د کرزي تکراري غوښتنه؛ د دایمي سولې او ثبات د ټینګښت لپاره ملي ډیالوګ ضرور دی
پخواني ولسمشر حامد کرزي له یو شمېر خبریالانو سره په لیدنه کې ویلي؛ په افغانستان کې د دایمي سولې او ثبات د ټینګښت لپاره ملي ډیالوګ ضرور دی.
پخواني ولسمشر حامد کرزي له یو شمېر خبریالانو سره په لیدنه کې ویلي؛ په افغانستان کې د دایمي سولې او ثبات د ټینګښت لپاره ملي ډیالوګ ضرور دی.
حامد کرزي نن سه شنبه ( اسد ۱۷ مه ) په يو ټوییټ کې لیکلي، چې په کابل کې یې د یو شمېر افغان خبریالانو سره د لیدنې پرمهال ویلي؛ د نجونو ښوونځي او پوهنتونونه باید پرانیستل شي.
کرزي همداراز ټینګار کړی، چې په افغانستان باید کې میرمنو ته د کار اجازه ورکړل شي.
که څه هم په دغه ټویټ کې پخواني ولسمشر کرزي د طالبانو نوم نه دی اخیستی، خو دغې ډلې واک ته له رسېدو سره د نجونو پرمخ له شپږم ټولکې پورته ښوونځي او پوهنتونونه وتړل او له کور څخه بیرون یې مېرمنې له کار کولو څخه منع کړې.
له دې وړاندې پخواني ولسمشر محمد اشرف غني هم ویلي وو، چې استبدادي نظامونه دوام نه کوي او د افغانستان د موجوده ستونزو د حل لپاره باید ملي ډیالوګ پیل شي.
طالبانو له دې وړاندې د افغانستان له ټولو سیاسي مشرانو غوښتي وو، چې د عمومي بښنې څخه په ګټې اخیستنې؛ د یو فرد په توګه کولی شي چې په افغانستان کې د دوی تر واک لاندې ژوند وکړي.
دا په داسې حال کې ده چې نړۍ په افغانستان کې د یوه ټولشموله حکومت د جوړېدو غوښتنه کوي، خو په ظاهره داسې معلومیږي چې طالبان د دغه غوښتنې منلو ته تیار نه دي.
د یادونې وړ ده چې د طالبانو مشر ملا هبت الله په خپل یو غږیز پېغام کې ویلي وو، چې که چېرې اټوم بم هم پرې وکارول شي؛ دوی د نړۍ فرمایشات نه مني.
