امریکا د هاوايي ایالت په اورلګېدنې کې نېږدې ۱۱۰۰ کسان ورک شوي دي
امریکايي رسنۍ د چارواکو په حواله خبر ورکوي، چې د هاوايي ایالت په اورلګېدنه کې ۱۱۰۰ کسان ورک شوي دي، چې دا مهال یې پلټنې روانې دي.
امریکايي رسنۍ د چارواکو په حواله خبر ورکوي، چې د هاوايي ایالت په اورلګېدنه کې ۱۱۰۰ کسان ورک شوي دي، چې دا مهال یې پلټنې روانې دي.
له تېرو دوو اونیو راپه دېخوا ځنګلي اورونو د هاوایي ایالت د ماوي ټاپو وسوځاوه او د دغه ایالت چارواکو له مرکزي ادارې څخه د مرستې غوښتنه هم کړې ده.
د دغه ایالت والي ویلي، چې تر اوسه ۱۱۵ کسانو مړینه تایید شوې او په نورو پسې د پلټنې اداره پلټنې کوي.
فاکس نیوز د ماوي د پولیسو د مشر جان پېلټیر په حواله ویلي، چې ښايي د مړو په شمېره کې د پام وړ بدلون راشي او په نېږدې راتلونکي کې به د بې درکه شویو کسانو لېست خپور کړي.
تېره اونۍ د لاهینا چارواکو ویلي وو، چې د ۱۱۵ جسدونو څخه یې یوازې ۲۷ تنه پېژندل شوي او د نورو د پېژندنې لپاره اړتیا ده، چې د ډي این ای بېلګې یې واخیستل شي.
د هاوايي ایالت دغه اورلګېدنه د امریکا په تېر سل کلن تاریخ کې بې سارې بلل شوې او درانه مالي زیانونه یې هم اړولي دي.
د یادونې وړه ده، چې د تېرې دوشنبې په ورځ د امریکا ولسمشر جو بایډن هم دغه ایالت ته سفر کړی و او د قربانیانو له کورنیو سره یې د مرستې ژمنه کړې وه.
