د خېبر پښتونخوا په بنو ولسوالۍ کې د ناپېژانده وسله والو لخوا د پوليو ضد واکسین په ډله برید کې، د دې ډلې یو ساتونکی وژل شوی. دغه برید نن د سه شنبې په ورځ د زمري په اتلسمه نېټه د بنو په مري روډ د پولیو ضد واکسین په کارکوونکو شوی دی.
په سیمه کې امنیتي چارواکي وایي، بریدګر له سېمې تښتېدلي او دوی یې په اړه پلټنې پيل کړې دي، خو له دې سره یې هلته د پولیو ضد واکسین کمپاین هم ځنډولی دی.
سږنی کال په خیبر پښتونخوا کې د پولیو یا ګوزڼ په ناروغۍ د اخته ماشومانو دوه پېښې ثبت شوې، چې دواړه یې په همدغه بنو ولسوالۍ کې وې.
د ۲۰۲۲ کال په ټول پاکستان کې د پولیو شل پېښې ثبت شوې چې ټولې په خیبر پښتونخوا کې وې، خو په ۲۰۲۱ کال کې د پولیو یوازې یوه پېښه ثبت شوې وه چې هغه هم په بلوچستان کې وه.
تر دې څو ورځې وړاندې په بلوچستان کې هم د پولیو ضد کمپاین پر ډله برید شوی و، چې له امله یې د دغې ډلې دوه ساتونکي وژل شوي وو.
