رویټرز: په هرات کې د زلزلې له امله د مړو شمېر تر ۲۰۰۰ واوښت
رویټرز خبري اژانس د طالبانو د طبیعي پېښو پر وړاندې د مبارزې وزارت د ویاند له خولې ویلي، چې په هرات کې د شنبې د ورځې د زلزلې له امله دمړو شویو کسانو شمېر دوه زره او ۵۳ ته رسېدلی دی.
رویټرز خبري اژانس د طالبانو د طبیعي پېښو پر وړاندې د مبارزې وزارت د ویاند له خولې ویلي، چې په هرات کې د شنبې د ورځې د زلزلې له امله دمړو شویو کسانو شمېر دوه زره او ۵۳ ته رسېدلی دی.
ملا جانان سایق زیاته کړه چې په دې زلزله کې څه باندې ۹ زره نور کسان ټپیان شوي هم دي.
د دغه طالب چارواکي په وینا په دې زلزله کې شاوخوا ۱۳۲۹ کورونه یا په بشپړه توګه ویجاړ شوي دي.
طالبانو په هرات کې د زلزلې د زیانونو بېلابېلې شمیرې وړاندې کړې دي.
تر دې مخکې رویټرز خبري اژانس د طالبانو تر کنټرول لاندې د افغاني سرې میاشتې ټولنې د ویاند عرفان الله شریفزي له خولې ویلي وو چې د هرات په زلزله کې د وژل شویو کسانو شمېر تر ۵۰۰ اوښتی دی.
په همدې حال کې د طالبانو یوه بل ویاند د یکشنبې په ورځ (د تلې ۱۶مه) ازادي راډیو ته وویل چې د هرات په زلزله کې له زرو زیات کسان مړه شوي دي.
رویټرز د روغتون د سرچینو په حواله ویلي چې د دغې پېښې ډېری قربانیان ښځې او ماشومان دي.
د افغاني سرې میاشتې ټولنه چې د طالبانو تر کنټرول لاندې ده وايي، په هرات کې د شنبې د ورځې د زلزلې له امله تر ۴۰۰ډېر کسان مړه شوي او سلګونه نور ټپیان شوي دي.
دغه سازمان تر خاورو لاندې د ورکو شويو کسانو د لټون عملياتو ته په اشارې سره وړاندوينه وکړه چې د مړو شمېر به زيات شي.
د یکشنبې په ورځ (د تلې ۱۶مه) افغان سرې میاشتې د ایکس په ټولنیزه شبکه کې لیکلي چې د هرات ولایت د زنده جان ولسوالۍ د «کشکک، سیاهاب او سنجو» کلي «په بشپړه توګه» ویجاړ شوي دي.
دغه سازمان ویلي چې له ټپیانو سره د مرستې لپاره روغتیايي ډلې او رضاکاران سیمې ته رسېدلي دي.
تر دې مخکې ملګرو ملتونو ویلي وو چې د هرات ولایت په زنده جان ولسوالۍ کې لږ تر لږه ۱۰۰ تنه مړه شوي او تر ۵۰۰ زیات ټپیان شوي دي.
دغه سازمان ویلي چې ښايي په دې ولسوالۍ کې د مړو شمېر ۳۲۰ تنو ته ورسېږي.
د ملګرو ملتونو د بشري مرستو د همغږۍ دفتر (اوچا) په یوه خبرپاڼه کې لیکلي چې د شنبې ورځې د ۱۵ نیټې د زلزلې له امله د هرات د زنده جان ولسوالۍ په اتو کلیو کې ۴۶۵ کورونه ویجاړ شوي او ۱۳۵ کورونه زیانمن شوي دي.
د اوچا د شمېرو له مخې دغې پېښې ۴۲۰۰ کسان اغېزمن کړي او ۲۱۰۰ کسان يې بې کوره کړي دي.
دغه سازمان وايي، چې په هرات ښار کې شاوخوا ۳۰۰ بې ځایه شوې کورنۍ په پرې شویو ودانیو کې ژوند کولو ته اړې شوې دي.
دغه مرستندويه اداره وايي، چې د دې ولسوالۍ په وادکه سیمه کې تر ټولو زيات زيانونه اوښتي دي.
د ملګرو ملتونو د بشري چارو د همغږۍ دفتر زیاته کړې، چې د لټون او ژغورنې هڅې دوام لري، ښايي د زیانونو شمېر تردې لوړ شي.
دغه سازمان وايي، د بشري مرستو سازمانونو د زلزله ځپلو سره د مرستې لپاره هڅې پیل کړي دي.
د شنبې په ورځ د تلې په ۱۵مه د افغانستان شمال لوېدیځ د ۶،۳ درجې په کچه یوې زلزلې ولړزاوه. د امریکا د ځمکپیژندنې سروې ادارې ویلي چې د دې زلزلې مرکز د هرات ولایت د زنده جان ولسوالي وه.
