افغانستان انټرنشنل ـ پښتو ته داسې اسناد رسېدلي دي، چې د طالبانو مالیې وزارت له ټولو مامورینو غوښتي چې د کار د دوام لپاره یو ژمنلیک یا تعهدنامه لاسلیک کړي. طالبانو خبرداری ورکړی چې د مالیې وزارت د چتر لاندې څوک کار کوي او دا ژمنلیک نه لاسلیکوي، د تل لپاره به له دندې ګوښه کیږي.
د دغې تعهدنامې له مخې د مالیې وزارت هر کارکوونکی ژمنه کوي چې «خپل صورت او سیرت پر سنتو برابروي، د لمانځه لپاره جومات ته ځي، د دعوت او ارشاد ریاست اړوند درسونو ته حاضریږي.»
په دې تعهدنامه کې داسې نورې ژمنې هم یادې شوې دي.
افغانستان انټرنشنل ـ پښتو ته د طالبانو مالیې وزارت څخه یو مکتوب هم رسېدلی چې تېره اونۍـ میزان په ۷ مه - د دې وزارت د بشري منابعو ریس مولوي احمد شاه شاکر صادر کړی دی.
په دې مکتوب کې راغلي چې د مالیې وزارت په مرکز او ولایتونو کې ټول کارکوونکي باید د امر بالمعروف او نهې له منکر وزارت اړوند د دعوت او ارشاد ریاست یوه تعهدنامه لاسلیک کړي.
د طالبانو د مالیې وزارت اړوند پر مرکز سربېره د ولایتونو په شمول ټولو ادارو کې پر مامورینو د دې تعهدنامې لاسلیکول جبري شوي دي.
د طالبانو د امربالمعروف او نهې له منکر وزارت د دې ډلې تر کنټرول لاندې ټولو ادارو کې خپل یو مستقل ریاست جوړ کړی دی، چې په ورته تعهدنامو کې راغلې مادې تعقیب او عملي کوي.
طالبان واک ته له رسېدو راپدېخوا ورځ تر بلې پر خلکو محدیدیتونه زیاتوي.
