د پاکستان مسلم لیګ نواز ډلې یوه مشره مریم نواز وايي، چې پخوانی لومړی وزیر نواز شریف له کړکېچ د پاکستان د اېستلو لپاره دغه هېواد ته ستنېږي. د نوموړې په خبره، «نواز شریف به ترهګري ختمه کړي، ولس به له ګرانۍ وژغوري او خلکو ته به کار روزګار پیدا کړي.»
د مسلم لیګ د اېکس له مخې، د نواز شریف لور مریم نواز د یکشنبې په ورځ په لاهور کې د ګوند ځوانانو څانګې په غونډه کې دا خبرې وکړې.
ټاکلې ده چې نواز شریف له څو کلنې جلاوطنۍ وروسته د اکتوبر پر ۲۱ له بریتانیا څخه خپل هېواد ته ستون شي.
مریم نواز له ګوندي ملګرو وغوښتل چې د ښاغلي شریف هرکلي ته راووځي او زیاته یې کړه: «د اکتوبر پر ۲۱ به ولس ثابته کړي چې یوازې نواز شریف مشر دی.»
نوموړی په داسې مهال پاکستان ته ستنېږي چې تېره اونۍ یې د اختلاس اړوند یوه دوسیه بیا را ژوندۍ شوې ده.
نواز شریف پر ۲۰۱۷ کال هم د فساد په تور د سترې محکمې له خوا له واکه لرې او بیا پر ۲۰۱۸ کال د تل لپاره له سیاست او واک منع شو.
