د پاکستان د بهرنیو چارو وزارت ویانده وايي، افغانستان کې «نوې وسلې ترهګرو ته په لاس ورغلې دي» او په همدې وسلو د دغه هېواد پر امنیتي ادارو بریدونه کوي. د پاکستاني رسنیو د راپور له مخې، ممتاز زهرا بلوڅ د جمعې په ورځ په اونیزه خبري غونډه کې پر دې وسلو اندېښنه وښوده.
مېرمن بلوڅ دا هم وویل چې دا وسلې په افغانستان کې له امریکا پاتې دي او دغه حالت ته د نړیوالې ټولنې پام پکار دی.
تر دې مخکې د پاکستان سرپرست لومړي وزیر ویلي و، چې په افغانستان کې له امریکا په پاتې وسلو په پاکستان کې بریدونه کېږي.
خو وړمه ورځ د امریکا د امنیت شورا ویاند جان کربي د پاکستان د لومړي وزیر دغو څرګندونو ته په ځواب کې ویلي:« موږ په افغانستان کې هیڅ پوځي تجهیزات نه دي پرېیښي.»
جان کربي زیاته کړې:« له افغانستانه د راوتو په مهال مو ځینې تجهیزات پاتې کېدل چې هغه مو هم له منځه یووړل.»
د پاکستان د بهرنیو چارو وزارت ویاندې، که څه هم له تېرو دریو ورځو راهیسې د پاکستان او افغانستان ترمنځ د تورخم دروازې تړل کېدو ته اشاره ونه کړه، خو ویې ویل «که د پاکستان له لوري پوله بنده وي، نو لامل به یې بد امنیتي حالت وي.»
نوموړې دا هم وویل چې په چترال کې د پاکستاني طالبانو د برید په هکله یې هم «افغان چارواکو» ته خپله اندېښنه ښودلې ده.
پاکستاني چارواکي وايي، چترال ته له افغان خاورې وسلوال اوښتي او برید یې کړی دی.
خو د طالبانو د حکومت ویاند ذبیح الله مجاهد د پاکستاني چارواکو دا ادعا بې ځایه بللې او وايي، د پاکستاني طالبانو وسلهوال برید د افغانستان له خاورې په ګټه اخیستو نه دی شوی.
