د متحدې جبهې په نوم د طالبانو یوې وسلهوالې مخالفې ډلې د هلمند په لښکرګاه کې د طالبانو پر دویمې امنیتي حوزې د لاسي بم د برید ادعا کړې ده. د ادعا له مخې، په دې برید کې یو طالب ټپي شوی دی. طالبانو لا تر اوسه د دغې ادعا په تړاو څه نهدي ویلي.
د خیبر پښتونخوا اعلی وزیر سهیل اپریدي اعلان کړی، چې د پاکستان تحریک انصاف ګوند د بنسټګر عمران خان د خوشې کېدو او د خپلو سیاسي غوښتنو لپاره د اوږد لاریون لومړی پړاو به نن (یکشنبه د تلې ۱۲مه) د لکي مروت ولسوالۍ له ګنډي چوک څخه پیل شي.
د اوکراین ولسمشر ولادیمیر زيلېنسکي له رویټرز خبري اژانس سره په مرکه کې ویلي، چې هېواد به یې د مسکو د هوايي بریدونو د نوې تګلارې په غبرګون کې د روسیې د تېلو پر چاڼځایونو بریدونه دوه برابره کړي.
د پاکستان مرکزي حکومت د عمران خان له ګوند او متحدینو غوښتي چې خپل سبانی لاریون (لانګ مارچ) لغوه کړي، خو د اپوزیسیون یوه مشر محمود خان اڅکزي ویلي، چې دا پرېکړه یوازې زنداني عمران خان کولای شي. له دې سره سم، د خیبرپښتونخوا اعلی وزیر ویلي، چې دغه لاریون به سبا پیل شي.
د خیبر پښتونخوا پولیسو او امنیتي ځواکونو په شمالي وزیرستان او پېښور کې په بېلابېلو عملیاتو او نښتو کې د ۱۰ وسلهوالو د وژلو ادعا کړې ده. له دې سره سم، د امینتي ګواښونو له امله د دېره اسماعیل خان ډوېژن په څلورو ولسوالیو کې ګرځبندیز هم اعلان شوی دی.
د بشري حقونو سازمان «حالوش» د شنبې په ورځ راپور ورکړی، چې د جمعې په ورځ د ایران د زاهدان ښار په شاوخوا کې د ناپېژاندو وسلهوالو په برید کې د فاطمیون ډلې د وژل شویو پنځو غړو له جملې یو یې افغان وو. حالوش د دغه کس نوم احمد یعقوبي یاد کړی دی.
د هند د کورنیو چارو وزارت اعلان کړی، چې ترکیې د نشهیي توکو د قاچاق د یوې نړیوالې شبکې یو هنديالاصله مهم مشر دغه هېواد ته سپارلی دی. نوپریت سینګ تورن دی، چې له افغانستان څخه یې هیرویین او شیشه قاچاق کول.
د کابل لپاره د طالبانو د والي دفتر وايي، د چهلستون د منار غره د وضعیت څېړلو او د احتمالي خطرونو د ارزونې په موخه په بېړنۍ کمېټې غونډه کې وویل شول، چې د یاد منار د ساحوي سروې او د اوسېدونکو د خوندیتوب په موخه عملي کارونه پیل شوي دي. د دغه منار په شاوخوا کې ۳۰۰ کورنۍ مېشتې دي.
سرچینو د شنبې په ورځ افغانستان انټرنشنل ته ویلي، د تبیان کلتوري او ټولنیز مرکز او د افغان غږ (اوا) خبري اژانس شپږ کارکوونکي، چې د تلې په دویمه په کابل کې د طالبانو له لوري نیول شوي وو، نن د لیکلي ژمنې له اخیستو وروسته خوشې شوي دي.
په خوست کې د طالبانو ولایتي ادارې د ناراض طالب قومندان جمعه خان فاتح په تړاو پر جوړې شوې تمثیلي ډرامې پښېماني وښوده. دغې ادارې د خپلې یوې مدرسې د مسوولینو ویډیو خپره کړې، چې پهکې له خلکو او په ځانګړي ډول له دري ژبو طالبانو څخه بښنه غوښتل شوې ده.
په مسکو کې د طالبانو سفیر ګل حسن حسن د «شمالي قفقاز د خبرو اترو، دودونو او پرمختګ لپاره فضا» تر سرلیک لاندې نړیوال فورم کې د وینا پر مهال د افغانستان او د سیمې د هېوادونو ترمنځ پر ګډ پرمختګ او خبرو اترو ټینګار کړی دی.
د پاکستان د خلکو ګوند مشر بلاول بوټو زرداري خبرداری ورکړی، که د خیبر پښتونخوا حکومت د ترهګرۍ په مخنیوي کې له مرکزي حکومت سره همکاري ونهکړي، نو د پاکستان د خلکو ګوند به په دغه ایالت کې له «بیړني حالت» یا د «والي واکمنۍ لګولو» په تړاو د مرکزي حکومت د پرېکړې ملاتړ وکړي.
د طالبانو د مالیې وزیر او یو شمېر نورو چارواکو په غزني کې د خپلو وژل شویو جنګیالیو کورنۍ وهڅولې، چې خپل یتیمان د دوی په مدرسو کې شامل کړي. څارونکي د طالبانو دا هڅې له بېوزلو یتیمانو ناوړه استفاده او د افراطیت د پراختیا خطرناک زنګ ګڼي.
د افغانستان د عدلیې پخواني وزیر فضل احمد معنوي ویلي، چې د طالبانو او پاکستان ترمنځ اوسنۍ نښتې او ژور اختلافات یوازې د تحریک طالبان پاکستان (ټيټيپي) پر مسئلې محدود نهدي، بلکې تر شا یې پېچلې تاریخي، اقتصادي او جیوپولیټیکي ریښې پرتې دي.
د طالبانو د دفاع وزارت د روسیې د «۲۰۲۶ سنټر» ستراتیژیکو ګډو پوځي تمریناتو کې د خپل یو لوړپوړي پلاوي د ګډون خبر ورکړی دی. طالبانو ویلي چې پلاوي یې د درنو وسلو، بېپیلوټه الوتکو او لیرې واټن ویشتونکو توغندیو له نندارتون څخه هم لیدنه کړې ده.
د طالبانو د بهرنیو چارو وزیر امیرخان متقي د ملګرو ملتونو د سرمنشې له مرستیالې رزماري ډیکارلو سره په لیدنه کې د پاکستان د هوایي بریدونو له امله ملکي وګړو ته مرګژوبلې اوښتو په اړه خپلې اندیښنې شریکړې کړې دي.
د طالبانو مخالفې ډلې، مقاومت جبهې ویلي چې د شنبې په ماښام یې د بدخشان د کران و منجان ولسوالۍ د انجمن په سیمه کې د طالبانو پر یوه نظامي مرکز برید کړی دي. یادې جبهې ویلي چې د طالبانو د سرحدي ځواکونو پر ټولۍ د برید په پایله کې ۳ طالبان وژل شوي او دوه نور ټپیان دي.
د افغانستان د سوداګرۍ او پانګونې خونې ویلي چې د سید کریم هاشمي په مشرۍ پلاوی د ترکمنستان د سوداګرۍ او صنایعو خونې له مشر سره د لیدنې پرمهال د دواړو هېوادونو ترمنځ پر اقتصادي همکاریو او د ټرانزېټي لارو پر پراختیا غږېدلی دی.
د اریانا افغان هوايي شرکت خبر ورکړی چې د کارګو خدماتو د پراختیا او د سوداګرو د ملاتړ په موخه یې د کابل او ډیلي ترمنځ ټیټې بیې اعلان کړې دي. یاد شرکت د هرې کیلو بار د انتقال فیس ۱،۴۰ ډالره اعلان کړی دی.
د طالبانو د بلخ والي یوسف وفا د دغه ولایت پخواني طالب دلګيمشرانو او جنګي قومندانان سره په ناسته کې په شمالي ولایتونو کې د احتمالي ګواښونو د مخنیوي پر وړاندې د چمتووالي امر کړی دي. یوسف وفا ټینګار کړی چې د هر ډول امنیتي تحولاتو پر وړاندې باید سخت او غوڅ اقدام ترسره شي.
د هند کرېکټ ملي لوبډلې د ۲۰۲۶ کال اسیايي لوبو د کرېکټ لوبو په پایلوبه کې پاکستان ته د ۱۹ منډو په توپیر ماتې ورکړه او د سروزو مډال یې وګاټه.