د کاناډا لومړی وزیر د اتلس کلن شریک ژوند وروسته له خپلې مېرمنې جدا شو
د کاناډا د لومړي وزیر دفتر د چهارشنبې په ورځ اعلان وکړ چې جسټن ټروډو او د هغه مېرمن سوفي ګریګور له اتلس کاله شریک ژوند څخه وروسته جدا شوي دي.
د کاناډا د لومړي وزیر دفتر د چهارشنبې په ورځ اعلان وکړ چې جسټن ټروډو او د هغه مېرمن سوفي ګریګور له اتلس کاله شریک ژوند څخه وروسته جدا شوي دي.
۵۱ کلن ټروډو او ۴۸ کلنه سوفي په ۲۰۰۵ کې سره واده کړی او درې ماشومان لري.
د کاناډا د لومړي وزیر دفتر ویلي چې دوی د طلاق قانوني سندونه لاسلیک کړي دي.
ښاغلي ټروډو په خپل انسټاګرام اکاونټ کې په یوه پیغام کې لیکلي: "سوفي او ما له معنادارو او سختو خبرو وروسته پریکړه وکړه چې له یو بله جدا شو."
نوموړي سوفي ګریګور ته په اشارې وویل چې دوی به د یوه فامیل په څېر ژوند کوي او د دوی تر منځ به د دوستۍ ژورې اړیکې او درناوی موجود وي.
ګریګور له ټروډو سره له واده وړاندې د کاناډا په فرانسوي ژبي ولایت کبک کې د یوه تلویزون خبریاله وه خو د ټروډو پر سیاسي ژوند یې ځانګړی اغېز لاره.
وروسته له هغه چې ټروډو لومړی وزیر شو، سوفي د هغه د رواني روغتیا په ګډون په ټولنیزو مسالو کار کاوه.
هغه افغان پیلوټ چې روانډا ته یې د اخراج ګواښ شوی، مېرمن یې د برتانیا له حکومته د خپلې کورنۍ لپاره د پناه غوښتنه کړې ده. هغې د برتانیا له حکومته احساساتي غوښتنه کړې چې کورنۍ ته یې په برتانیا کې پناه ورکړي.
دغه مېرمن چې اوس د افغانستان په یوه نامعلوم ځای کې ده وايي؛ چې کورنۍ یې له برتانویانو سره د خپل مېړه د کار کولو له امله درنه بیه پرې کوي او د مرستې په تمه یې ژوند توره تیاره دی.
افغان پیلوټ د طالبانو تر واکمنۍ وروسته، خپله ځوانه کورنۍ په وطن کې پرښوده او په یوه وړه کښتۍ کې یې خپل سفر برتانیا ته پیل او ځان یې تر منزله ورساوه.
مګر برتانیا ته په رسیدو سره د افغان هوایي ځواک دغه چارواکي هغه مرسته ترلاسه نه کړه چې تمه یې کیده او پرځای یې د کورنیو چارو وزارت لخوا روانډا ته د لېږلو له ګواښ سره مخامخ شو.
د پیلوټ مېرمنه د برتانیا د لومړي وزیر ریشي سونګ د حکومت لخوا د مرستې نشتوالي له امله نا هیلې ده. هغې د برتانیا حکومت په دې تورن کړ چې د کورنۍ لپاره یې د خوندي ځای چمتو کولو کې پاتې راغلی.
هغې ریشي سونګ ته په اشارې وویل: «دا څرګنده ده چې ستاسو دنده څه وه او له دوی سره مو څنګه مرسته وکړه؟ ستاسو حکومت احسان هېروونکی او بې اعتباره دی».
د افغان پیلوټ میرمنې انډېپېنډنټ نیوز ته وویل:«نړۍ راته توره تیاره ده، نه پوهیږم څه وکړم؟ زه نوره لیونۍ کیږم، د طالبانو له ویرې موږ له کوره نشو وتلی، ورځې او شپې مو په ویره کې تېریږي».
هغې زیاته کړه: «د برتانیا حکومت یې د کورنۍ لپاره د خوندي ځای په چمتو کولو کې پاتې راغلی. باور وکړئ زه واقعا له دې حالته ستړې یم، دا معلومه ده چې د هغه ځای حکومت نه غواړي له موږ سره مرسته وکړي».
د کابل له سقوط څو میاشتې وروسته کله چې افغان پیلوټ له افغانستان د وتلو ستونزمنه پرېکړه وکړه؛ چې خپله کورنۍ پریږدي او د خوندي ځای موندلو لپاره ولاړ شي. د تګ پر وخت یې میرمنې ورته وویل: « ولاړ شه په خدای مې سپارلی یې».
مګر نن یې میرمن وایي: «کاشکې چې د راتلونکي وړاندوینه مې کولی شوی او په دې پوهېدی چې څه پېښېږي، ما به هېڅکله هغه ته د تګ اجازه نه وی ورکړې».
د هغې خاوند په برتانیا کې د افغان کډوالو او مرستې د پالیسۍ (Arap) له مخې د پناه اخیستو غوښتنه کړې وه.
دغه پالیسي د هغو کسانو لپاره ده چې د جګړې پر مهال یې له برتانوي ځواکونو سره مرسته کړې وي خو ونه منل شوه.
په برتانیا کې د پناه غوښتنې له ځنډېدو سره پیلوټ دې ته اړ شو چې مرستې ترلاسولو لپاره متحده ایالتونو ته مخ واړوي، ځکه سپینې ماڼۍ د هغو خلکو د خوندیتوب ژمنه کړې چې له دوی سره یې تر ټولو اوږده جګړه کې همکاري کړې ده.
نوموړی د متحده ایالاتو د یوه چارواکي له خوا د P1 پروګرام ته معرفي کیږي چې لومړنۍ مرکه یې شوې او بله تعقیبي مرکه به یې د دې میاشتې په وروستیو کې وي.
وروسته له هغه چې د برتانیا د دفاع وزارت وویل چې د یاد افغان پیلوټ د بیا مېشتېدو هېڅ پلان نشته، د امریکا د مشرانو جرګې غړو د افغان پیلوټ لپاره د خوندي ځای د غوښتنې ملاتړ وکړ.
د برتانیاد حکومت یوهد انډیپېنډنټ ویاند وویل:که څه هم موږ پر انفرادي قضیو خبرې نه کوو، خو دا تاییدوو چې ټول غوښتنلیکونه د هغو وړتیا شرایطو له مخې کلک ارزول کیږي چې انلاین خپاره شوي دي.
هغه زیاته کړه:"موږ په دې پوهیږو چې افغانان په اوسني حالت کې له هېواده وتل غواړي، خو موږ نشو کولی د ټولو افغان امنیتي ځواکونو د پخوانیو غړو ملاتړ وکړو، چې شمېر یې په سلګونو زره دی."
وروستی ځانمرګی برید په باجوړ کې د جمیعت علماء اسلام ګوند د یوې ناستې پر مهال وشو، چې له امله یې لږ تر لږه ۴۶ کسان مړه او شاوخوا ۱۵۰ تنه ټپیان شوي وو.
په تېره میاشت کې د پاکستان په خېبر پښتونخوا ایالت کې پنځه بریدونه شوي، چې د ورستي برید مرګ ژوبله خورا ډېره وه او پړه یې هم داعش وسله والې ډلې پرغاړه اخیستې ده.
یو شمېر شنونکي په دې باور دي، چې دغه ډول بریدونه به په پاکستان کې پر راتلونکو ټاکنو ژورې منفي اغېزې ولري، هغه ټاکنې چې د روان کال په ورستیو کې به ترسره شي. ځکه وار له مخه لا په پاکستان کې د راتلونکو ټاکنو پر مهال د ګډوډیو په اړه اندېښنې پر خپل ځای پاتې دي.
خبریال او شنونکی سمیع یوسفزی د عبدالله همیم سره په مرکه کې د خېبر پښتونخوا ایالت د باجوړ په سیمه کې د مولانا فضل الرحمن په مشرۍ د جمیعت علماء اسلام پاکستان ګوند پر یوې ناستې د ځانمرګي برید په تړاو داسې ویلي: ”په تېرو شلو کلونو کې د یاد ګوند پر غړیو خورا ډېر بریدونه شوي، چې په دغه ډول بریدونو کې د یاد ګوند له څلورو څخه تر پنځو پورې د پارلمان مهم غړي هم وژل شوي دي. او په داسې بریدونو سره د فضل الرحمن ګوند کمزوری ښودل او د راتلونکو ټاکنو لپاره د ګډوډیو رامنځته کول دي”.
په پاکستان کې ډېری کسان په دې باور دي، چې جمیعت علماء اسلام مذهبي ګوند په دغه هېواد کې د نورو مذهبي توند لارو ډلو په پرتله خورا ډېر مسلکي، مذهبي او اسلامپالي غړي لري. او وروستی برید هم د یاد ګوند پر یوې داسې ناستې شوی، چې یو شمېر کسانو غوښتل د یاد ګوند غړیتوب تر لاسه کړي.
پاکستاني خبریال طاهر خان بیا عبدالله همیم ته داسې ویلي:”په پاکستان کې یو شمېر سُني او شیعه مذهبې توند لارې ډلې شته چې یوبل په نښه کوي، دا چې جمیعت علماء اسلام ګوند تر نورو مذهبي ګوندونو او ډلو څخه مخکښ دی، نو ځکه څو ځله پر یاد ګوند دغه ډول مرګوني بریدونه تر سره شوي دي”.
که څه هم په باجوړ کې پر جمیعت علماء اسلام ګوند د ورستي برید پړه د داعش وسله والې ډلې پر غاړه اخیستې ده، خو ډېری کسان پر دې باور دي چې یاد برید به د تحریک طالبان پاکستان یا ټي ټي پي وسله والې ډلې او یاهم د دغه هېواد نورو مذهبي توند لارو ډلو له لورې ترسره شوی وي.
د طاهر خان په وینا:”د تحریک طالبان پاکستان وسله واله ډله تل هڅه کوي، چې په پاکستان کې د کمزورو امنیتي تدابیرو څخه استفاده وکړي، او دغه ډول بریدونه ترسره کړي، ځکه دمګړۍ د پاکستان د حکومت او یادې ډلې تر منځ د سولې هر ډول مذاکرات بند شوي دي”.
په پاکستان کې د تحرک طالبان پاکستان وسله والې ډلې په ګډون اکثریت وسله والې ډلې په خېبر پښتونخوا او بلوچستان ایالتونو کې رامنځته شوي، خو د یادو ډلو له لورې تر ټولو ډېر بریدونه په روان کال کې په خیبر پښتونخوا کې تر سره شوي، او باورونه دا دي چې ممکن دغه ډول بریدونه به نور هم زیات شي.
دغه برید داسې مهال شوی، چې د اوسني حکومت موده په روانه میاشت کې پای ته رسیږي او تر هغه وروسته به په پاکستان کې سرپرست حکومت رامنځته شي.
او د دغه ډول بریدونو مخنیوی به د راتلونکو ټاکنو پرمهال د پاکستان د امنیتي ادارو لپاره یوه لویه ننګونه وي.
د روسیې په پلازمېنه مسکو کې یوه دولتي ودانۍ چې درې وزارتونه پکې فعالیت لري، په تېرو درېیو ورځو کې پرې د دویم ځل لپاره یوې بې پیلوټه الوتکې برید کړی دی .
د اوکراین د ولسمشر یوه سلاکار د سه شنبې په ورځ وویل چې روسیه دې د نورو بې پیلوټه الوتکو د بریدونو تمه ولري .
روسیې یو ځل بیا د سه شنبې ورځې د بې پیلوټه الوتکو بریدونه یو "ترهګریز عمل" بللی دی .
په بریدونو کې په نښه شوې ودانۍ په یوه سوداګریزه سیمه کې موقعیت لري چې د روسیې د اقتصادي پراختیا، ډیجیټل، صنعت او سوداګرۍ وزارتونه په کې مېشت دي.
د رویټرز خبري اژانس د یوې ویډیو له مخې د بې پیلوټه الوتکې له بریده وروسته د یوې ودانۍ څو کړکیو ته زیات اوښتی دی .
د روسیې د دفاع وزارت ویلي دي چې د اګسټ د لومړۍ نېټې په شپه په مسکو او شاوخوا سیمو کې د بې پیلوټه الوتکو د برید په پایله کې د «کییف رژیم تروریستي عمل» شنډ شو.
د دغه برید له امله د مسکو له درېیو مهمو هوايي ډګرونو څخه د ونوکوو هوايي ډګر د لنډ وخت لپاره تړل شوی و، خو ډېر ژر یې بېرته په فعالیت پیل کړ .
تېره اوونۍ هم د په مسکو کې د بې پیلوټه الوتکې برید وشو چې یوه لوړپوړې ودانۍ یې زیانمنه کړه .
د اوکراین له جګړې څخه شاوخوا ۱۷ میاشتې تېریږي.
په روانه اوونۍ کې د اوکراین ولسمشر ولودیمیر زیلینسکي د بې پیلوټه الوتکو بریدونو ته په اشارې سره وویل: «جګړه بېرته روسیې ته ورځي »
د می میاشتې راهیسې په روسیه کې دننه څو وارې بې پیلوټه الوتکو بریدونه کړي دي چې په یو برید کې دوه بې پیلوټه الوتکو کرملین ماڼۍ په نښه کړې وه.
د هند پولیس وايي، د هندوانو او مسلمانانو ترمنځ په نښته کې د ۲ پولیسو په ګډون ۵ تنه وژل شوي دي. ځايي دولتي چارواکي وايي؛ په دې نښتو کې د لسو پولیسو په ګډون ۶۰ تنه نور ټپیان شوي دي. دا نښتې د نوي ډېلي ۵۰ کیلومترۍ کې په هریانا ایالت کې شوې دي.
د پولیسو په وینا، دا نښته نن هغه مهال رامنځته شوه، چې د هندوانو یوه ډله په هریانا ایالت کې د نوح په نوم د مسلمانانو له سیمې د تېریدو په حال کې وه.
د نوح سیمې د پولیسو ویاند کرشن کومار ویلي چې دغو لاریون کوونکو غوښتل له یوې عبادتخانې ( معبد ) څخه بلې عبادتخانې ته لاړ شي چې د دواړو لورو ترمنځه جکړه رامنځته شوه .
ده وويل چې په وژل شويو کې دوه تنه رضاکار ساتونکي وو چې د تاوتريخوالي په شنډولو کې يې له پوليسو سره مرسته کوله .
د امیتي چارواکو په خبره، دغه نښتې د دوشنبې په ماښام (د اسد ۹ مه) د ګوروګام سیمې ته هم غځېدلې چې له امله یې یو جومات سوځولیدلی، یو ملا وژل شوي او یو بل ټپي دی.
ګوروګرام سیمه چې پخوا د ګورګاون په نوم یادېده، د نوي ډیلي سره نږدې ده او په دغه ځای کې ددې هېواد څو غټې فابریکې فعالیت لري چې د سوداګریز مرکز په توګه هم پېژندل کېږي .
دغه سیمه د نوي ډیلي سویل څخه 50 کیلومیټره واټن لري.
نن سه شنبه (د اسد ۱۰مه) د مسلمانانو او هندوانو استازو په ګوروګرام کې د شخړو د ختمولو په موخه خبرې اترې پیل کړي دي .
د پاکستان د بهرنيو چارو وزير د بلوچستان په مرکز کوټه کې د پوليو ضد واکسیناتورانو باندې نننی برید غندلی چې پکې د واکسیناتورانو دوه ساتونکي وژل شوي دي. بلاول بوټو زرداري له چارواکو غوښتي، چې د واکسیناټورانو امنیت ټینګ کړي او د پېښې د عاملینو پلټنه وکړي.
دغه پېښه نن سهار د کوټې په نوي کلي کې هغه مهال شوې، کله چې د دې ښار په ګډون د بلوچستان په ۳۵ ولسوالیو یا ضلعو کې د پولیو ضد کمپاین روان و.
دغه کمپاین به اوه ورځې دوام کوي، چې پکې به دوه نیم میلیونه هغه ماشومان واکسین شي چې عمرونه یې له پنځو کالو کم وي.
د دغو دوو تنو وژل شويو ساتونکو مړي دا مهال د کوټې مرکزي روغتون ته وروړل شوي او ځایي پولیس وایي چې د پېښې د عاملینو لټه یې پيل کړې ده.
د نوي کلي د زرغون اباد دتاڼې د اېس،اېچ،او اصف مروت په خبره اوس د کوټې په نورو برخو کې د پولیو ضد کمپاین روان دی او د دغه کمپاین د بریالي ترسره کولو لپاره د صوبایي حکومت له لوري سخت امنیتي ګامونه پورته شوي دي.
دا لومړی ځل نه دی چې د پاکستان په سرحدي سیمو کې د پولیو ضد واکسین پر کارکوونکو او ساتونکو خونړی برید کېږي، تر دې وړاندې هم د خېبر پښتونخوا په ځينو سیمو کې د پولیو واکسیناتوران او د هغوی امنیتي ساتونکي په نښه شوي او مرګ ژوبله وراوښتې وه.
