وروستی لنډ خبر

د طالبانو تر واک لاندې ملي تلویزون خبر ورکړی، چې د اقتصادي کمېسیون د تخنیکي کمېټې يه نوبتي غونډه کې د برېښنا تولید، د فراه ولایت د میل ۷۸ بندر د تاسیساتو پراختیا، او یو شمېر نورو مهمو تخنیکي مسایلو په اړه بحث شوی دی.

رویټرز خبري اژانس د اوکرایني چارواکو له قوله ویلي، چې د سې شنبې په ماښام د روسیې بې‌ پیلوټه الوتکو د اوکراین په دوو لویو ښارونو، خارکیف او دنیپرو، بریدونه کړي دي. په دغو بریدونو کې لږ تر لږه یو تن وژل شوی او ۴۶ نور ټپیان شوي دي.

د پاکستان دولتي ټلویزیون د یو راپور په خپرولو سره ویلي، چې بېګا شپه د هند تر ولکې لاندې کشمیر په اسمان کې د دغه هېواد څلور جنګي الوتکې ګرځېدې راکرځېدې.

د کشمیر له کړکېچ وروسته د پاکستان د کورنیو چارو وزیر او د دغه هېواد د کرېکټ بورډ مشر محسن نقوي ویلي، چې د پاکستان کرېکټ ملي لوبډله به په هیڅ صورت کې هند ته سفر ونه کړي.

د سوېلي کوریا قانون جوړونکو د استخباراتي چارواکو په حواله ویلي، چې د اوکراین په جګړه کې د شمالي کوریا شاوخوا ۶۰۰ پوځيان وژل شوي دي.

د طالبانو د امر بالمعروف، نهې عن المنکر او شکایتونو اورېدلو وزارت وایي، چې محتسبانو یې تېر ۱۴۰۳ کال کې د افغانستان په بېلابېلو ولایتونو کې ۹۵۳ کوډګر نیولي دي.

د هند او پاکستان تر منځ د کړکېچ له زیاتېدو وروسته، د امریکا د بهرنیو چارو وزارت ویاندې ټامي بروس خبرداری ورکړ، چې د دواړو اټومي هېوادونو ترمنځ شخړه به ډېر ژر له کنټروله ووځي.

د هند انډیا ایکسپریس رسنۍ وايي، چې د پهلګام له ترهګریز برید وروسته، د هند او پاکستان ترمنځ سخته ډیپلوماتیکه سیالي پیل شوې، چې دواړه هېوادونه هڅه کوي نړۍوال ملاتړ تر لاسه کړي.

د هندي رسنۍ انډین ایکسپریس د خبر له مخې، تېر ماښام د دغه هیواد د کلکتې ښار د بورا بازار سیمه کې د ریتوراج په نوم هوټل کې اور لګېدو ۱۴ کسان مړه کړي. پولیسو رسنیو ته ویلي، چې د دغه اور لامل لا نه دی څرګند او په دې برخه کې څېړنې روانې دي.

د پاکستان لومړی وزیر شهباز شریف وایي، چې هېواد یې سولې ته ژمن دی؛ خو که پر وړاندې یې هر ډول ګام واخیستل شي، نو په بشپړ ځواک سره به د خپل حاکمیت دفاع وکړي. نوموړي دغه څرګندونې د ملګرو ملتونو له سرمنشي انتونيو ګوترېش سره په ټیلیفون کړې دي.

د ملګرو ملتونو سرمنشي انتونیو ګوټریش وایي، لږ تر لږه له دوو میاشتو راهیسې اسراییل غزې تړانګې ته د خوړو، سون توکو، درملو او سوداګریزو توکو د داخلېدو مخه نیولې ده.

د متحده ایالاتو د دفاع وزیر پیټ هېګسټ د ښځو، سولې او امنیت قانون لغوه کړ. دغه قانون په ۲۰۱۷ کې د ډونالډ ټرمپ له‌خوا د متحده ایالاتو په امنیتي خدمتونو کې د ښځو د رول زیاتولو لپاره لاسلیک شوی و.

د پاکستان د لومړي وزیر مرستیال او د بهرنیو چارو وزیر اسحاق ډار وايي چې هند نه شي کولای د اندوس د اوبو تړون په یو اړخیز ډول لغوه کړي. نوموړی زیاتوي، چین، ترکيه او نړۍواله ټولنه د پاکستان ترڅنګ ولاړه ده.

د ټرمپ د دویمې دورې د لومړیو ۱۰۰ ورځو په ترڅ کې د امریکا د ونډو بازار اته سلنه تاوان کړی. فینانشیل ټایمز وايي، چې دا له تېرو ۵۰ کلونو راهیسې د یوې ادارې تر ټولو خراب پیل ګڼل کیږي.

فرانسې د سې شنبې په ورځ په لومړي ځل په ښکاره توګه د روسیې د پوځ اړوند استخباراتي اداره تورنه کړه، چې ددغه هېواد پر وزارتونو او دفاعي شرکتونو یې سایبري بریدونه کړي دي.

د لبنان دولتي سرچینو د سې شنبې په ورځ خبر ورکړ، چې د دغه هېواد پوځ د حزب‌الله ډلې له خوا کارېدونکي له ۵۰۰زیات مرکزونه، چې په جنوبي او شمالي سیمو او د بیروت په جنوبي ضاحیه سیمه کې موقعیت لري، تر خپل پوځي کنټرول لاندې راوستي دي.

د طالبانو د اطلاعاتو او فرهنګ وزارت د رسنیزو سرغړونو د څیړلو کمیسیون په کابل کې د راه فردا ټلویزیون خپرنې ځنډولې دي. یاد وزارت وايي، چې د دغه ټلویزیون خپرونې یې له دې امله ځنډولې دي، چې کارکوونکو ته یې معاشونه نه دي ور کړي.

د چین د لېاونینګ ولایت په لياويانګ ښار کې په یوه رستورانت کې د سې شنبې په ورځ اور ولګید، چې له امله یې ۲۲ کسان مړه شول.