو اړتیاوې په بشپړه توګه نه شي پوره کولای او له ۶۰ سلنې ډېر پاکستانیان د سالم رژیم د برابرولو مالي توان نه لري.
د ملګرو ملتونو پراختیايي پروګرام وايي، په کندوز کې د خپلو همکارو ادارو په مرسته د چاودېدونکو توکو د ګواښونو د پاکولو او د دغو توکو د خطرونو په اړه د خلکو د پوهاوي لوړولو چارې روانې دي.