د پاکستان د پارلمان یا قومي اسمبلۍ تر منحل کېدو یوه ورځ وړاندې د دې اسمبلۍ په غونډه کې چې د افغانستان په اړه د پاکستان په پالیسۍ خبرې کېدې، د جمعیت علمای اسلام ګوند استازي اسد محمود او د شمالي وزیرستان د استازي محسن داوړ یو پر بل سختې نیوکې وکړې.
د غونډې په پيل کې محسن داوړ په پاکستان او په ځانګړې ډول په خيبر پښتونخوا کې د ترهګرۍ پر زياتېدو سخته څرګنده کړه او د پاکستاني حکومت پر افغان سياست يې نيوکې وکړې.
هغه د باجوړ وروستي ځانمرګي برید ته په اشارې، چې د جولای په ۳۰مه نېټه د جمعیت علمای اسلام په غونډه شوی و وویل، چې د ترهګرۍ نوې څپه د پاکستان د ۴۵ کلنې غلطې افغان پالیسۍ پایله ده.
نوموړي زیاته کړه: "د امریکا او طالبانو ترمنځ د دوحې په تړون کې د پاکستان پر رول خواشینی یم، ځکه چې د دوحې له تړون وروسته په سیمه کې نوې جګړه پیل شوې ده".
محسن داوړ وړاندې وايي "له هغې ورځې چې طالبان پر افغانستان واکمن شول، بیا د خبرو په پلمه پاکستاني طالبانو ته اجازه ورکړل شوه چې په خیبر پښتونخوا او بلوچستان کې مېشت شي. "
هغه د پاکستان د حکومت پر کړنلاره د نیوکو په دوام وويل: "موږ د یو دولت په توګه ټوله لوبه اسانه کړه. لومړی مو د دوحې د موافقې اسانتیا برابره کړه او بیا مو په افغانستان کې طالبانو ته د حکومت نیولو زمینه برابره کړه ."
هغه وويل: "هغو کسانو چې په افغانستان کې د طالبانو د واکمنۍ جشن ولمانځه، په پاکستان کې د ترهګرۍ مسوول دي او د هغوی لاسونه د بې ګناه خلکو په وينو سره دي."
محسن داوړ ادعا وکړه: "داسې ښکاري چې د افغانستان په څېر په خیبر ښتونخوا کې هم د طالبانو د مسلط کولو پلان روان دی، ځکه چې طالبانو لا له وړاندې والیان او نور مسوولان ټاکلي دي."
دغه راز ښاغلي داوړ پر پاکستاني حکومت په بېړه د قانون جوړولو له امله نیوکه وکړه او خبرداری یې ورکړ، چې د "رسمي رازونو ترمیم شوی قانون په راتلونکې کې د هر سیاسي ګوند پرضد کارول کېدی شي. "
د سې شنبې ورځې په دغه غونډه کې د جمعیت علمای اسلام استازي او د مولانا فضل الرحمن زوی اسد محمود په محسن داوړ تور پورې کړ، چې د "امریکا د ویاند" په توګه کار کوي.
اسد محمود زیاته کړه: "اوس هم په افغانستان کې د طالبانو په مشرۍ د اسلامي امارت سره د خپل ګوند ملاتړ ته دوام ورکوم."
په قومي اسمبلۍ کې د جمعیت علمای اسلام استازي د محسن داوړ خبرو ته په اشارې وویل: "کله چې د امریکا په ملاتړ یو ګوډاګی په افغانستان حکومت کوي، تاسو یې لمانځئ او د هغوی په محفلونو کې برخه اخلئ او کله چې اسلامي امارت جوړ شي، تاسو واياست چې لاسونه يې په وینو سره دي."
هغه زیاته کړه: "کله چې موږ په قبایلي سیمو کې د ترهګرۍ پر ضد د پوځي عملیاتو مخالفت کاوه، تاسو پوځ ته بلنه ورکوله چې عملیات وکړي. کله چې ستاسو هیلې پوره شوې او پوځ عملیات پیل کړل، تاسو یو پښتون تنظیم جوړ کړ او د پوځ سره مو ناوړه چلند پیل کړ. "
له نږدې دوو کلونو راهیسې چې افغان طالبانو پر کابل ولکه ټینګه کړې ويل کېږي، چې په پاکستان کې نا امنیو زور اخیستی، د پاکستان حکومت له هرې پېښې وروسته پر افغان طالبانو غږ کوي چې ټي ټي پي پرې له افغان خاورې بریدونه کوي، خو افغان طالبانو هر ځل د پاکستاني چارواکو داسې څرګندونې رد کړې دي.
