په افغانستان کې د خبریالانو په پرلپسې ډول نیول دوام لري. له پرون راهیسې د خبریالانو د نیولو پر دوام د طالبانو استخباراتو د طلوع نیوز خبریال عطاالله عمر او وحیدالرحمن افغانمل له کندهار او له کونړ ولایت څخه آزاد خبریال پرویز څرګند نیولي دي.
د افغانستان د ازادو رسنیو د ملاتړ اداره یا نۍ په خپلې وروستۍ خبرپاڼه کې لیکلي، چې په تېرو دوو اونیو کې د طالبانو لخوا اته خبریالان نیول شوي دي.
طالبانو تيره اوونۍ له کندوز ولایته د سلام وطندار راډیو خبریال حسیب حساس او له پکتیا څخه د آریانا نیوز خبریال حبیب الله سراب نیولي و، چې لا هم دوی د طالبانو په بند کې دي.
د خبریالانو له حقونو د دفاع یوه اړونده اداره د یادو کسانو نیول کېدل مني خو ډیر جزییات نه ورکوي.
طالبانو ته یوې نږدې سرچینې افغانستان انټرنشنل ته وویل، چې په دې وروستیو کې د خبریالانو نیولو یو اصلي لامل له ځینو بهرنیو رسنیو سره د یادو نیول ېشوو کسانو کار کول یاد شوي.
د سرچینې په خبره، طالبان غواړي چې خبریالان د دوی تر کنټرول لاندې وي او هغه کسان چې تر اوسه نیول شوي له هغوی څخه ژمنه هم اخلي چې بهرنیو رسنیو سره دې کار نه کوي .
دا په داسې حال کې ده چې، تیره اوونۍ هم له ننګرهاره د کليد راډو ېدوه خبریالان هم نيول شوي و.
د افغانستان د خبریالانو د ملاتړ سازمان بیا د طالبانو له لېوري په پرلپسې توګه د خبریالانو په نیول کیدو نیوکه کوي او زیاتوي چې حاکم نظام باید نیول شوي خبریالان ژر تر ژره خوشې کړي.
دغه سازمان په دې وروستیو کې په ننګرهار، کندهار، پکتیا، کندوز او کونړ ولایتونو کې د خبریالانو په نیول کیدو او د طالبانو له خوا د ځینو رسنیو پر بندیدو اندیښنه څرګندوي.
په کابل کې د یوې خصوصي رسنۍ خبریال د نوم د نه ښودلو په شرط وایي چې، که د طالبانو له خوا د خبریالانو نیول کیدل همداراز دوام وکړي نو دوی به د کار او وطن پریښودو ته اړ شي.
د طالبانو له بیا واکمنیدو سره یو شمیر رسنۍ وتړل شوې، ډیر شمیر خبریالان له هیواد څخه ووتل او پر ښځینه خبریالانو سخت محدودیتونه وضع شول.
