د خمیني مرستندویه ټولنه غواړي، چې په افغانستان کې خپلو فعالیتونو ته دوام ورکړي. دغې نیمه دولتي ټولنې له طالبانو وغوښتل، چې د دوی د فعالیتونو پر وړاندې شته ستونزې هوارې کړي او موضوع به له ډیپلوماټیکو لارو وڅاري.
د جماران سایټ د راپور له مخې چې د ایران د اسلامي جمهوریت د بنسټ اېښودونکي کورنۍ پورې تړاو لري، د خمیني د مرستې ټولنې ویلي چې د دوی ټولې کړنې د افغانستان د جوړو شویو حکومتونو د قوانینو او اصولو په اډانه کې په اجازې ترسره کېږي.
د خمیني د مرستو ټولنې کابو یوه اونۍ وړاندې اعلان وکړ، چې د طالبانو لخوا په کابل، هرات او بلخ ولایتونو کې د دوی دفترونه تړل شوي.
د خمیني د مرستو ټولنه چې د ایران د اسلامي جمهوریت نیمه دولتي اداره ده، په ۱۳۵۷ کال کې د اسلامي جمهوریت د بنسټ اېښودونکي روح الله خمیني له خوا د اړمنو خلکو د لاسنیوي په موخه جوړه شوې.
له دې وړاندې په کابل کې د ایران اسلامي جمهوریت د سفیر مرستیال میثم مهدي پور له طالبانو غوښتي و، چې د دغې ټولنې پر فعالیتونو د بندیزونو لامل روښانه کړي.
په کابل کې د ایران اسلامي جمهوریت د سفیر مرستیال د پنجشنبې په ورځ پر خپلې ټویټرپاڼه لیکلي:《د مرستو ټولنه په افغانستان کې د خدمتونو د رسولو د څه باندې څلورو لسیزو تجربو په لرلو سره له دوو میاشتو راهیسې یې فعالیتونه بند شوي، په دې هیله چې طالبان یې لامل روښانه کړي.》
خو طالبانو تراوسه پورې په دې اړه څه نه دي ویلي.
