د امریکا د بهرنیو چارو وزارت ویاند متیو مېلر د چهارشنبې پر ورځ (د زمري په ۱۸ مه) په خبري ناسته کې د ترهګرۍ پرضد د پاکستان د عملیاتو ملاتړ وکړ . هغه زیاته کړه چې واشنګټن له اسلام اباد سره د ژورو اړیکو پاللو په تېره د ترهګرۍ پر وړاندې د مبارزې په چاره کې ارزښت ورکوي.
نوموړي د دې پوښتنې په ځواب کې چې له افغانستانه تر وتو وروسته به د ترهګرۍ پر وړاندې مبارزه کې د امریکا رول څه ډول وي وویل، هېواد به یې د هغو عملیاتو ملاتړ ته دوام ورکوي چې د پاکستان لخوا ترسره کېږي.متیو مېلر وویل: «موږ له پاکستان سره د ځينو مرستو په کولو لکه د ترهګرۍ پر وړاندې مبارزه او د قانون په واکمنېدو کې همکاري او ملاتړ کوو او دغه کار ته دوام ورکوو.»په ورستیو څو مېاشتو کې د پاکستان پر امنیتي ځواکونو او یو شمېر سیاسي کړیو خونړي بریدونه شوي.د دغو بریدونو پړه تر ډېره داعش او د پاکستان د طالبانو تحریک منلې ده.په دې وروستیو کې د خېبر پښتونخوا په باجوړ کې د جمیعت علمای اسلام پر سیاسي غونډه پّ برید کې ۶۳ کسان وژل شوي وو.د دغه برید پړه هم د داعش خراسان څانګې منلې وه.له دې پېښې وروسته د دغه هېواد ځينو چارواکو لکه لوی درستیز عاصم منیر افغانان تورن کړل، چې د دغو بریدونو تر شا د هغوی لاس دی.خو طالبانو د پاکستاني چارواکو دغه څرګندونې درواغ بللې دي.
