د افغانستان د ملي پوځي اکاډمۍ یو شمېر فارغان وايي، سره له دې چې طالب چارواکو د مسلکي زدکړو لپاره د کابل پوځي تعلیمي مرکز ته معرفي کړي، خو د دغه مرکز مسوولین ورته اجازه نه ورکوي چې دغه مرکز ته ننوځي.
د ملي پوځي اکاډمۍ د څوارلسمې دورې دغه ۳۸۴ مسلکي فارغان چې په دغه اکاډمۍ کې یې د جمهوریت په وروستیو کې څلور کلنې زدکړې پیل کړې وې، سږکال فارغ شول.
له دغې ډلې یوه تن د نوم نه ښودلو په شرط افغانستان انټرنشنل – پښتو ته وویل، چې د روان کال په لومړیو میاشتو کې د افغانستان د ملي پوځي اکاډمۍ له څلور کلنو زدکړو فارغېدو سره د نورو زدکړو لپاره د کابل پوځي تعلیمي مرکز ته ور وپېژندل شول.
نوموړی زیاتوي: “د فراغت په غونډه کې موږ د طالبانو د مشرانو له خوا د لا مسلکي زدکړو لپاره د کابل پوځي تعلمي مرکز ته معرفي شوو، مګر اوس پوځي مرکز ته د ننوتلو اجازه نه راکول کیږي”.
د هغه په خبره، ځینو ملګرو ته یې د ننوتلو اجازه ورکړل شوې وه، خو نېږدې شل ورځې کیږي، چې طالبان هیچا ته هم د ننوتلو اجازه نه ورکوي.
هغه وايي: «تېره اونۍ موږ لاړو. په دروازه کې یې راته ویل چې د جمهوریت پاتې شوني حق نه لري، چې مرکز ته را داخل شي.»
نوموړی زیاتوي، هڅه یې وکړه چې د طالبانو دفاع وزارت سره دا موضوع شریکه کړي، خو هلته هم د ننوتلو اجازه نه ورکول کېږي.
نوموړی زیاتوي: «نو موږ څه وکړو؟ نه مو طالبان غږ اوري او نه هم کومه بله مرجع شته، موږ د وطن سرتېري یو، په هېڅ ډله ټپله پورې تړاو نه لرو، خو طالبان مو د جمهوریت پاتې شوني ګڼي.»
له پرلپسې اړیکو سره – سره په دې ونه توانېدو، چې په دې اړه د طالبانو د دفاع د وزارت نظر را واخلو.
افغانستان د ملي پوځي اکاډمۍ څخه دغه څورالسمه دوره فارغان د روان کال د فېبروي په میاشت فارغ شوي دي.
