د بهرنیو سودا ګرو یوه چينايي ډله پکتیا ته د ځڼغوزیو د حاصلاتو او کیفيت معلوملو له پاره دغه ولایت ته تللې او هلته يې له سوداګرو سره له نږدې لیدلي. دغه سوداګر وايي که پایله يې ښه وه، نور سوداګر به هم په دې برخه کې پانګونې ته وهڅوي.
دغو چینایي سوداګرو ويلي د پکتیا او خوست د ځڼغوزیو بهير(پخولو، پاکولو او بسته کولو) تر ارزولو وروسته به دوی نور چینايي سوداګر هم وهڅوي چې د لويې پکتیا (پکتیکا، پکتیا او خوست) د ځڼغوزیو په برخه کې پانګونه وکړي.
د دغو سوداګرو له ډلې د جیانګ په نوم یوه چینايي سوداګر ویلي چې د پکتیا په مرکز ګردیز کې يې د ځڼغوزیو د پخولو او بسته بندۍ یوه کارخونه له نږدې لیدلې او ارزولې ده.
جیانګ وايي تر دې سفر وروسته به خپلې ارزونې په دې برخه کې له نورو چینايي سوداګرو سره شریکې کړي :«د ځڼغوزیو ارزونه مو وکړه، د تېر کال په پرتله سږکال د ځڼغوزیو کیفیت ډیر ښه شوی. حاصلات يې ډیر شوي او کیفیت یې هم ښه شوی. يوه لويه برخه ځڼغوزي مو اخیستي، چې چین ته به یې صادر کړو.»
د پکتیا سوداګرۍ خونې چارواکي وايي دوی خوښ دي چې بهرني سوداګر د پکتیا له سوداګرو سره له نږدې کار وکړي او په دې برخه کې یو له بل سره خپلې سوداګریزې تجربې شریکې کړي.
د پکتیا د سوداګرۍ خونې مشر حسیب الله محمدي د ځڼغوزیو د پېرلو لپاره دغه ولایت ته د بهرنیو سوداګرو ورتګ مهم بولي او وايي، له دې سره به دځڼغوزیو سوداګري لا پراخه شي.
محمدي وايي دوی هڅه کوي چې خپل محصولات بهر ته صادر کړي: «دا لومړی ځل دی چې پکتیا ته چینایي سوداګر راغلي او ځڼغوزي پیري، دغه ګام په ښه پال نیسو. دا زموږ د صادراتو په برخه کې لویه لاسته راوړنه ده چې په دې سره به زموږ صادرات لا نور ډېر شي. زه ډاډه یم چې زموږ دا ځڼغوزي يو ځل بهر ته صادر شي بیا به په بهر کې لومړی ځای خپل کړي.»
خو په پکتیا کې د ځڼغوزیو سوداګر دا اندېښنه هم لري چې، سږ کال په دغه ولایت کې د ځڼغوزیو حاصلات ۶۰ سلنه کم شوي، خو په خبره یې چې بیې یې تر پخوا لوړې شوې دي.
په وروستیو څو کلونو کې د پکتیا ځڼغوزي د چین په ګډون، اروپایي او عربي هېوادونو ته صادر شوي او ټول د پکتیا په مرکز ګردېز کې پروسس او بستهبندي شوي وو.
ويل کيږي تر هغه پخوا به بیا د لویې پکتیا ځڼغوزي پاکستاني سوداګرو په قاچاقي ډول پېرل او تر هغه وروسته به یې په خپل هیواد کې پروسس او بسته بندي کول او بهر ته به یې د پاکستان په نوم صادرول.
