د ملګرو ملتونو امنیت شورا وايي، د ناټو ځواکونو هغه وسله چې پخواني افغان پوځ ته ورکړل شوې وه، د تحریک طالبان پاکستان له خوا د داعش – خراسان ډلې او د ختیځ ترکستان اسلامي غورځنګ ته ورکړل شوې ده. امنیت شورا په افغانستان کې د داعش – خراسان ډلې د عملیاتي پیاوړتیا خبر ورکړی دی.
دې شورا په دغه هېواد کې د داعش د فعالیتونو پر زیاتېدو اندېښنه ښودلې ده.
نړیوالې سولې او امنیت ته د داعش له خوا ګواښ او ورسره د مبارزې په اړه د ملګرو ملتونو د سرمنشي په ۱۷م راپور کې امنیت شورا ته ویل شوي، چې په افغانستان کې د داعش – خراسان ډله مخ په پیاوړې کېدو ده، چې له امله یې په افغانستان کې وضعیت لا پیچلی شوی او دا چاره نړۍ ته یو لوی ګواښ دی.
په راپور کې راغلي، چې د داعش – خراسان له خوا په بلخ، بدخشان، بغلان او یو شمېر نورو سیمو کې د طالبانو پر لوړو پوړو چارواکو بریدونه د دې ګواهي ورکوي، چې د دغې ډلې عملیاتي وړتیاوې او مورال لوړ شوی، هماهنګي یې زیاته شوې او د جلب و جذب پروسه یې غښتلې شوې ده.
راپور زیاتوي، چې د داعش – خراسان ډلې د وسلوالو او د کورنیو د غړو شمېر له ۴۰۰۰ څخه تر ۶۰۰۰ کسانو پورې رسېږي او دغې ډلې په افغانستان کې د ختیځ ترکستان له اسلامي غورځنګ سره اړیکې رغولې، چې دواړو ډلو مشترک جنګي تبلیغاتي پوسټرونه هم خپار کړي دي.
راپور وايي، چې داسې معلومات هم شته چې له مخې یې دا جوتیږي چې د ختیځ ترکستان اسلامي غورځنګ غړو له داعش – خراسان ډلې سره په عملیاتو کې ونډه اخیستې ده.
راپور زیاته کړې، چې د هند په نیمه وچه کې د القاعده یو شمېر غړي هم لېوالتیا لري، چې د داعش له ډلې سره مرسته وکړي.
دا چې کوم غړي او څه ډول مرسته؟ په دې اړه په راپور کې توضیحات نه دي ورکړل شوي.
امنیت شورا ته د ملګرو ملتونو د سرمنشي په دغه راپور کې د داعش – خراسان ډلې د جګړییزې تګلارې په اړه هم معلومات ورکول شوي او ویل شوي، چې دا مهال د دغې ډلې جنګي لار یوازې ځانمرګي بریدونه دي او دوی د متخصصینو په نامه یوه کمېټه هم جوړه کړې چې د بریدونو لپاره نوې لارې چارې ولټوي.
په راپور کې زیاته شوې، چې د ملګرو ملتونو غړي هېوادونه به د دغه ستر ګواښ سره هدفي مبارزه کوي.
افغانستان انټرنشنل- پښتو هڅه وکړه، چې د دغه راپور په اړه د طالبانو د رسمي سرچینو نظر را واخلي؛ خو د دغې ډلې له ویاند ذبیح الله مجاهد سره له پرله پسې اړیکو په دې ونه توانېدو چې نظر یې واخلو.
که څه هم طالبان په افغانستان کې د داعش – خراسان ډلې پراخ فعالیت ردوي، خو د طالبانو له واکمنۍ راهیسې په افغانستان کې د اکثرو لویو بریدونو او د طالبانو ځینې چارواکو هدفي وژنو مسوولیت دغې ډلې پر غاړه اخیستې.
بلخوا د طالبانو ویاند هم تېره اونۍ په یوه اعلامیه کې ویلي، چې په افغانستان کې یې ۱۸ تنه پاکستاني اتباع چې د داعش ډلې غړیتوب یې لاره وژلي دي.
