په پلازمینه کې د بېکارۍ او بې وزلۍ له زیاتوالي سره سره په کابل کې د طالبانو د ښاروالۍ مسوولینو " ملت ته د حکومت د حساب ورکولو" په غونډه کې وویل،چې سږ کال دغې ادارې ۴،۲ میلیارده افغانۍ عاید ترلاسه کړی دی.
د کابل لپاره د طالبانو د ښاروالۍ دا عاید په داسې حال دی چې د ملګرو ملتونو د شمېرو له مخې په افغانستان کې شپږ میلیونه نور وګړي له لوږې سره مخ دي.
په تېرو دوو کلونو کې د طالبانو بېلابېلو ادارو له لوري د خپلو عایداتو د زیاتوالي لوړې شمېرې وړاندې کړې، خو د مرستندویه بنسټونو د راپورونو له مخې دغه شمېرې د خلکو د ژوند له معیار سره سمون نه خوري.
په تېرو دوو کلونو کې زرګونه کسان د لوږې او وزګارۍ له امله د کار موندلو لپاره د افغانستان ګاونډیو هېوادونو ته کډه شوي دي.
تر دې وړاندې د خوړو نړۍوال پروګرام اعلان کړی و، چې په افغانستان کې شاوخوا لس میلیونه وګړي له لوږې سره مخ دي او د مرستې لپاره کافي سرچینې نه لري.
