د روسیې د بهرنیو چارو وزارت ویاندې په یوه خبري غونډه کې مسکو ته د احمد مسعود سفر ته اشاره وکړه او یو ځل بیا یې له طالبانو وغوښتل، چې ټول ګډونه حکومت دې جوړ کړي. ماریا زاخارووا ویلي، چې طالبان دې د نورو قومونو له استازیو سره باید خبرې وکړي.
نوموړې وویل، د افغانستان د ملي مقاومت جبهې مشر احمد مسعود درې ورځې مخکې د عادلې روسیې د ګوند له مشر سرګي میرونوف سره د روسیې په پارلمان کې وکتل.
روسیې تر دې وړاندې هم څو ځلې له طالبانو غوښتي، چې یو ټول ګډونه حکومت دې جوړ کړي.تېر کال د روسیې د بهرنیو چارو وزیر سرګي لاوروف ویلي و، که طالبان د یوه پراخ بنسټه حکومت د جوړولو تضمین وکړي، مسکو به د افغانستان د مشروع حکومت په توګه د دغې ډلې د رسمیت پېژندلو لپاره غور وکړي.د روسیې د بهرنیو چارو وزارت ویاندې زیاته کړه، که څه هم طالبان په رسمیت نه دي پېژندل شوي؛ خو روسیه له دې ډلې سره خپلو همکاریو ته دوام ورکوي.دغې ډیپلوماټې همداراز ټینګار وکړ، چې لا هم د طالبانو تر واکمنۍ لاندې ترهګریز ګواښونه، ټولنیزې او اقتصادی ستونزې او له بشری حقونو سرغړونه هغه څه دي چې لا هم په خپل حال پاتې دي.اغلې زاخارووا وویل:«که چیرې وضعیت د یوې نامناسبې سناریو له مخې پرمخ ولاړ شي، نړۍوال ترهګریز سازمانونه په ځانګړې توګه داعش به له دې وضعیت څخه ګټه پورته کړي او له افغانستانه به بهر په منځنۍ اسیا کې خپل پروګرامونه لا پراخ کړي.»هغې زیاته کړه، روسیه له طالبانو او د نورو قومونو له استازیو غواړي، چې د یوه رېښتیني او پراخ بنسټه حکومت د جوړولو، له ترهګرۍ، نشهیي توکو سره د مبارزې او د بشري حقونو د تینګښت لپاره خبرو ته کېني.د عادل روس ګوند د راپور له مخې، په دې کتنه کې دواړو لوریو د افغانستان پر سیاسي وضعیت او د هغې د حل په اړه خبرې وکړې.د افغانستان د ملي مقاومت جبهې په یوې خبرپاڼه کې لیکلي، چې ښاغلي مسعود له روسي چارواکو سره په کتنه کې د افغانستان له اوسني ناورین څخه د وتلو پر لارو چارو خبرې وکړې.دوه ورځې وړاندې روسي کارپوه اندري سرنکو په یوه شننه کې لیکلي، چې له امریکا سره پر خبرو د طالبانو تمرکز او پر دغه هېواد کې د دغې ډلې د مالي او سیاسي انحصار زیاتېدل ښايي مسکو له طالبانو سره پر اړیکو له سره غور وکړي.هغه وايي، چې د ملي مقاومت له جبهې سره د اړيکو په لرلو سره به بيا هم روسيه هڅه وکړي چې له طالبانو سره خبرې اترې روانې وساتي، چې په دې توګه به "ټولې هګۍ په يوه ټوکرۍ کې نه وي راټولې."
