د طالبانو د امر بالمعروف او نهي عن المنکر وزارت چارواکو ملت ته د دولت د حساب ورکولو پروګرام کې وويل، چې تېر يوه کال کې یې ۵۷۰ تنه هغه کسان چې عمرونه یې کم وو، د امر بالمعروف او نهي عن المنکر له لیکو ایستي او ديني مدرسو ته یې استولي دي.
د دغه وزارت د شکایتونو د اورېدو مسوولین وایي، چې تېر یوه کال کې یې یوولس زره شکایتونه ترلاسه کړي چې څه د پاسه ۷ زرو ته یې رسېدنه شوې ده.
د یو بل خبر له مخې د خوست امنیې قومندانۍ چارواکي، د دغه ولایت په مرکز او ځاځي میدان ولسوالۍ کې د ۱۴ کوډګرو د نیولو خبر ورکوي.
د طالبانو تر کنټرول لاندې باختر خبري اژانس د خپلې کورپاڼې په خپور شوي راپور کې لیکلي، چې دغه کسان د امر بالمعروف او نهی عن المنکر رياست د منسوبینو په ګډې همغږۍ ۸ تنه په شینکۍ، او ۶ تنه د ځاځي میدان ولسوالۍ اړوندو سیمو کې نیولي دي.
دغه کوډګر داسې مهال نیول کېږي، چې د امر بالمعروف او نهی عن المنکر وزارت تېره اوونۍ په ټول هېواد کې د کوډګرو او جادوګرو پر فعالیت بندیز ولګاوه او ویلي یې و، که څوک پر دغه ناروا عمل ونیول شي محکمې ته به وروپېژندل شي.
څو ورځې وړاندې هم د امر بالمعروف او نهی عن المنکر وزرات کارکوونکو یو کوډګر نیولی و.
