د طالبانو د لوړو زده کړو وزیر ندا محمد ندیم ویلي، دا ډله به د غربي هېوادونو په غوښتنه د شریعت یوه برخه هم پرې نه ږدي. دغه طالب چارواکي فاریاب ولایت ته په سفر کې د دغه ولایت له اوسېدونکو وغوښتل، چې پر طالبانو باور وکړي او د «دښمن تبلیغاتي جګړې» ته پام ونه کړي.
د طالبانو د لوړو زده کړو وزارت په خبرپاڼې کې لیکلي، چې ندا محمد ندیم د سې شنبې په ورځ (د وږي ۲۸مه) په عامه غوڼډه کې وینا وکړه.
تر دې مخکې د سپینې ماڼۍ د ملي امنیت شورا ویاند افغانستان انټرنشنل ته ویلي و، چې طالبان د نړۍ د غوښتنو پر خلاف په حرکت کې دي او له نړۍوال مشروعیت څخه واټن لري.
د طالبانو د اسلامي شریعت د پلي کولو تر نامه لاندې پر افغانستان بیا واکمنۍ، د ښځو، قومي او مذهبي ډلو پر وړاندې پراخ محدودیتونه وضع کړي دي.
په تېرو دوو کلونو کې نړۍوالې ټولنې په پرله پسې توګه له طالبانو غوښتي، چې بشري حقونو ته درناوی وکړي او د یوه جامع حکومت په جوړولو سره د افغانستان د نړۍوالې انزوا او په دغه هېواد کې د بشري ناورین مخه ونیسي.
طالبانو په پرله پسې ډول د نړۍ غوښتنې له پامه غورځولي دي؛ خو د دغې ډلې چارواکو په وار - وار له نړۍوالې ټولنې غوښتي، چې د دغې ډلې حکومت دې په رسمیت وپېژني.
خو تر اوسه هېڅ هېواد د طالبانو اداره په رسمیت نه ده پېژندلې.
حتا هغه هېوادونه چې د دې ډلې استازو ته یې د افغانستان ډېپلوماټیک ماموریتونه سپارلي، د دې ډلې حکومت یې په رسمیت نه دی پېژندلې.
