د ایران د ملي امنیت کمېسیون غړي محمود نبویان ویلي، چې ټرمپ له مذاکرې مخکې د یوه هېواد له لارې پیغام رالېږلی و، چې «اجازه راکړئ په ایران کې دوه ځایونه په نښه کړو». د هغه په وینا، دوی ورته ویلي: «وخت تېر شوی، که مو کومه تېروتنه وکړه موږ به ستاسو له ۳ څخه تر ۴زرو پورې کسان ووژنو».
یو امریکایي چارواکي د اسراییل ۱۳ چینل ته ویلي، چې بنیامین نتنیاهو غوښتنه کړې وه، چې له ډونالډ ټرمپ سره د هغه ټاکل شوې لیدنه یوه اوونۍ مخکې ترسره شي. نتنیاهو پلان درلود، چې د سلواغې په ۲۹مه په سپینه ماڼۍ کې له ډونالډ ټرمپ سره وګوري، خو اوس د دې کتنې وخت بدل شوی دی.
د ایران د بشري حقونو سازمان وایي چې ددغه هېواد حکومت د یو افغان په ګډون ۵ کسان د کرج ښار په قزلحصار زندان کې اعدام کړي دي.
په اسراییل کې د امریکا سفیر مایک هاکبي وايي، که څه هم واشنګټن د یوې هوکړې غوښتونکی دی، خو پر دې جدي شک لري چې ایران به خپلو ژمنو، په ځانګړي ډول د اټومي او توغندیزو پروګرامونو په برخه کې، پابند پاتې شي.
د طالبانو د کورنیو چارو وزارت ویلي، چې د ترافیکو پولیسو د عمومي ریاست منسوبینو ته د ښارونو په کچه د ترافیکي نظم پیاوړتیا او د خدماتو د ښه کېدو په موخه یو شمېر نوې او عصري موټرې وړکړې دي.
د طالبانو د بهرنیو چارو وزارت خبر ورکړی چې د اذربایجان له پلازمېنې باکو څخه ۱۴ تنه افغان بندیان خوشې شوي دي. وزارت همدا راز ویلي چې د دغه بندیانو دوسیې به په افغانستان کې تعقیب کړي.
د طالبانو د عامې روغتیا وزارت ویلي، د دغه وزارت د درملو او روغتیایي محصولاتو د تنظیم ریس، نعیم الله ایوبي، ترکیې ته په رسمي سفر تللی دی. طالبان وایي، ددغه سفر موخه د روغتیاري همکاریو پياوړي کول دي.
د طالبانو د کرنې، اوبو لګولو او مالدارۍ وزارت وايي، چې د بېوزلو کورنیو د معیشت د پیاوړتیا او د سیمهییز اقتصاد د ودې په موخه، د ارزګان ولایت مرکز ترینکوټ او د دې ولایت د خاص ارزګان ولسوالۍ کې ۲۵۱ مستحقو کورنیو ته د مالدارۍ مرستې وېشل شوې دي.
د طالبانو د کابل امنیه قومندانۍ وايي، د ښار د پنځمې امنیتي حوزې پولیسو ۱۱ کسیزه ډله نیولې، چې په بېلابېلو سیمو کې یې د بایسکلونو او موټرسایکلونو غلاوې کولې.طالبان وایي چې یاده ډله یې د غلا شویو توکو سره نیولې ده.
په کونړ ولایت کې د طالبانو تر چتر لاندې پېښو سره د مبارزې او امادګۍ ریاست د ډنمارک د کډوالو شورا (DRC) په همکارۍ د نورګل ولسوالۍ ۷۵۰ زلزله ځپلو کورنیو ته سولري کټونه ویشلي.
د اوکراین دولتي برېښنا اداره وايي، چې روسیې د هېواد د انرژۍ بنسټونه په یوه ستر برید کې په نښه کړي، چې له امله یې په ډېرو سیمو کې برښنا قطعي شوې او سلګونه زره خلک د ژمي په سړه هوا کې بې برښنا پاتې دي.
د طالبانو د کرنې او مالدارۍ وزارت وایي، سږ کال په ټول هېواد کې له ۱۰۴ زره هکتاره ځمکې څخه ۱۵۸ زره او ۲۰۵ متریک ټنه پنبه ترلاسه شوې ده. تر ټولو زیات حاصلات په هلمند، بلخ، جوزجان او کندهار ولایتونو کې ثبت شوي دي.
په ملګرو ملتونو کې د امریکا استازي مایک والټز ویلي، متحده ایالات به په راتلونکو څو اوونیو کې د ملګرو ملتونو د عادي بودیجې او سولهییزو ماموریتونو پاتې پیسې ورکړي. هغه ټینګار کړی چې دا تادیه د پورونو د کمولو او د سازمان د اصلاحاتو د ملاتړ یوه مهمه نښه ده.
هندي چارواکو ویلي، چې ددغه هیواد د شمال ختیځ په جاینتا هیلز سیمه کې د ډبرو سکرو په یوه کان کې د چاودنې له امله لږ تر لږه ۱۸ کسان وژل شوي او ۸ نور ټپیان شوي دي. پولیسو د ژغورنې او پلټنې عملیات پیل کړي دي.
د امریکا پوځ په ارام سمندر کې پر یوې کښتۍ برید کړی، چې له امله یې دوه کسه وژل شوي. د امریکا سوېلي قوماندې (سېنټکام) پرون پنجشنبه ویلي، چې په دغه برید کې «د نشهیي توکو قاچاقکوونکي» وژل شوي دي.
ايراني رسنيو راپور ورکړی، چې د ایران او امريکا ترمنځ خبرې اترې د عمان په پلازمېنه مسقط کې څو شېبې وړاندې پيل شوې. د راپورونو له مخې؛ د ایران د مذاکره کوونکي پلاوي مشري عباس عراقچي کوي او د امريکا په پلاوي کې سټيو وېټکاف او جرد کوشنر شامل دي.
په ننګرهار کې د طالبانو د امنیې قوماندانۍ ویاند سید طیب حماد ویلي، چې د دغه ولایت په مهمندرې ولسوالۍ کې د یوې ټرافیکي پېښې له امله یو کس مړ او درې نور ټپیان شوي دي. د هغه په وینا؛ یاده پېښه د «غزکي کولالي» په سیمه کې شوې ده.
د طالبانو تر کنټرول لاندې د جلالاباد ښاروالۍ د تخنیکي او سکتوري چارو رییس وحیدالله مخلص ویلي، د دغه ښار په مرکز کې د نوي ښار د جوړولو لپاره شاوخوا ۸۰زره جریبه ځمکه ځانګړې شوې. د هغه په وینا؛ د نوې طرحې له مخې به په نږدې راتلونکي کې يوشمېر ادارې له ښارونو نورو سيمو ته ولېږول شي.
په روسیه کې د طالبانو سفارت خبر ورکړی، چې ګل حسن حسن په مسکو کې د چین له سفیر ژانګ هانهويي سره په لیدنه کې د افغانستان او چین ترمنځ پر سیاسي او اقتصادي همکاریو خبرې کړې دي. د دغه سفارت په وینا؛ په یاده لیدنه کې د سیمې د امنیت پیاوړتیا په برخه کې پر ګډې مبارزې ټینګار شوی.
په مسقط کې د امریکا سره د خبرو اترو له پیل څخه شاوخوا یو ساعت مخکې د ایران د بهرنیو چارو وزیر عباس عراقچي ویلي، چې تهران به د تېر کال پېښو له هېرولو پرته مذاکراتو ته کېني.
د ازادۍ جبهې په نوم د طالبانو وسلهوالې مخالفې ډلې د یوې ویډیو په خپرولو ادعا کړې، چې تېره شپه یې د کندوز ښار په ازادۍ څلور لارې کې د طالبانو د تالاشۍ پر یوې پوستې برید کړی. یادې جبهې زیاته کړې، چې په دغه برید کې دوه طالبان وژل شوي او ۳ نور بیا ټپيان دي.
په نیمروز کې د طالبانو د فرعي ګمرکاتو ریاست وایي، چې د دغه ولایت په زرنج ښار کې د انساني درملو د قاچاق مخه نیول شوې ده. د یاد ریاست په وینا؛ د زرنج ښار په درېیمې امنیتي حوزه کې په ۸ موټرو کې ځای پرځای شوي ۷ټنه او ۳۲ کیلوګرامه درمل او د ۸۵۶ کیلوګرامه توکو د قاچاق مخه نیول شوې.