په افغانستان کې زرګران وايي، چې په کابل کې د سرو زرو بازار ډېر پېکه شوی دی. دوی وایي، چې د اقتصادي ستونزو له امله ډېری خلک د سرو زرو د اخیستو پر ځای هره ورځ یې د پېرلو لپاره د دوی هټیو ته ورځي.
په کابل کې یو زرګر وایي، چې د تېرو وختونو پرتله یې په خرڅلاو کې ډېر کمښت راغلی او هره ورځ خلک د ناسم اقتصاد له امله خپل سره زر پلوري.
د کابل ښار د زرګرانو اتحادیه د سرو زرو د بازارونو په کمېدو اندېښنه لري او وایي، چې په هېواد کې د سرو زرو بازازونه شاوخوا شپېته سلنه کم شوي دي.
اخوا د کابل ښار اوسېدونکې نیلاب شهرزاد وایي، چې خاوند یې د جمهوریت پرمهال د یوې امنیتي ادارې کارکوونکی و، چې د طالبانو له واکمنېدو وروسته وزګار شوی دی.
د نوموړې په وینا، اقتصادي وضعیت یې ورځ تر بلې د خرابېدو په حال کې دی او په هرو دوو مېاشتو کې د خپلو اړتیاوو د پوره کولو لپاره مجبوره ده چې خپل سره زر وپلوري.
میلاد چې د شهرنو د چرګانو په کوڅه کې د ګران بیه ډبرو او د سپینو زرو دوکان لري. وایي چې، د تېرو وختونو پرتله، سره له دې چې د زرګرانو په کارونو کې کموالی راغلی؛ خو ترڅنک یې بیا د سرو زرو بیې هم لوړې شوې دي.
پخوا یو ګرام سره زر څه باندې څلور زره افغانۍ وو؛ خو اوس بیا نږدې شپږ زره افغانیو ته پورته شوی دی.
د سپینو زرو بیه چې ګرام په سلو افغانیو و اوس یو سلو څلوېښتو افغانیو ته رسیدلی دی.
افغان سوداګر وایي، افغانۍ د نورو اسعارو پر وړاندې ثبات نلري نو کله چې زرګر ډالر پېري له ستونزو سره مخامخ کېږي؛ ځکه د سرو زرو بازارونه په افغانیو پورې تړلي دي.
یو شمېر اقتصادي شنونکي په هېواد کې د اقتصادي ننګونو اصلي لامل د افغانستان بانک د هغو ډالرو کنګل کېدل ګڼي، چې واک ته د طالبانو له رسېدو وروسته کنګل شوي دي.
