د روسیې د بهرنیو چارو وزیر: د فلسطین او اسراییل جګړه باید ودرول شي

د اسراییل د روغتیا وزارت اعلان کړی، چې په دغه هېواد کې د حماس په بریدونو کې لږ تر لږه ۷۰۰ اسراییلیان وژل شوي او ۲۳۸۲ نور ټپیان شوي دي.

د دغه راپور له مخې؛ ۲۲ تنه سخت ټپیان شوي دي.

پر غزې د اسراییل په بریدونو کې ۴۹۳ تنه وژل شوي او ۲۷۵۰ تنه ټپیان شوي دي.

د اسراییل پوځ تایید کړې، چې له غزې تړانګې سره د دغه هېواد پولې ته څېرمه د اسراییل په اوو یا اتو نقطو کې له حماس سره جګړه روانه ده.

د اسراییل د پوځ یوه ویاند هیله څرګنده کړې، چې د دوشنبې په ورځ تر میزان ۱۷ مې نیټې پورې به د دغه هیواد پوځ د دغو ټولو سیمو بشپړ کنټرول په لاس کې واخلي.

راپورونه وايي، چې د حماس ځواکونه اوس هم هڅه کوي چې د ځمکې له لارې اسراییل ته ننوځي.

د حماس پوځي څانګې، ګردان عزالدین قسام په یوې بیانیه کې ویلي چې، «پر اسراییل د دوی راکټي بریدونه، د ولسي وګړو د کورونو په وړاندې د جرمونو په ځواب کې دی.»

بن ګوریون د اسراییل تر ټولو لوی نړیوال هوايي ډګر دی.

د حماس د بریدونو له پیل وروسته، لویو هوايي شرکتونو اسراییل ته خپلې الوتنې ځنډولې دي.

هغه وویل چې د ایران د "نیابتي ډلو" لخوا د برید په صورت کې اسراییل او امریکا باید د ایران د تیلو د زیرمو ته لاس ور وغځوي.

ښاغلي ګراهام د یکشنبې په ورځ په اېکس پاڼه لیکلی چې، «ایران د حزب الله اصلي ملاتړی دی؛ هغه شیعه ترهګره ډله چې له لبنان څخه یې د اسراییل پر لور لسګونه توغندي توغولي دي.»

هغه زیاته کړه چې د حزب الله او نورو ایراني نیابتي ډلو لخوا برید به د اسراییلو دفاعي سیسټم لپاره ویجاړونکی وي.

تهران په ځلونو د حماس او د لبنان د حزب الله په څېر د وسله والوډلو څخه خپل ملاتړ اعلان کړی او له فلسطیني "مقاومت" ډلو یې غوښتي چې د اسراییل په وړاندې خپل بریدونه زیات کړي.

دغه امریکايي جمهوريت غوښتونکي سناتور خبرداری ورکړ چې که دا ډول برید وشي، نو اسراییل او امریکا باید د ایران د اقتصاد برخه، یعنې د ایران د تیلو زیرمې او د تېلو د چاڼ خونې له منځه یوسي.

هغه په ​​کلکه خبرداری ورکړ چې د ایران «تروریستي رژیم» به په سیمه او نړۍ کې د ټولو بدلونونو او ورانیو بیه پرې کړي.

حماس د شنبې په ورځ د اسراییل په خاوره کې تر ټولو ستر بریدونه ترسره کړل چې د دغه هیواد په تاریخ کې بې ساری بلل کیږي.

د نیویارک ټایمز په وینا، ویل کیږي چې د حماس په دغو بریدونو کې لږ تر لږه ۶۰۰ اسراییلیان وژل شوي دي.

بلینکن د یکشنبې په ورځ سيایناین ته وویل: «زه به حیران نه شم که چیرې د حماس یو دلیل دا وي چې له اسراییل سره د سعودي عربستان او ځینو نورو هیوادونو د نیږدې کیدو د مخنیوي لپاره دغه بریدونه شوې وي»

د اسراييل لومړي وزير بنيامين نتنياهو تېره مياشت ويلي و، چې د ده په اند هېواد يې له سعودي عربستان سره د سولې په درشل کې دی، چې دا مساله په منځني ختيځ کې وضعيت بدلولی شي.

امریکا ویلي دي چې د شنبې په ورځ د حماس د بریدونو سره سره به د تل ابیب او ریاض ترمنځ د اړیکو د عادي کولو بهیر دوام وکړي.

د امریکا د ملي امنیت د سلاکار مرستیال جان فاینر د یکشنبې په ورځ فاکس نیوز ته وویل «زمونږ په باور دواړه هیوادونه د ډیپلوماټیکو اړیکو په احتمالي جوړولو کې ګډې ګټې لري.»

خو د منځني ختیځ د یو شمېر کارپوهانو په اند د اسراییل او سعودي عربستان لپاره به په لنډه موده کې د دې غوښتنې عملي کول ستونزمن وي، په تېره بیا که اسراییل د حماس د ځپلو او د خپلو برمته شویو وګړو د خلاصون لپاره چې شمیر یې سلو کسانو ته رسیږي، پراخ عملیات پیل کړي.

د حماس یوه جګپوړي مشر عباس هنیه د شنبې په ورځ د عربي هیوادونو سره چې غواړي له اسراییل سره اړیکې ټینګې کړي وویل چې، اسراییل د ډیپلوماټیکو اړیکو په بدل کې د هغوی ملاتړ نه شي کولای.

هنيه وويل، «له اسرایيل سره د اړيکو د عادي کولو ټول تړونونه د فلسطين شخړه نه شيحل کولی.

باوري سرچینو خبر ورکړی، چې سعودي عربستان غواړي له اسرايیل سره د ډیپلوماتیکو اړیکو د ټینګولو په بدل کې له امریکا څخه امنیتي ضمانتونه ترلاسه کړي او د فلسطیني دولت د جوړولو زمینه برابره کړي.

دا لا څرګنده نه ده چې سعودي عربستان به څومره د اړیکو د عادي کولو لپاره د یوه اساسي شرط په توګه د فلسطیني دولت پر جوړېدو ټینګار وکړي.

د اورشلیم‌پوست ورځپاڼې په وینا، د اسراییلو امنیتي کابینې د شنبې په ورځ پریکړه وکړه چې د حماس د بریدونو په غبرګون غزې ته باید د بریښنا، توکو او تیلو د ننوتلو مخه ونیسي.

که څه هم اسراییل په ۲۰۰۵ کال کې له غزې څخه ووت، خو لا هم ددغو پولو کنټرول په خپل واک کې لري.

د حماس پوځي څانګې د شنبې په ورځ د تلې په ۱۵مه اعلان وکړ چې پر اسرايیل یې ۵۰۰۰ توغندي توغولي دي.

دغه توغندي د غزې له تړانګې څخه پر اسراییل توغول شوي دي.

اسراییلي چارواکو ویلي دي چې پر دغه هیواد د توغول شویو توغندیو شمیر ۲۲۰۰ وو.

سرچینه زیاتوي، چې پر غزې د اسراییلو د برید له پیل راهیسې تر اوسه تر ۴۰۰ډېر کسان وژل شوي او نږدې دوه زره نور ټپیان شوي دي.

په همدې حال کې اسراییلي رسنیو ویلي، چې په دغه هېواد کې د وژل شویو کسانو شمېر تر ۷۰۰ تنو رسېدلی دی.

طالبانو د حماس د برید په غبرګون کې ویلي چې دوی "د فلسطین د خلکو د حق ملاتړ کوي چې په خپله تاریخي خاوره کې خپلواک هیواد ولري."

طالبانو له اسلامي هېوادونو او نړيوالې ټولنې غوښتي، چې په غزه کې د اسراييلو د "تاوتريخوالي" مخه ونيسي.

د طالبانو د بهرنیو چارو وزارت ویاند هم له ټولو هېوادونو او نړیوالو بنسټونو په ځانګړې توګه له ملګرو ملتونو غوښتي چې د اسراییل د کړنو مخه ونیسي.