عرب نیوز نن پنجشنبه د (تلې ۱۳مه) په خپل یوه خپور شوي راپور کې لیکلي، چې د خیبر پښتونخوا په شمال لویدیځ کې پولیس چارواکي اختر حیات خان ویلي چې سږ کال په پاکستان کې په سلو کې ۷۵ سلنه بریدونه د افغانانو لهخوا شوي دي.
د پاکستان حکومت چې اوسمهال له اقتصادي کړکېچ سره لاس او ګرېوان دی، په خپل هېواد کې د افغان کډوالو د پراخه شتون په اړه اندېښنه لري.
د پاکستان سرپرست حکومت د سه شنبې په ورځ په پاکستان کې مېشتو ۱.۷۳ میلیونه ناقانونه افغان کډوالو ته د وتلو لپاره ضرب الاجل وټاکه.
دغه پرېکړه په کور دننه او بهر له پراخو غبرګونونو سره مخامخ شوه.
په کابل کې د طالبانو د حکومت ویاند ذبیح الله مجاهد تېره ورځ د افغانانو د جبري اېستلو په اړه د پاکستان دغه اقدام د نه منلو وړ بللی او ویلي یې و، چې افغانان د پاکستان په امنیتي پېښو کې ښکېل نه دي.
د هغه ترڅنګ د طالبانو د بهرنیو چارو وزارت سیاسي مرستیال شېرمحمد عباس ستانکزي هم ویلي، چې د پاکستان دغه کړنه د دواړو هېوادونو ترمنځ د شخړې پیلېدو په مانا ده.
د عرب نیوز په وینا، پاکستاني چارواکي وایي چې د عدلي طب د ازموینو پایلې په ځانمرګو بریدونو کې د افغانانو لاس لرل په ډاګه کوي.
د پاکستان پولیسو تېره میاشت د هغو کسانو پر ضد عملیات پیل کړل، چې ویل کېږي په پاکستان کې له قانوني اسنادو پرته اوسېږي او سلګونه افغانان یې نیولي هم وو.
د پاکستان د کورنیو چارو سرپرست وزیر سرفراز بګټي د سه شنبې په ورځ خبریالانو ته وویل: «ناقانونه وګړو او ناقانونه کډوالو ته د نومبر تر لومړۍ نیټې وخت ورکوو، چې له پاکستانه ووځي.»
دغه پرېکړه وروسته له هغې ونیول شوه، چې تېره اوونۍ په مستونګ او هنګو کې دوو ځانمرګو په جلا جلا توګه په دوو جوماتونو بریدونه وکړل چې له امله یې ۶۵ کسان ووژل شول.
خو دغو ټولو ادعاوو ته په غبرګون کې طالبانو ویلي، چې ګاونډیان دې خپل امنیت په خپله وساتي او د خپل بام واورې دې د بل په بام نه اچوي.
