د روسیې د دفاع وزارت د اوکراین د وسله والو ځواکونو د پرېکړې نیولو په مرکز د برید خبر ورکړی. د دغه وزارت په وینا؛ د روسیې پوځ تېره شپه دځمکني، سمندري او اوږده واټن ویشتونکو وسلو، په کارولو سره د اوکراین د وسله والو ځواکونو د پرېکړه نیولو مرکز په نښه کړ.
د روسیې دولتي خبري اژانس ریانووستي؛ د پنجشنبې په ورځ (د وږی دویمه) د دغه هېواد د دفاع وزارت په حواله خبر ورکړ، چې د اوکراین څلور دیپوګان یې په بېلابېلو سیمو کې هم ویجاړ کړي دي.
د روسیې د دفاع وزارت ویلي، چې دوی خپل هدف ترلاسه کړی او ټول توغندي یې ټاکلي هدف ته رسولي دي.
مسکو وايي؛ په اوکراین کې د روسیې تر ولکې لاندې سیمو کې یې د کیف شپږ بریدونه هم شڼډ کړي دي.
د روسیې د بهرنیو چارو د وزارت ویاندې ماریا زاخارووا پرون (چهارشنبه د وږی لومړۍ) ویلي وو، چې د دغه هېواد پوځ به په مسکو کې د اوکراین د بې پیلوټه الوتکو د بریدونو ځواب ورکړي.
