د ایران د مازندران ولایت پولیسو اعلان کړی چې یوه ۵۶ کلنه ښځه یې د خپلو اوو لنډمهاله ميړونو د وژلو په تور نیولې او ویلي یې دي چې نوموړې په خپل جرم اعتراف هم کړی دی. دې په نهو کلو کې له شتمنو کسانو سره لنډمهاله ودونه کړي او وروسته یې هغوی وژلي.
د اېسنا د خبر له مخې، د مازندران د پولیسو قوماندان حسن مفخمي د جمعې په ورځ ویلي چې دا قضیه په تیرو ورځو کې، وروسته له هغې تر پام لاندې ونیول شوه چې یوې کورنۍ د خپل ۸۲ کلن پلار د شکمن مړینې په اړه شکایت وکړ.
پولیس وايي، په قتل تورنې ګلثوم په لومړنیو پلټنو کې د خپل خاوند په وژلو اعتراف وکړ.
د حسن مفخمي په خبره، دې مېرمنې د ساري، نکا، محمود آباد او قایم شهر له ښارونو څخه له ۷۵ تر ۸۰ کلونو پورې شتمن او د پاخه عمر لروونکو کسانو په غوره کولو سره له هغوی سره د لنډمهال واده کاوه.
پولیس وايي، په وروستي موقتي نکاح کې د دغې ښځې مهر شاوخوا ۵۰۰ میلیونه تومانه وو.
دغې ښځې د خپل هر مېړه له وژلو وروسته چې ویل یې مړ شو، د مهر او میراث غوښتنه کوله.
دغې تورنې میرمنې دیارلس ځلې لنډمهاله نکاح ګانې کړې او ټول میړونه یې څه موده وروسته مړه شوي دي.
پولیس په دې باور دي چې ښايي هغه به د نورو خلکو په وژلو هم تورنه شي.
