د سرپل ولایت سیمه ییزو سرچېنو افغانستان انټرنشنل ته ویلي، چې طالبان د بلخاب ولسوالۍ په یوشمېر کلیو کې له کرونده ګرو د عشر او زکات په نوم پیسې اخلي. د سیمې خلک وایي، چې څو ځلې یې طالب چارواکو ته شکایت هم کړی، خو لایې کوم ځواب نه دی ترلاسه کړی.
د دغو کليو د اوسېدونکو په وينا، تېر کال طالبانو له ځینو محصولاتو عشر او زکات راټولاوه، خو سږ کال په زور له ټولو محصولاتو، ان له بې حاصله ونو هم زکات ټولوي.
سرچېنې همداراز وايي، چې د دغو کليو د لېرې والي او د هزاره طالبانو د قوماندان مولوي مهدي کور ته د نږدې والي له امله چې د "بغاوت" په تور وژل شوى، د سیمې اوسېدونکي د طالبانو پر وړاندې له درېدو وېره لري.
طالبان پر مالیه سربېره د عشر او زکات له لارې چې دیني اړخ هم لري، غواړي خپل کورني عواید زیات کړي.
د طالبانو د مالیې وزارت تر هغه وروسته چې یاده ډله په ۱۴۰۰ کال کې واک ته ورسېده، د عشر او زکات د راټولولو په منظم سیسټم کار پیل کړ.
دغه وزارت اعلان وکړ چې: «د ټولو کلني عوایدو، حیواني او کرنیزو محصولاتو څخه عشر او زکات راټولیږي او د هیواد اړو کسانو ته ورکول کیږي.»
کروندګر د خپل مالي توان او د کرنیزو عوایدو د کموالي له امله د طالبانو د عشر او زکات سره مخالف دي.
