د برېټانیې عامه څېړنیزې محکمې پرېکړه کړې، چې په افغانستان کې د برېټانوي ځواکونو لهخوا د جنګي جرمونو په تړاو ځینې تورونه په غیر علني توګه وڅېړي. د سکای نیوز د راپور له مخې، د دغې محکمې قاضي د دې حکم دلیل ملي امنیت او نور لاملونه بللي دي.
د برېټانیې د دفاع وزارت د چنګاښ په میاشت کې اعلان وکړ، د لومړي ځل لپاره مني چې د دغه هېواد ځانګړي ځواکونه د جنګي جرمونو د پلټنې په مرکز کې دي.
دغه وزارت همدا راز اعلان وکړ، چې "په افغانستان کې د ادعا شویو جنګي جرمونو په اړه د دغه هېواد د ځانګړو ځواکونو د نوم او د هغوی د ښکېلتیا د محدودیت" په اړه خپل پخوانی دریځ پرېږدي.
د برېټانیې د دفاع وزارت تر دې وړاندې ویلی و، چې د دغې څېړنې پر بنسټ باید " هر هغه سند چې د برېټانیایي ځواکونو د هر ډول لاسوهنې ادعا رد او یا تاییدوي له عمومي خپراوي څخه لیرې وساتل شي."
د برېټانیې د کورنیو چارو وزارت د هوکړې له مخې، کېدای شي په ناقانونه وژنو کې د دغه هېواد د ځانګړو ځواکونو د ښکېلتیا د شواهدو په اړه په ښکاره توګه بحث وشي او په علني توګه پرې راپور جوړ شي؛ خو اوس د څېړنې د پلاوي مشر لرډ جاسټېس هاډون کو حکم کړی، چې د شواهدو تر مطالعې وروسته دې پایلې ته رسېدلی، چې که د دفاع وزارت د څېړنو د محرمیت په اړه غوښتنې په پام کې ونه نیول شي، نو کولای شي ملي امنیت ته رېښتینی ګواښ او جدي زیان ورسوي.
دا حکم د برېټانوي ځواکونو د کړنو څرنګوالی، تاکتیکونه، تجهیزات او همدارنګه د دفاع وزارت او د هېواد د ځانګړو ځواکونو د شاهدانو د هویت د جزئیاتو له افشا کولو څخه ډډه کوي.
دغه څېړنه تر هغه وروسته پیل شوه، چې بي بي سي په یوه څېړنیز راپور کې لیکلي، چې د برېټانیا د هوايي ځواک یوې ځانګړې قطعې د ۲۰۱۰ کال له نومبر څخه د ۲۰۱۱ کال د مې تر میاشتې پورې د افغانستان په سویل هلمند ولایت کې د یوه شپږ میاشتني ماموریت په ترڅ کې څلور پنځوس افغانان تر شکمنو شرایطو لاندې وژلي دي.
د څېړنو د پلاوي مشر په خپل حکم کې، ځانګړو وکیلانو ته د کورنیو لاسرسی چې د هغوی رول یوازې د مطالبو څېړل بلل شوی په غیرعلني غونډو کې یې حضور منع شوی دی.
ټیسا ګرګوري چې د تورنو د قربانیانو د کورنیو لپاره کار کوي، سکای نیوز ته وویل: "موږ د دې حکم او د څېړنو د پایلو د اغېزو په اړه په ډېر پام سره ګام اخلو ."
هغه وويل، دا زموږ د موکلینو لپاره چې ادعا کوي، خپلوان يې په افغانستان کې د برېټانوي ځانګړو ځواکونو لخوا وژل شوي دي، مهمه ده چې رېښتیا راښکاره شي او هغوی وکولی شي په بشپړه توګه په څېړنو کې برخه واخلي
