د پاکستان د خلکو ګوند مشر بلاول بوټو زرداري خبرداری ورکړی، که د خیبر پښتونخوا حکومت د ترهګرۍ په مخنیوي کې له مرکزي حکومت سره همکاري ونهکړي، نو د پاکستان د خلکو ګوند به په دغه ایالت کې له «بیړني حالت» یا د «والي واکمنۍ لګولو» په تړاو د مرکزي حکومت د پرېکړې ملاتړ وکړي.
د پاکستان د خلکو ګوند مشر بلاول بوټو زرداري د شنبې په ورځ (د تلې ۱۱مه) په کراچۍ کې یوې غونډې ته د وینا پر مهال وویل، چې مرکزي حکومت په خیبر پښتونخوا کې د بیړني حالت یا والي واکمنۍ لګولو اراده درلوده، خو د پاکستان د خلکو ګوند سپارښتنه کړې، چې له دغه ډول قانوني پرېکړې مخکې باید له تحریک انصاف ګوند سره د خبرو اترو له لارې شته مسایل حل شي.
نوموړي وویل، په خیبر پښتونخوا کې هره ورځ د ترهګرۍ پېښې کېږي او همداراز یې ادعا وکړه، چې له افغانستان څخه هم بریدونه ترسره کېږي او په باور یې هند هم په دې بریدونو کې لاس لري.
تر دې مخکې طالبانو او هند دواړو په وار وار د پاکستان دغه ډول ادعاوې رد کړې دي.
بلاول بوټو زرداري وايي: «که خیبر پښتونخوا ناروغه شي سند لړزېږي. که هلته د ترهګرۍ مخه ونهنیول شي اغېزې به یې پر ټول هېواد پرېوځي، نو ځکه باید ټول په ګډه د ترهګرۍ مقابلې ته ودرېږو».
د پاکستان د خلکو ګوند مشر زیاته کړه، چې د تحریک انصاف ګوند د اوږد لاریون د اعلان له امله لس ورځې کېږي اسلاماباد تړل شوی دی.
هغه له تحریک انصاف ګوند څخه غوښتنه وکړه، چې له اوږد لاریون پیلولو لاس واخلي او د ترهګرۍ د لهمنځه وړلو لپاره له مرکزي حکومت سره یوې هوکړې ته ورسیږي.
بلاول زیاته کړه، چې والي واکمنۍ او بیړنی حالت قانوني اختیارونه دي چې د اړتیا پر مهال کارول کېدای شي، خو له دې سختو ګامونو وړاندې سیاسي ګوندونه باید هڅه وکړي چې دا شخړه د خبرو اترو له لارې هواره کړي.
دا په داسې حال کې ده، چې د عمران خان په مشرۍ د تحریک انصاف ګوند اعلان کړی، چې اوږد لاریون به یې سر له سبا له لکي مروت ولسوالۍ څخه پیل شي او همداراز به په ټول پاکستان کې ترسره شي.
