په ملګرو ملتونو کې د ایران استازي د امنیت شورا د سه شنبې ورځې په غونډه کې د ښځو پر زدهکړو د بندیز په اړه د اندېښنې په څرګندولو سره له طالبانو وغوښتل، چې ښځو ته دې د زدهکړو اجازه ورکړي.
پاکستان هم له طالبانو وغوښتل، چې د بشري حقونو وضعیت په ځانګړې توګه د افغان ښځو د حقونو په اړه د نړۍ اندېښنو ته پام وکړي.
د افغانستان په اړه د ملګرو ملتونو غونډه د سه شنبې په ورځ د (تلې په ۴مه) جوړه شوې وه، چې په کې برخه والو د طالبانو پر سیاستونو نیوکې وکړې.
په ملګرو ملتونو کې د افغانستان سرپرست استازي نصیر احمد فایق په دغې غونډه کې د افغانستان په استازیتوب ګډون کړی و.
په دغې غونډه کې په ملګرو ملتونو کې د ایران سفیر امیر سعید ایرواني د ښځو پر زدهکړو د بندیز په اړه د لنډې یادونې تر څنګ له افغانستان سره د بشري مرستو پر زیاتولو ټینګار وکړ.
نوموړی په افغانستان کې له بشري ناورین سره د مقابلې لپاره پر طالبانو د بندیزونو لیرې کول یوه لاره وبلله او د نړۍ له هېوادونو یې وغوښتل، چې د افغانستان د اقتصادي ودې، د کډوالو د خوندي راستنېدو او د سیمې د امنیت لپاره کار وکړي.
همدارنګه په ملګرو ملتونو کې د پاکستان استازي منير اکرم هم په لنډه توګه په افغانستان کې د ښځو وضعیت ته اشاره وکړه او له طالبانو یې وغوښتل، چې د بشري حقونو په ځانګړي ډول د ښځو د حقونو د ټینګښت په اړه د نړۍ اندېښنو ته درناوی وکړي.
منير اکرم له طالبانو سره د نړۍ د تعامل دفاع وکړه او دا يې د افغانستان د حالاتو په ګټه وګڼله.
