داعش د دغې ډلې د مشر ابوالحسین الحسیني القرشي د وژل کېدو له منښتې وروسته، ابوحفص الهاشمي القرشي یې د هغه ځای ناستی وګومارلو. د ترکیې ولسمشر د اپریل په میاشت کې ویلي و، چې د هغوی استخباراتي ځواکونو الحسیني القرشي په سوریه کې وژلی دی.
د رجب طیب اردوغان له وینا وروسته، دا لومړی ځل دی چې داعش ډله د خپل مشر د برخلیک په اړه خبرې کوي.
د عراق او شام د اسلامي دولت (داعش) ډلې د خپل تلګرام په کانال کې د خپل مشر د وژل کېدو منښته کړې، خو د خپل نوي مشر په اړه یې نور جزیيات نه دي ورکړي.
الحسیني القرشي د ابوالحسن الهاشمي القرشي، تر وژل کېدو وروسته چې د ۲۰۲۲ کال په نومبر میاشت کې ووژل شو، دریم مشر دی چې د دغې ډلې لپاره ټاکل کېږي.
