د ورکو بلوڅانو د لټون ډله: په تېرو دوو لسیزو کې ۶۰۰۰ بلوڅان جبري ورک شوي دي
د پاکستان په بلوچستان ایالت کې د ورکو شویو بلوڅانو د لټون ډله وايي، چې په دغه هېواد کې نېږدې ۶۰۰۰ بلوڅان په جبري ډول ورک شوي دي.
د پاکستان په بلوچستان ایالت کې د ورکو شویو بلوڅانو د لټون ډله وايي، چې په دغه هېواد کې نېږدې ۶۰۰۰ بلوڅان په جبري ډول ورک شوي دي.
د دغې ډلې غړو تېره ورځ رسنیو ته ویلي چې په تېرو درېیو کلونو کې د بلوڅانو په جبري ډول د ورکېدو لړۍ چټکه شوې او دا د دوی پر وړاندې یوه جدي ستونزه ده .
د دغې ډلې مشر نصرالله بلوڅ رسنیو ته ویلي، چې په تېرو نېږدې دوو میاشتو کې ۸۰ بلوڅان په جبري ډول ورک شوي او په تېر یو کال کې د ۱۰۵ ورکو شویو کسانو کورنیو له دوی سره د خپلو ورکو شویو غړو نومونه ثبت کړي دي.
د نوموړي په خبره، چې اکثره ورک شوي بلوڅان د تربت، خضدار، کوېټې،کېچ، قلات او مستونګ په سیمې پورې اړه لري او لویه برخه یې ځوان سیاسي فعالان دي.
له دې وړاندې یو شمېر بلوڅ قامپالو سیاستوالو د بلوڅانو د جبري ورکېدو تور د پاکستان پر پوځ او استخباراتي ادارو پورې کړی و، خو یادو ادارو دغه تورونه ناسم بللي وو.
د یادونې وړ ده، چې په پښتونخوا کې هم ګڼو قامپالو سیاستوالو د زرګونو پښتنو ځوانانو د ورکېدو غږ کړی او پړه یې د پاکستان پر پوځ اچولې وه.
