پاکستاني چارواکو افغانستان انټرنشنل ته ویلي، په افغانستان کې طالبانو اسلام اباد ته خبر ورکړی چې د پاکستان د تحریک طالبان ځینې غړي یې نیولي. د دغو چارواکو په وینا، د پاکستان حکومت لا په دې اړه شک لري.
طالب چارواکو ویلي، چې پاکستاني وسلهوالو له نیول کېدو وروسته، د څرخي پله او د جلال اباد ښار په زندانونو کې ساتل کېږي.
د (وږي په ۱۵مه) د خيبر پښتونخوا په چترال سيمه کې د دغه هېواد پر امنيتي ځواکونو د پاکستاني وسلهوالو له مرګوني بريد وروسته، د افغانستان لپاره د پاکستان د ځانګړي استازي اصف دراني په مشرۍ د پاکستان يو پلاوي کابل ته سفر وکړ.
د سرچینو په وینا، په دغې لیدنه کې طالبانو ژمنه کړې وه چې د افغانستان په خاوره کې به د تحریک طالبان پاکستان د فعالیتونو مخه نیسي.
همدارنګه هغوی د کرښې دواړو خواوو د امنیت او مدیریت پر بیاکتنې هوکړه وکړه.
لاتراوسه د نیول شویو وسلهوالو کره شمېرې په لاس کې نشته؛ خو ویل کېږي چې شمېر یې ۲۰۰ تنو ته رسېږي.
د رسمي تایید په صورت کې، افغان طالبانو د اسلام اباد هغې غوښتنې ته د ځواب ویلو لپاره یو مهم ګام اخیستی، چې په ځلونو یې پر دغې ډلې د پاکستاني طالبانو د نه مهارولو له امله نیوکې کړې وې.
له دې سره، پاکستاني چارواکو افغانستان انټرنشنل ته وویل، چې د پاکستان حکومت اوس د پاکستاني وسلهوالو نیولو ته د شک په سترګه ګوري. ځکه چې کېدای شي د اسلام اباد سره د سیاسي ترېنګلتیاوو د کمولو لپاره دغه ادعا د طالبانو یو سیاسي حرکت وي.
