د ایران د بهرنیو چارو وزارت وايي، د افغانستان لپاره د پاکستان ځانګړي استازي په دغه هېواد کې د سولې او ټیکاو لپاره له تهران سره پر همکارۍ ټینګار وکړ. اصف دوراني له بهرنیو چارو وزیر حسین امیر عبداللهیان سره په لیدنه کې پرون دا خبره کړې ده.
د ایران بهرنیو چارو وزارت د چارشنبې په ورځ یوه اعلامیه کې لیکلي، چې د دواړو هېوادونو چارواکو په افغانستان کې بدلونونه وارزول.
پاکستان او ایران د نورو هېوادونو په څېر د طالبانو حکومت په رسمیت نه پېژني، خو د دې ډلې ډیپلوماټان یې په خپلو هېوادونو کې د افغان سفارت لپاره منلي دی.
د ایران د بهرنیو چارو وزیر هم له اصف دوراني سره په لیدنه کې هیله کړې چې د دواړو هېوادونو د سلا مشورو دواو به په افغانستان او سیمه کې د لا ډېرې سولې او ټیکاو سبب شي.
د افغانستان لپاره د ځانګړي استازي تر ګومارل کېدو راهیسې دا لومړی ځل دی چې اصف دورانی ایران ته رسمي سفر لري.
