د افغانستان په چارو کې د روسیې استازی وايي، د مسکو په غونډه کې ګډونوالو د داعش او نشهيي توکو پر وړاندې د مبارزې په برخه کې د طالبانو د اقدام هرکلی وکړ؛ خو تاجکستان ورسره مخالفت وښود. ضمیر کابلوف وویل: د تاجکستان د چارواکو په باور، د دې ډلې د ستاینې لپاره هیڅ هم نه شته.
ضمیر کابلوف د چهارشنبې په ورځ (د تلې په ۱۲مه) په مسکو کې په یوې خبري غونډه کې د افغانستان په اړه د مسکو د وروستۍ غونډې له وروستۍ خبرپاڼې سره د تاجکستان د مخالفت په اړه دغه څرګندونې وکړې.
نوموړي وویل: «تاجکستان د هغو هېوادونو له لېست څخه د ځان اېستلو غوښتنه وکړه، چې د مسکو د غونډې وروستۍ اعلاميه يې ومنله او موږ موافقه وکړه.»
د افغانستان په اړه د مسکو فارمټ غونډه د جمعې په ورځ (د تلې په ۷مه) د روسیې په کازان ښار کې د لسو هېوادونو د استازو په حضور کې جوړه شوه.
په دې غونډه کې د تاجکستان، هند، ایران، قزاقستان، چین، قرغزستان، پاکستان، روسیې، ترکمنستان او ازبکستان ځانګړو استازو او لوړپوړو چارواکو ګډون کړی و.
د طالبانو د بهرنیو چارو وزیر په دې غونډه کې د مېلمه په توګه ګډون کړی و.
د ښاغلي کابلوف په وینا، د دغې سرمشریزې وروستۍ اعلامیه له تاجکستان پرته د نهو ګډون کوونکو هېوادونو په هوکړې سره ومنل شوه.
ضمیر کابلوف وایي: تاجکستان د طالبانو په اړه بل ډول چلند لري او پر طالبانو سختې نیوکې کوي.
