د روسیې د دفاع وزارت ویلي، چې د چهارشنبې په ورځ (د وږي ۸ مه) سهار وختي د دغه هېواد پر شپږو سیمو اوکرایني بې پیلوټه الوتکو بریدونه کړي. له دغو بریدونو وروسته، د پسکوف په هوايي ډګر کې ټولې الوتنې وځنډول شوې.
داسې ویل کېږي، چې پر کيیف د مسکو له یرغل وروسته دغه بریدونه تر ټولو ستر بریدونه وو چې تر دې مهاله یې ساری نه دی لېدل شوی.
روسي چارواکو ویلي، چې بې پیلوټه الوتکو د پسکوف په لویدیځ کې پر هوایي ډګر برید کړی او د مسکو، اوریول، بریانسک، ریازان او کالوګا په سیمو کې نسکورې شوې دي.
د راپورونو له مخې، پر پسکوف د دغو بریدونو په پایله کې پراخ اورونه لګېدلي او لږ تر لږه څلور الوتکې هم په کې له کاره لویدلې دي.
په همدې حال کې د پسکوف قوماندان میخائیل ودرنیکوف ویلي، چې دغو بریدونو ځاني زیان نه دی اړولی او د اور لمبې هم کابو شوې دي.
هغه دا رنګه زیاته کړې، چې د پسکوف هوایي ډګر به سبا ته د (پنجشنبې په ورځ د وږي ۹ مه) بیا له سره د الوتنو لپاره چمتو شي.
په خواله رسنیو کې خپاره شوي عکسونه ښيي، چې له پسکوف له ښاره شنې لوخړې پورته کېږي او د دغه ښار فضا پر لوګیو پوښل شوې ده.
له دغه بریده څو ساعته وړاندې اوکرایني چارواکو پر کيیف ښار د روسیې د برید خبر ورکړی و.
د کيیف ښاروال ویلي، د روسیې د بریدونو او د هغوی د الوتکو د رانسکورولو په پایله کې دوه تنه وژل شوي دي.
