په پاکستان کې رسنیو خبر ورکړی، چې د دغه هېواد امنیتي ځواکونو د خېبر پښتونخوا په سوات کې د پاکستاني طالبانو پخوانی قوماندان نیک محمد په ځانګړو عملیاتو کې وژلی دی.
هغه په سوات کې د پوځ د "حقې لارې" له عملیاتو وروسته له خپلې کورنۍ سره افغانستان ته وتښتېد.
نوموړی د تحریک طالبان پاکستان پخواني مشر ملا فضل الله ته نېږدې کس و او د روان کال په لومړیو کې په سوات کې له تحریک طالبان پاکستان سره یو ځای شوی و.
د پاکستاني رسنیو د راپورونو له مخې؛ هغه سوات ته له ستنېدو وروسته پر پولیسو بریدونه کول.
پاکستاني طالبانو په وروستیو دوو کلونو کې د پاکستان پر پوځ او پولیسو خپل بریدونه زیات کړي دي. دا ډله اوسمهال د دغه هېواد لپاره تر ټولو مهم امنیتي ګواښ بلل کېږي.
پاکستاني چارواکو پر افغان طالبانو تور پورې کړی، چې د تحریک طالبان پاکستان غړو ته یې په خپله خاوره کې ځای ورکړی؛ خو بل خوا طالبانو بیا دا تورونه رد کړي او دا یې د پاکستان د امنیتي ځواکونو ناکامي بللې ده.
پاکستان ګواښ کړی، چې د اړتیا په صورت کې به په افغانستان کې د پاکستاني طالبانو پټنځایونه په نښه کړي.