په کابل کې د ایران د سفیر مرستیال میثم مهدي پور له طالبانو غوښتي، چې په افغانستان کې د خمیني مرستندویه ټولنې د دفترونو د تړلو لامل روښانه کړي. تر دې وړاندې ایراني رسنیو خبر ورکړ، چې طالبانو په کابل، هرات او بلخ کې د دغې ټولنې دفترونه تړلي دي.
د حسن کاظمي مرستیال میثم مهدي پور پر خپلې ټوېټر پاڼې لیکلي: «په افغانستان کې دغه ټولنه چې د څلورو لسیزو څخه ډېره خدمتي تجربه لري، له نږدې دوو میاشتو راهیسې ځڼډول شوې ده. تمه ده چې طالبان د دې کار لامل په څرګند ډول بیان کړي.»
د خمیني مرستندویه کمیټه یوه نیمه دولتي موسسه ده، چې د ۱۳۵۷ کال د کب په ۱۴مه نېټه يې د ایران د اسلامي جمهوریت بنسټګر روح الله خمیني په حکم خپل فعالیت پیل کړ. دغې ټولنې په تېرو کلونو کې په افغانستان کې هم خپل دفترونه پرانیستي وو.
د ۱۳۷۷ لمریز کال په دوبي کې د طالبانو د پخوانۍ واکمنۍ پر مهال هم د یادې ادارې فعالیت بند شوی و؛ خو د طالبانو له نسکورېدو وروسته، په ۱۳۸۱ کال کې د کابل، مزارشریف او زرنج په ښارونو کې د خمیني د مرستندویه ټولنې دویم پړاو بیا له سره پیل شو.
طالب چارواکو تر اوسه پورې په افغانستان کې د ایران د حکومت اړوند د دغه سازمان د فعالیتونو د بندولو په اړه څه نه دي ویلي.
افغانستان انټرنشنل ته رسیدلي مکتوب کې راغلي چې د غزني ولایت مقام معاونیت د اسد په دویمه د پوهنې ریاست ته دا مکتوب لیږلی ترڅو د هرې موسسې اړوند د نجونو د چټکو زدکړو ټولګي بند کړي.
په دغه مکتوب کې راغلي چې د غزني ولایت اړوند د ښوونې او روزنې په سکتور کې د کورنيو او بهرنيو خصوصي موسسو د دغو ټولګیو پر فعالیت بندیز لګول شوی دی .
خو په دغو مکتوبونو کې دا نه دي ویل شوي چې د کوم دلیل له مخې ددغو ټولګيو د تړل کیدو پرېکړه شوې ده .
یو بل مکتوب کې چې روان کال د اسد پر ۹ د غزني د پوهنې ریاست لخوا د اندړو ولسوالۍ د پوهنې امریت ته لیږل شوی پکې لیکل شوي چې په دغه ولسوالۍ کې د نجونو لپاره د چټکو زدکړو ټولګي وتړل شي .
ځايي سرچینې وايي یوازې د غزني د اندړو ولسوالۍ د میري کلي ښوونځي کې د نجونو لپاره ۸ د چټکو زدکړو ټولګي فعال وو، چې په هر ټولګي کې له ۲۰ څخه تر ۳۰ پورې د ۱۲ کلنۍ څخه پورته عمر لرونکو نجونو زدکړې کولې .
ځايي سرچینې زیاتوي دغه ټولګي د طالبانو د حکومت پرمهال جوړ شوي وو خو د لنډې مودې فعالیت وروسته اوس بیرته وتړل شول.
په غزني کې د طالبانو ځايي چارواکو زموږ پرلپسې اړیکې ته په دې تړاو د هو یا نه ځواب را نه کړ .
طالبانو په واکمنېدو پسې په ټول افغانستان کې اول له شپږم ټولګي پورته ښوونځي او وروسته پوهنتونونه د نجونو پر مخ وتړل او میرمنې یې له کار منع کړې.
رویټرز خبري اژانس نږدې دوه میاشتې مخکې د ملګرو ملتونو د ماشومانو ملاتړي صندوق یا یونیسف کې د خپلو سرچینو له خولې ولیکل چې دا اداره طالبانو ته د خپلو روزنیزو پروګرامونو د ممکنه سپارلوپر مهالوېش او پلیتابه بوخته ده.
یونیسف وايي، طالبانو تړیوالو موسسو ته ویلي چې خپلې روزنیزې پروژې بندې کړي.
دا اداره وايي، د نړیوالو موسسو د روزنیزو ټولګیو بندیدو سره به د درې لکه نجونو په ګډون پنځه لکه ماشومان له زدکړو بې برخې شي.
